غرام وانتقام ( الجزء الاول )

البارت الخامس

      

(بيت ندى)
تدق الباب تخرج الام قائله : منووو
الطارق : اني يمه فتحي الباب
ام ندى : مهودي ابني ياايمه جايتك
تذهب لفتح الباب  وتقوم بحظن ابنها وتقبيله وهو كذلك يفعل بالمثل
مهدي : ماجيت وحدي جبت صاحبي واخويه بلال من السماوه اليوم يبات يمنه
الام : يايمه كل الهلا بيك تفضل خاله والحمدلله على سلامتكم ربي يحرسكم من كل شر
بلال : الله يسلمج خاله
تلتقي ندى باخيها مهدي تقوم باحتضانه وتقبيله قائله : الحمدلله على  خويه نورت البيت
مهدي : الله يسلمج يا ورده البيت

(بيت سجاد )
ما زالت فاديه وازل يجلسان في البيت ويتحدثان
(الباب تطرق )
سجاد : من رخصتكم بس اشوف منو بلباب
فاديه : اخذ راحتك
يذهب سجاد ليفتح الباب ليرى الحاج عمر امام الباب
الحاج عمر : اشلونك وليدي سجاد عندي موضوع وياك ارد احجي بي
سجاد : اي حجي تعال طب
يدخل الى داخل البيت يلقي السلام على ازل وفاديه ثم يفقد توازنه اثناء المشي ويقوم سجاد بمسكه قائلا : عليكفك حجي خير شبيك
الحاج عمر يجلس قائلا : اريد مي
يذهب سجاد مسرعا ليجلب له الماء وسط ذهول ازل وفاديه يقوم بشرب الماء ويخرج الظرف من جيبه ويعطيه الى سجاد
سجاد يقوم بفتح الظرف ويخرج الرساله ويقرأها ومن بعدها يخرج الرصاصه
الحاج عمر : اجيت اودعكم راح اروح اكعد يم ابني
سجاد : ليش تروح هو البيت بيتك وانته من قدماء المنطقه مو بكيفهم
فاديه : ولو ادخل بالموضوع بس حجي ميصير تترك البيت اكو شرطه واكو قانون تكدر تخبرهم ويساعدوك
سجاد (ينظر اليها ) قائلا: شرطه وقانون ست فاديه احنه بدوله يحكمها قانون الغاب اتحدى اي شرطي يجي يمنع هذا الشي بسرعه ينقتل احسن حل نجتمع باهل المنطقه ونكللهم وناخذ حذرنه حتى لو اسلحنه المهم متطلع
الحاج عمر : لا وليدي مااريد احد يتاذى بسببي راح اخذ الحجيه واروح يم ابني واجفه الشر
سجاد : حجي انته بمثابه ابويه الله يرحمه واني مثل مشوف ماعدي احد غير امي اذا احتاجيتك وين الكاك
يقوم الحاج بوضع كف يده على خد سجاد قائلا : انته كبرت مو صغير وتكدر تحل مشاكلك واذا ضاكت عليك كلش تلاكيني يم ابني وانته تندل العنوان بعد يالله اني اترخص اشوفكم بخير

(بيت ندى)
يجلس مهدي مع صديقه بلال يشربان الشاي ويتبادلان الحديث
بلال : خطيه مظفر ضل بلواجب مانزل
مهدي : مو عساس الاامر كله انزل
بلال : لا يخوي وين ينزل المن ضل اله قتلوا كل اهله والله شنو لان يداوم بجيش وهذا الجيش جيش امريكا مو العراق
مهدي : يااخي هسه الي ديقتلك منك وبيك وابن بلدك لا وفوكاها يراسهم واحد من غير دوله وينطيهم اوامر وهمه ينفذون
بلال : والله يااخويه مدري اشلون راح تصفه
مهدي : ربك كريم يجي يوم وتنحل كل مشاكلنه

