غرام وانتقام ( الجزء الاول )

البارت التاسع

          
( بيت ازل )

فاديه في المطبخ تحضر الفطور تاتي اليها ازل قائله : صباح الخير
فاديه : صباح النور ، ازل اني اسفه على الي صار البارحة جنت منهارة واعصابي تعبانه سامحيني
ازل : لا عادي قدرت ضرفج واني لحيت عليج زايد  واكيد راح يجي يوم وتكليلي السبب
فاديه : اليوم ارد اروح وياج لجامعة عدي صديقه اهناك موظفه ارد اشوفها
ازل : اوك تعالي

( في الجامعة )

سجاد وازل يجلسان في القاعه لكن كل شخص يجلس على حدى
فاديه جالسه في المكان التي توجد فيه الذكرى وقد جاء عادل اليها
عادل : فاديه سمعيني شكول ولا ترحين رجاءا
فاديه : اصلا اني جايه حتى تسولفلي
عادل : تعاي لمكتبي لعد
تدخل الى مكتبه الخاص ويقوم باغلاق الباب فاديه تقوم بضرب عادل كف قائله : ولك كل هلسنين وعبالي انته ميت ( ثم تقوم باحتضانه وتبكي )
عادل : جنت مجبور ازيف موتي حتى تعيشين وماردت يصير بيج شي والامن بوكتها اخذوا اخوتي و حتى اختي ورجلها
فاديه : ليش العيشه الي عشتها اني هم تسميها حياه يوميه قبل ما نام اطلع هداياك وصورتك وابوسها وابجي حتى زواج ما زوجت وشكد ضغطوا عليه اهلي بس لا ما زوجت منا لمن الامن اخذوا ابويه واخويه وشردت اني وامي وتاليها امي ماتت وضليت وحدي بلا معين
عادل : كل هذا الشي صار بسببي لذلك زيفت موتي حتى لا اذي ناس اكثر ورايه
ازل : وين جنت كل هلمده ؟
عادل : طلعت تهريب لسوريا وضليت هناك اشتغلت وبعدين انظميت للمعارضة وانتميت الهم ومن انتهى الغزو رجعت وشتريت شهاده من الخارج والحزب الي انتميتله خلاني رئيس قسم القانون
ازل : وزواج ؟
عادل : انتي جنتي تدرين بيه ميت ومازوجتي اشلون اني ادري بيج عايشه وازوج غيرج

( بيت سجاد )

ام ندى وندى تجلسان مع ام سجاد في البيت يتحدثن
ام سجاد : شيفيد الاعتذار بعد ياام ندى الولد سمعته ادمرت بلمنطقه وحتى من الشغل بطلوا
ام ندى : والله داداه هاي كدامج وحاجيها وهي بنتج مثل ما بنتي
ندى ( شاعره بذنب ) قائله : خاله ما تحملت وحتى من وافقت عناد بي بس ردت اشويه احرك مشاعره اتجاهي ماكو
ام سجاد : اني شكتلج من البداية مو كتلج سجاد ميريدج ويعتبرج مثل اخته كلت لو لا
ندى : كلتي خاله
ام سجاد : انتي شفتي اشلون حافظ عليج يكدر يكول لا هي جتني وابتلت عليه بس ما كدر لان ميريدلج الشر وميريد تجيج حجايه وبعد انتي انخطبتي وكلنه ازوجنه بدون حب بس بعدين حبينه من تزوجين وشوفين معامله زوجج الج زينه راح تحبي حتى اكثر من امج وابوج
ام ندى : داداه كليله لسجاد احنه اجينه واعتذرنه وخلي يسامحنه
ام سجاد : ماشي خيه

( في الجامعة )

مازالا عادل وفاديه يتحدثان في المكتب
عادل : من اتوفت امج وين رحتي بوكتها
فاديه : مرت عمي مارادتني طبعا وقررت اشغلني خدامه بلبيوت وفعلا شغلتني يم ناس اغنياء ويوم من الايام صاحبه البيت جان اكو خطار يمهم رجال ومرته رادوني اشتغل يمهم بلبيت بس كمربيه لبنتهم بعد ما دروا عن امانتي ومستوى تعليمي المهم وافقت وبعدها سافروا لخارج واخذوني وياهم لكن الام ماتت بمرض خبيث وضليت اني يم بتها الى ان كبرتها وعلمتها وهسه جاي اداوم هنا بكليه الإدارة والاقتصاد
عادل : ما شاء الله 

