سماره..ضليت بس اذكر ايام زمان لمن جنت اتعارك ويا احمد لمن ياخذ جبسي وابويه ياخذني يشتريلي وارجع اغور بي وهوه يروح الباب ويكوله انته تحبها اكثر مني بابا جان يكوله اني احبكم ثنينكم بس هيا لمدلله مالنه حمودي المفروض انته هم ما تزعلها جان دائماً كلام بابا ميعجب احمد ويزعل على بابا واني لمن اشوفه يضوج اروح انطي العلاكه الي يشتريها الي ابويه وابوسه واروح اختل بحضن ابويه رجعت راسي على الحايط ورجعت اذكر لمن رحنه للزياره وضعت هناك اول ما لكوني امي اخذتني الحضنها وجانت شابعه بجي وبابا يبوس بيه واحمد جان يصيح عليه بس اني اعرف هوه هم خاف عليه بوكته
..اميره..عمة سماره جان وضعها يقهر حيل وسماره عزلت نفسها بزاويه وضلت صافنه لا تبجي ولا تتحرك وجهه سار اصفر وجوه عيونها سود نكرب كلبي البيت فرغ الكل راح ما بقت بس سماره وعمتها ونقهرت اكثر لمن محد ماحجه وياها واخذ بخاطرها لا بس اجتي الكل طلع وعافو البيت نكسر كلبي عليها كلت خلي اصيح عمر يدخل بلكي لمن تشوفه تتحسن باوعت على المره وكتلها رجل سماره واكف هناك راح اصيحه بلكي شويه يحسن من حالة سماره
..براحتج يمه ماكو احد غريب خلي يدخل
..رحت صحته كتله بو نمر تعالى ادخل ماكو احد بس سماره وعمتها وجهال ليش اضل واكف برى
..ماكو احد يعني داخل البيت
..اي ماكو تكدر تفوت تعال
..دخلت كلت السلام عليكم ردت مره جبيره السلام وستقبلتني باوعت على سماره حترك كلبي لمن شفت حالتها فعلاً الوضع البي هيا صعب حيل رحت كعدت يمها كتلها اذكر الله يابه كلنه بهاذا الطريق لا سوين هيج بروحج ادعيله الله يغفر له اذنوبه احسن ما تضلين هيج مو زين عليج يابه شوفي شلون صاير وجهج
..سماره..كمت اسمع حجي عمر التفتت عليه وكتله راح اخويه وراح ابويه وامي هم عمر ضليت وحدي ما كالو هاي العفناها المن الها اني شنو وجودي هسه ليش ما اروح يمهم اني المفروض اموت لان مراح اكدر اعيش بفراكهم ولله صعبب حيللل صعبب هاذا الشعور
..عمر..شلون صفيتي وحدج لعد اني مو رجلج اني وين رحت سماره ماريدج تحجين هيج مره ثانيه
..سماره..بس اني اريد امي عمر اريدها كتله تعرف لمن جنت اشتاقلها شسوي كتله لحضه رحت ركضت على الغرفه مالتي وجبتله شالها وقميص ابويه اشرتله عليهن كتله دشوف هذني مالت امي وابويه كل لحضه تمر واحن الهم احضنهن واضل اشتم عطرهم احجي وياهم واشكيلهم بس دائماً مجانو يجاوبوني رفعت اردان مال قميص ابويه وكتله اريده يمسح على راسي اذا ابجي اريدها يصبرني كل الي اريده بس هاذا الشي واعرف مراح يصير كعدت بالكاع كتلها بس اني مالي ذنب نحرمت منهم واني صغيره اني منحوسه اي صح اني مثل ما يكولون منحوسه كل شخص احبه يروح