(بيت ازل )
بعد عودتهم من بيت سجاد التقت ازل بوالدها الذي كان موجودا في البيت
ازل : هلو بابا شو جاي من وكت مو عساس بليل تجي
الاب : شنو تريدني ارجع
ازل (ضاحكه): لا وين ترجع بس اكول يعني كلت اتاخر
الاب : اي مو الناس الي جنت منتظرهم مااجوا فكلت خلي ارجع للبيت ارتاح ، اي شلونه السوك
ازل : الصراحه بابا مو مثل ماجنه بلندن يختلف كلش
الاب : يعني اشلون يختلف؟
ازل : الناس الي موجوده بي كلهم فقره او تحت خط الفقر ناس تدفع عرباين وناس جنبر عدها
الاب : وشلون عرفتي جنبر
ازل : فاديه كلتلي بيهن كلساع اسئلها هاي شنو وهاي شنو
الاب : لعد ضلي طلعي على طول وياها واتعودي وعرفي الاماكن لان احنه باقين اهنا مراح نرجع
ازل : ان شاءالله ، بس من رجعنه من السوك مرينه على بيت سجاد
الاب : ياسجاد ؟
ازل : سجاد الولد الي اجه للحفله البارحه الي تعرفه فاديه
الاب : اهااا اي ذكرته ذكرته شبي
ازل : مابي شي بس خطيه جوارينهم رجال جبير هددو يترك بيته
الاب : يالله اني اروح ارتاح
ازل : اوك بابا
يذهب الاب الى غرفه فاديه يطرق الباب
فاديه : اتفضل
يدخل عليها الاب
فاديه : خير ابو ازل محتاج شي
الاب : اليوم شعندج رحتي لهذا الولد الي اجه البارحه للبيت
فاديه : هيج رحت اطمئن عليه اشوفه وصل لا
الاب : اهاا يعني ماحنيتي لأصلج
فاديه : ابو ازل اصلي معروف وافتخر بي ويزيدني شرف اني انولدت وعشت بمنطقه شعبيه فقيره لان ناسهم كلوبهم صافيه مابيها غش وخداع
الاب : اذا ردتي تروحين مره لخ لاتاخذين ازل وياج مااريد يصير بيها مرض او تلوث من عدهم
فاديه : انته شنو هذا الحقد للناس البسطاء شتريد منهم
الاب: اريد اعرف همه شكو عايشين لا همه الي متونسين بعيشتهم ومتنعمين ولا همه الي ميتين وخلصانين واكثر الجرائم من عدهم وتعرفين اشلون ماتت ام ازل
فاديه : اي اعرف ماتت بسببك مو بسببهم لو ماخاينها جان ماطلعت بذاك الليل ونقتلت
الاب : ليش من شوكت هي جانت قايمه بواجبي على حسب الاصول كزوجه اتجاه زوجها
فاديه : من مات اخوها مرت بحاله نفسيه وجان المفروض منك تبقى يمها وداريها مو تتركها ومترجع غير لليل وتلكاها نايمه
الاب : يعني صوجي اني عيشتكم بهذا العز وهاي الفلوس والاملاك
فاديه : مرتك وبنتك اغلى من كنوز الدنيا كلها الفلوس تروح وتجي بس الانسان اذا راح ميرجع
الاب : اخر الكلام ازل بعد لا توديها لهيج اماكن افتهمتي
فاديه : حاضر مثل متريد
( بعد مرور اسبوع )
(بيت ندى )
تجلس ندى مع امها واخيها ووالدها يتحدثون
مهدي : اني اليوم جمعتكم على موضوع ندى
الام : شبيها ندى ؟
مهدي : بلال يريد يزوج ويريد يناسبني وطلب ايد ندى مني
الاب : والله الولد امانه خوش رجال وزلمه حوك ابين عليه
مهدي : اي يابه زلمه معدل ونيالها لندى علي اذا وافقت
الام : طبعا توافق ليش شعدها قابل دراسه شغله عمله
مهدي : ها خيتي شكلتي
ندى : شكول اشو ماشاءالله اخذتوا قراراكم ليكدام وكانما ماموجوده وكاعده بنصكم
مهدي : لا ندوشه تدرين بيه اغلى شي عندي انتي تكدرين تفكرين على راحتج والولد مامستعجل يعني شوكت مافكرين وتردين الجواب احاجي حتى اذا رفضتي فصدكي مراح ازعل ولا شي
الام : لا شكو رافضه
ندى : ان شاءالله خويه افكر وارجعلك الجواب