سجاد : ازل ازل
ازل : نعم سجاد
سجاد : شبيج شو اليوم مو على بعضج والبارحة اتصلت بيج مجاوبتي
ازل : البارحة جان عدنه ضيوف ومن راحوا كبل نمت بس مابيه شي
سجاد : شفت المكالمه الي كلتي عليها طولت ربع ساعه واحنه اقل حجينه تكدرين تكولين اشلون
ازل : انته ليش سويت هيج جان المفروض تحجي الحق وتخلص نفسك
سجاد : يعني سمعتي الحجي كله
ازل : اي سمعته كله وضجت منك وعليك بنفس الوقت ماجنت متوقعه انته هلكد ضعيف امام حقك من رحت تفتح الباب صار عدي فضول اشوف منو اجه ما غلقت الخط وسمعت كلشي
سجاد : حقج تكولين عني ضعيف بس بعد متعرفيني زين من رخصتج
ازل : سجاد مو قصدي بس
سجاد : لا ماصار شي عادي شكرا اخذت من وقتج 
يغادر مكسور الخاطر بعد رد قوي وعنيف من ازل

عادل : ما دام  اجتمعنا من جديد خل نزوج ونكمل باقي عمرنه سوية ونعيش حاضرنه ومستقبلنا
فاديه : اني حاليا ما اكدر مسئوله على بيت كبير ومااكدر اترك ازل وحدها لازم اكون بجانبها
عادل يلتمس وجه فاديه قائلا : وانتي شوكت تفكرين بنفسج اذا بعدج تفكرين بغيرج انطيني فرصه لنفسج وخلي نعيش جوا سكف واحد واني مستعد اليوم اروح اخطبج من عدهم
فاديه : اصبر خلي ارتب اموري ووضعي وبعدها نزوج
عادل : يعني اقتنعتي
فاديه : انته حبي الوحيد وعشق السنين ودموع الي بجيتها عليك لو باجيتها وحده غيري جان انعمت
عادل : معناها جنتي تبجين قليل
فاديه ( تضحك ) قائله : بعدك روحك مرحه فديتها
عادل : اني هذا الحجي الرومانسي ما تحمله وبعد هذا العمر ما اريد اضعف وارتكب ذنب
فاديه : اني وحسناتي فدوه لذنوبك
يقترب منها ويقبلها من راسها وخدها ( قليلين ادب )
فاديه : يالله اني لازم اروح اتاخرت
عادل : بعد وكت ماشبعت منج شوف زين انطيني رقمج حتى نتواصل
فاديه : اوك سجل

( في السوق )
سجاد يلتقي بعمهِ صادق في السوق
العم صادق : اليوم الشمس منين طالعه
سجاد : مثل كل مره من الشرق
العم صادق : اشو انته جيت من الجنوب
سجاد : اني بشر كائن حي اكل واشرب وانام واموت
العم صادق : امك اشلونها
سجاد : زينه الحمدلله ، اني جيتك بموضوع
العم صادق : اصلا لو جايني تسئل عليه بس أتفاجأ لازم مصلحه وياك كول شنو موضوعك
سجاد : اني حاليا دا اداوم بجامعه ومحتاج شغل ورا الدوام
العم صادق : ماشاءالله همزين طلع واحد من العشيره متعلم
سجاد : فااني محتاج شغل حتى اكدر ادرس
العم صادق : شوف اكو مندوب بشورجه هذا يبيع عطور مواد تجميل تاخذ منه بضاعه واصرفها على البيوت وكل ماتبيع قطعه الك سعر منها يعني كل ماتبيع اكثر فلوسك تكثر افتهمت
سجاد : اي افتهمت وشسمه هذا الرجال
العم صادق : ابو زيدون انسان حباب ويخاف الله من تروحله كله اني من طرف صادق البقال ويصير عمي هسه يعرفك ويشغلك لان الشغل كله واسطات صار
سجاد : ماشي عمي مشكور
العم صادق : سلملي على امك
سجاد : يوصل ان شاءالله

( بيت ازل )

