غرام وانتقام ( الجزء الاول )

البارت الرابع

                     
خرج من البيت متوجها للبحث عن والدته وفي الطريق يلتقي بلحاج عمر
الحاج عمر : ها وينك انته من البارحة مختفي وامك نايمه بالمستشفى
سجاد : امي بالمستشفى شعدها
الحاج عمر : طلع اكو واحد شهيد واسمه سجاد وحسباله انته واغُمى عليها
سجاد : امشي لعد بسرعه
يذهبان الى المشفى ويدخل الى الغرفة التي ترقد بها والدته يرمي بنفسه على سريرها يمسك يدها يقبلها ويقبل راسها ودموعه تتساقط من عينيه قائلا : يمه كعدي اني اجيت مابيه شي والله اسف لان البارحة عفتج بس غصب عني فتحي عيونج وشوفيني
الحاج عمر : الدكتور كال ما بيها شي بس صدمه وترجع لوعيها
سجاد : هسه اني شوداني ورحت
الحاج عمر : ليش وين رحت
سجاد : سالفه طويله من تكعد امي احجيلكم
(هاتف الحاج عمر يرن)
الحاج عمر: هذا ابو انور يتصل 
سجاد : جاوبه
الحاج عمر : وعليكم السلام ابو انور _ اي موجود بس والدته بالمستشفى تعبانه شويه _لا رحمه الله والديك متقصر ، سلام
سجاد : شكالك
الحاج عمر : سئل عليك كال شو ماكو وجهازه لسه مغلق كتله والدته بالمستشفى
سجاد : بديت اشك هذا الشغل فكر عليه ماصارلي يومين اشتغل وكلساع واكع بمشكله
الحاج عمر : هذا امتحان من الله عز وجل اصبر على رزقك
تصحى والدته من الغيبوبة قائله : سجودي يمه وينك
سجاد : هاايمه يمج اني شوفيني صاحي وسليم (ويقبل يدها)
الام :  لا انته مو ابني جذب
سجاد : يمه هذا اني شوفيني
الام : شو تعال خلي اشمك
يقترب سجاد الى حضنها وتقوم والدته بشمه قائله : اي والله هذا انته يابعد روحي ياسوجي وين جنت وموتتني من الخوف عليك
سجاد : يمه من نرجع للبيت اكلج ( ويقوم بتقبيلها من راسها)

( في بيت ازل )
تدخل فاديه الى غرفتها لتوقظها تقوم بفتح الستائر ثم تقترب من سريريها قائله : ازل كومي كافي نوم صار الظهر
ازل تتقلب في فراشها الناعم وذات وسائد من الريش
فاديه : ازل كومي كافي ورانه طلعه للسوك العصر يالله
تفتح عينيها ازل قائله : بس اشويه حبابه
فاديه : راح احضر الج الاكل اجي الكاج صاحيه والا اذب عليج مي مثل ذيج المره
تفز من سريرها قائله : لا لا كايمه كايمه كلشي ولا المي
(ازل : فتاه شابه تبلغ من العمر ٢٠ عاما كانت تسكن في الخارج مع والديها وبعد احتلال العراق عادوا الى العراق والدها مستثمر والديه شركه تجاره وبعض المحال والبيوت بلاضافه الى ارض زراعيه وهي وحيده لا يوجد لديها اخ او اخت والدتها توفت اثر اصابتها بمرض خبيث فارقت الحياه على اثره )

(بيت سجاد)
يدخل سجاد ووالدته الى بيتهم قائلا : نورت البيت ياشمعه البيت ارتاحي وكلشي لاسوين اروح اصيح ندى تجي يمج
الام : ابو شغل حاجاك لا
سجاد : اي يمه حاجاني وكلي لاتطلع اليوم ضل يم امك باجر اطلع

(بيت ازل )
ازل جالسه تأكل  في المطبخ وفي جوارها تعمل فاديه قائله : الولد راح ( مخاطبه فاديه)
فاديه : اي راح من الصبح توفيق وصله
ازل : شعجب اعتنيتي بي هلكد وانتي متعرفي
تاتي فاديه وتجلس امامها قائله : هذا الولد غلط ويانه بالحساب واخذ ميه الف زايده من حس بالغلط اجه رجعهن واني ماقبلت كتله حلال عليك وابين انسان فقير وحباب
ازل : اي
فاديه : تدرين شغله سجاد راح يدرس وياج بنفس الكلية وبنفس الجامعة
ازل : لا اشلون
فاديه : اي طلع قبوله اداره واقتصاد وجامعة بغداد
ازل : يعني راح يداوم ويايه
فاديه : اي يداوم وياج