سجاد في عمله ووالدته في البيت أيضا تعمل وجميع الامور على مايرام ومابقى شي على الدوام في الجامعة سوى اسبوع واحد
(بيت سجاد)
سجاد : يالله يمه بدلي خلي نطلع نتعشه برا
الام : وين برا ناكل بلبيت ونسكت
سجاد : يمه كومي خلي نطلع ونغير جو ونشوفنه مطعم مرتب ناكل بي اعتبري عشه رومانسي اني وياج
الام (ضاحكه) : والله عدك سوالف وشبدل هي بس دشداشه اغيرها والبس عباتي
سجاد : مو مهم شتلبسين لبسي المهم نطلع سوا
سجاد ووالدته يمشون وسط الكراده ويقفون عند مطعم فخم
سجاد : يالله يمه انطب اهنا
الام : سوجي يمه خاف غالي هذا
سجاد : عادي شايل فلوس
الام : خلي نروح ناكل فلافل مو احسن
سجاد : يمه يافلافل تعاي خلي نطب
يدخلون الى المطعم ويجلسان على الطاوله والدته تنظر يمينا وشمالا وترى وجود عوائل مع اولادهم وفتيات شابات يجلسن بجوارهم
الام : يمه شو داحس روحي مامرتاحه ومامتعود اطب لهيج اماكن
سجاد : ماكو شي يمه باعيهم بشر حالنا حالهم
ياتي النادل وبيده ورقه قائلا : السلام عليكم شتحبون تاكلون
سجاد : وعليكم السلام ، يمه شتاكلين
الام : بكيفك يمه
سجاد : جيبلنه نفر كباب ونفر تكه
الام : مو هواي
سجاد : يمه خلناكل باجر ميتين وياكلنه الدود ويشبع بينه
في الطاوله المجاوره لهما يجلسن ثلاث فتيات شابات ينظرنه الى سجاد ووالدته ويهمسنه فيما بينهن
ياتي النادل جالبا الاكل ويبداان بلاكل واثناء تناول الطعام والدته توقع من فمها لقمه فاذا بلبنات يضحكن وينضرنه نحوهما تشعر والدته بلاحراج فيقوم سجاد بااخذ منديل ويمسح فم والدته ويرفع بقايا الاكل من الطاوله وياكلها وبعدها ينهض قائلا: يمه هسه اجيج  يذهب نحو الفتيات قائلا : مرحبا صبايا
الفتيات : مراحب
سجاد : ممكن اعرف ليش تباوعن علينه وضحكن شنو كدامجن قرقوز ( قرقوز يعني مهرج )
احدى الفتيات : لا العفو اسأت الفهم
في هذه الاثناء تحضر ازل وتاتي من خلف سجاد قائله : ها بنات خو ماتاخرت
يلتفت سجاد نحوها قائلا : ازل
ازل : سجاد شعندك اهنا
سجاد : هااا جبت امي حتى نتعشه سوا
ازل : اهاا وينها
سجاد : ذيج كاعده
ازل : اروح اسلم عليها
تذهب نحو ام سجاد قائله : مرحبا خاله اشلونج
ام سجاد : هلا ابنيتي ازل ( يتبادلن القبل) كعدي يمه
ازل : لا خاله صديقاتي منتظراتني ، سجاد
سجاد : هاا
ازل : شعدك يم صديقاتي واكف
سجاد : لا هيج ماكو شي
ازل : اوك مابقه شي على الدوام نلتقي ان شاءالله
سجاد : ان شاءالله
تقوم ازل بمد يدها لتصافحه سجاد يبادلها وينظر في عينيها وتذهب
الام : شو احسك مرتبك يمه وجهك اصفر احمر بس يااخوفي انعجبت بالابنيه
سجاد : اكو هيج شي يعني
الام : سجاد ديربالك ترى تنصدم صدمه عمرك البنيه مدللله وهل وحده لابوها وهي بت ناس اكابر والمثل يكول ( كلمن يمد رجلي على كد غطاء )
سجاد : يمه هسه قابل صاير شي بينه حتى تحجين هيج
الام : هسه مصاير يس باجر يصير
سجاد : لا يمه ميصير هي وين واني وين
الام : يالله كوم ترى اني تعبت ونعست
سجاد : ماشي
ازل تجلس مع صديقاتها
احدى الصديقات : ذوله شمعرفج بيهم
ازل : معرفه عن طريق الصدفة يعني
احد الصديقات : بس موتونه ضحك
ازل : ليش صار
احدى الصديقات : يعني شكلهم مومال هيج اماكن راقيه او شي
احدى الصديقات : ولو امه شفتيها شلون تاكل بشراهه حتى بعد متلحك كام الاكل يوكع من حلكها ( ويضحكن)
ازل تتعصب من كلامهن قائله : كافي اولا انتوا متعرفوهم شنو ظروفهم
ثانيا : هاي الام هي مثال للام العراقيه الاصيله ضحت بشبابها حتى تربي ابنها وماازوجت واشتغلت خياطه حتى تعيش ابنها
ثالثا : الولد هذا هو رجال ورجال بمعنى الكلمه الي ماعجبجن رغم كل ظروفه الصعبه كدر يشتغل ويدرس الى ان كمل سادس ونجح وراح يداوم جامعه وويايه هم وبنفس القسم ولحد الان يشتغل هو ويتعب علمود امه ومستقبله
رابعا : اني ميشرفني اصادقجن لان ماعدجن انسانيه ولا احساس ولا ضمير حالجن حال الحيوانات يمكن لو اني فقيره ومن غير بيئه جان ولا صادقتني ولاوحجيتن ويايه علموم اني رايحه باي

اقذر شخص في الكون الذي يفرق بين الاشخاص من حيث مكانته بلمجتمع او موقعه الجغرافي او الطبقي
فالله عزوجل خلق جميع البشر متساوون ولا فرق يينهم الا بلتقوى
فشخص الذي تراه في السوق يعمل ومازال شاب ولم يكمل دراسته هذه الظروف التي جعلته هكذا
اما الشخص الذي تراه موظفا بسيطا في احدى دوائر الدوله هذا شخص تعب واجتهد في دراسته ولكنه ليس غني وانما غني بمعلوماته واخلاقه ونفسه
اما الشخص الذي تراه مجنونا يمشي في الشارع وحوله اطفال يركضون وراه ويضربوه هذا الشخص كان عاقلا متكاملا حتى اصيب بصدمه نفسيه جعلته على ماهو عليه
اما الشخص الذي تراه يلبس اغلى الماركات ويضع افخم العطور ويمشي بتكبر وفخامه اقترب منه وحاوره سوف تجده فارغ العقل ولا يملك اي معلومات
اما الشخص الذي تراه ثيابه قديمه ومتهالكه هذا الشخص فقير لكنه غني النفس والضمير
( حاولوا التقرب من الناس البسطاء فانهم اقوى الأقوياء لمواجهة التحديات في الحياة )

       نهاية البارت الخامس