تعود فاديه الى نشاطها وابتسامتها الدائمة وهي تحضر طعام العشاء تاتي اليها ازل قائله : اليوم راجعه ابتسامتج لازم اكو شي
فاديه : يعني مريت بحاله نفسيه وراحت
ازل : اي شنو هاي الحالة النفسية غير اعرف
فاديه : كل شي بوكته حلو
ازل : غير اضوج من هاي السالفة مال كلشي بوكته حلو اكوله وفضها
فاديه : تعاي كليلي الولد سجاد وياج يداوم
ازل : اي ويايه
فاديه : حجيتي ويا
ازل : يوميه احجي ويا بس اليوم كلتله كلام قاسي واخذ على خاطره
فاديه : ليش شصار
ازل : ورا العشه اسولفلج

( بيت سجاد )

الام : وشوكت ناوي تروحله لرجال
سجاد : باجر ورا الدوام اروحله واشوف
الام : الله يرزقك ويفتحه بوجهك 
يرن هاتف سجاد يرى هويه المتصل ( ازل تتصل بك ..)
لا يرد يقوم بوضع الهاتف صامت
الام : منو اتصل
سجاد : رساله من الشركة

( بيت ازل )

ازل : ميجاوب
فاديه : اي باجر اعتذريله عود وانتي غلطانه طبعا البنيه راد يحفظ سمعتها لا ضعف ولا جبن مرات الانسان يأخذ قرارات خاطئة في سبيل مصلحه غيره
ازل : واني شمدريني هيج وحدها طلعت من عدي
فاديه : وشغله لخ لاتتعمقين بعلاقتج وي سجاد خلي علاقتج سطحيه اليوم اصدقاء باجر حبيبين اصيرون
ازل : واذا صرنه حبيبين شكو بيها حرام يعني
فاديه : اني ما كلت حرام بس فكري لمستقبل ابوج يقبل وخصوصا هو وضع المادي تعبان
ازل : فاديه تدرين بيه اني اضوح من هاي التفرقه الطبقية واذا وضعه المادي تعبان يعني يبطل لا يحب ولا يزوج
فاديه : ازل افهميني اني عن نفسي مااعترض بس ابوج مراح يقبل ولا يقبل
ازل : بابا عمره ما دخل بحياتي وخصوصياتي
فاديه : بهيج موضوع راح يدخل اني ابوج اعرفه اكثر مما تعرفي انتي واكو شغلات جاهله عنها
ازل : شني الشغلات هاي
فاديه : شغلات قديمة واكبر من عمرج اذا تردين تعيشين مرتاحه خلي علاقتج وي سجاد سطحية

( في الجامعة )

تجلس ازل بجانب سجاد لكن سجاد يترك مكانه
ازل : هاي وين
سجاد يقترب منها هامسا قائلا : ما لازم تكعدين يم واحد ضعيف
بعد انتهاء المحاضرة تاتي ازل اتجاه سجاد غاضبه قائله : انته ليش تحجي ويايه بهاي الطريقة اني جيتك حتى اعتذر منك
سجاد : لان ظلمتيني واني مااحب احد يظلمني
ازل : من ظلمتك البنيه ما حجيت شي
سجاد : مو اكلج انتي كلشي متعرفين عني خاف حجيتلج على حياتي السابقة ترى عندي هواي اسرار ومشاكل ومامستعد احجيهن الج
ازل : البارحة اتصلت بيك اجاهلتني ليش
سجاد : جان عدنه ضيوف ومن راحوا شفت مكالمتج ونمت
ازل : صارت هيج يعني وحده بوحده
سجاد : مثل متعاملتي وياي اتعاملت وياج يا مدللله
ازل : اوك اسفه مره ثانيه
سجاد : اعتذارج مقبول

( هل تعلمون ان المشاحنات والمشاجرات بين الولد والبنت اذا كانوا اصدقاء فهي بداية لعلاقه حب وعلاقة حب متينه جدا )
ازل تغادر القاعة غاضبه

( في السوق )

سجاد يذهب الى ابو زيدون صاحب مبيعات التجميل والعطور يدخل الى المحل قائلا : السلام عليكم
ابو زيدون : وعليكم السلام اتفضل
سجاد :  اني من طرف صادق البقال يصير عمي وجيت على شغل
ابو زيدون : يااهلا وسهلا استريح ابني ، تعرف سوق سيارة
سجاد : لا والله ما اعرف بس دراجه اعرف اسوق
ابو زيدون : انته متفرغ الصبح
سجاد : لا اني طالب جامعي يعني اذا اكو شغله ورا الدوام عادي
ابو زيدون : ماشي ، وين بيتكم
سجاد : بيتنه *****
ابو زيدون : شوف انته من تخلص دوام تعال الي هنا انطيك بضاعه تفتر على البيوت والشقق يعني ادك الباب وتعرض بضاعتك الهم وايضا المحلات وكل قطعه تبيعها تنحسب نسبه الك لكن اجرك ثابت يعني انطيك بالأسبوع مئة الف اضافه للقطع الي تبيعهن نتحاسب عليهن بس لازم ادبرلك دراجه لان بدون وسيله نقل خاصه بيك راح تصرف هواي وساعات العمل بكيفك ليوين تريد اضل ضل يعني اني ابقى ل١١ بليل اهنا تريد قبل ال١١ تخلص شغلك وتجي عادي
سجاد : ان شاءالله ، شوكت اباشر
ابو زيدون : من توفر دراجه تعالي
سجاد : مشكور عمي انته نقذتني والله يكثر من امثالك
ابو زيدون : استغفر الله بلخدمه ابني

( بيت ازل )

ازل تتحدث مع فاديه قائله : يعني شفتي اشلون رد عليه واني جايته حتى اعتذر منه تالي رزلني بنزاكه
فاديه ( تضحك ) : اتحملي انتي جبتيها لروحج
ازل : اني اعلمه بسيطة باجر خل اشوفه واخذ حقي منه
فاديه : شسوين يعني
ازل : ما ادري بس لازم اسويله شي مااترك بدون عقاب

( بيت سجاد )

الام : ومنين راح تحصل دراجه
سجاد : ما ادري هسه حتى اذا ردت اخذ وحده بدين لازم ادفع قسط بلاول يالله  ينطيني
الام تذهب الى غرفتها وتجلب بعض النقود
سجاد : ذني شنو
الام : فلوس
سجاد : ادري فلوس بس المن
الام : ذني ضميتهن لإيام السودة وانته محتاجهن اخذهن اكضي حاجتك بيهن
سجاد : لا يمه خليهن يمج مااريدهن وبعدين انتي كلتي لإيام السودة ولسه ايام السودة ماجتي
الام : سجودي اخذهن واعتبرهن دين ومن يصير عدك رجعهن
سجاد : اني كلما اشوفج هيج تساعديني وتنطيني فلوس احس بالعجز
الام : لا عجز ولا شي فلوسي هنه فلوسك وبعدين اني المن ضامتهن الك قابل شسوي بيهن اخذهن واشتري دراجه والله يرزقك من ابوابه ان شاءالله
يأخذ المال من يدها ويقبل يد والدته

( في الجامعة )

ازل وسجاد يجلسان في القاعه لكن كل شخص على حدى ازل تنظر الى سجاد بنظرات غاضبه وحاده هذه النظرات هي نظرات حب وغضب وخوف وليس حقد هذه النظرات هي اجمل النظرات ما قبل العلاقة العاطفية  من خلالها تدخل هذه النظرات الى القلب وتبقى بذاكره لذلك جميع العاشقين والمحبين عندما يتكلمون مع بعضهم ينظرون الى عيون الحبيب ويتحدثون فلتدوم طويلا نظراتكم ايها العشاق 
بعد انتهاء المحاضرة يذهب سجاد الى ازل قائلا: يعني موهلدرجه تباوعين عليه بحقد وغضب  علكيفج على عيونج ليطلعن ليكدام
ازل : سجاد روح من يمي لا اخنكك
سجاد : اوه اوه اوه كم واحد خانكه قبل
ازل : انته اول واحد تحب جرب
سجاد يقترب منها وينظر إلى عينها قائلا : ياريت اقلها اموت واني اباوع لهلعيون الحلوه واحتمال اطب لجنه
ازل تصاب بالخجل وباحمرار وجنتيها قائله : وخر ارد اطلع
سجاد : اني طالع عدي شغل باجر اريد المحاضرات من عدج
ازل : ليش وين حتروح
سجاد : باجر من ندوام احجيلج كلشي
ازل : زين اتصل بيك بليل ونسولف يعني
سجاد : لا بليل ارجع تعبان وانام خليها باجر
ازل : اوك الله وياك
يغادر سجاد ثم تناديه ازل قائله : سجاد ؟
يلتفت اليها قائلا: نعم
ازل تقترب منه قائله : ديربالك على نفسك
سجاد يبتسم قائلا : ماشي

          نهاية البارت التاسع