(بيت سجاد)
تدخل ندى على ام سجاد قائله : سلامتج خاله مشوفين شر
ام سجاد : الله يسلمج بنيتي
ندى : ماكلت انته وين جنت البارحة
سجاد : الله الله لو ينعاد السيناريو مال البارحة فدشي
ندى : سجاد شكاعد تخربط
سجاد : شفتلج ابنيه ولا كل البنات شنو جمال شنو نزاكه شنو كياته تنكط عسل
ندى ( مخاطبه ام سجاد): خاله شديحجي
ام سجاد : معليج بي البارحة جان يم ناس اكابر غلط وياهم بحساب ورجعه وضل يمهم
سجاد : لا يمه ماضليت يمهم همه جلبوا بيه
ندى : وعلى شنو جلبوا بيك على جمالك يامهند
سجاد : اهووو هسه انتي شلج علاقه حاشره روحج بكلشي
ندى : خلف الله عليك البارحة كلبنه الدنيا وضليت افرفر وراك وانته حضرتك طلعت ملتهي وي هاي الي تنكط نزاكه
سجاد (ضاحكا): ليش اشلون اني اكدر استغني عليج يامحاميه العائلة
ندى (فرحه): صدك سوجي !
سجاد : اي غير اختي انتي
ندى (تعبس وجهها): ياريتني ماكتلك صدك
سجاد : للمرة المليون اكلج وهاي كدام امي انتي خوش ابنيه وحلوه وحبابه وشباب المنطقة كلها تتمناج لحد الان شكد اجوج خطابه وانتي ترفضين ياندوش ياعيني انتي مثل اختي وهذا الوهم والخيال الي عايشه بي بطلي
ندى : سجاد مو محله هذا الحجي هسه ليش تجرحني بكلامك
سجاد : اجرحج هسه حتى بعدين متنصدمين شفت وحده وعجبتني وحبيبتها وزوجتها انتي شنو موفقج راح يصير اصحي على زمانج واعتبريني اخوج لان صدكي حتلوا لو عندي اخت فمراح اعزها واحبها اكثر منج
بعد هذا الكلام ندى تبكي وتخرج من البيت
الام : ليش هيج حاجيت البنيه مو خطيه
سجاد : يمه متفتهم اكلها هيج تكلي هيج شنو مجبور احبها واخذها
الام : لو تلف بنات الدنيا كلها مراح تلكه وحده تحبك وتصونك مثل ندى وهذا الحجي خلي ترجيه بأذانك
سجاد : اي انتي هم صيري وياها واتفقن عليه
الام : لا ميحتاج اتفق بس الي داشوفه البنيه تحبك كلش وحرامات ضيع من يدك
سجاد : خلي ضيع اساسا هو شكو بيدي حتى ميضيع اني نفسيتي ضايع خلص يمه هذا الموضوع لتحجين بي ابد
الام : خلي انام
سجاد : متأكلين لعد
الام : ليش انته تعرف اتسوي اكل
سجاد : هسه راح اسوي طماطه وبيض تاكلين اصابيعج وراها
الام : لا مااريد ما اشتهي اكل انته
سجاد : هاي شبيج يمه
الام : مابيه شي اريد انام بس
سجاد : ماشي نامي
(بيت ندى )
ندى في غرفتها تبكي تدخل عليها والدتها قائله : شبيج تبجين
ندى : سجاد
ام ندى : شبي
ندى : كدام امه كلي انتي مثل اختي يعني مراح يزوجني وانتي خوش ابنيه وحبابه وهواي يجوج خطابه معناها يكلي وافقي
ام ندى : اريد افتهم انتي ليش متعلقه بي لهدرجه ياماما عوفي خلص ديكلج اني ما ريدج
ندى : شنو ميريدني اني احبه يمه احبه مو بيدي
ام ندى : حبتج حيه انتي ويا
ندى : وبعدين السحر الي سوينا مجاب نتيجة كلتي ثلاثة ايام ويشتغل وهذا ثلاثة ايام طكها بوجهي وكلي مااريدج
ام ندى : ممعقوله المراه شغلها مضبوط اكيد مسويه غلط انتي بالعمل
ندى : لا ممسوي غلط كل كلمه كالتها سويتها هسه صدكت انو السحر جذب بجذب بس يضحكون على عقولنه ونصدك احنه
ام ندى : نداوي بنتي خلص انهي موضوع سجاد عيشي حياتج ازوجي وهواي ناس مشتريج ورايديج
ندى : اهووو رجعنه لنفس سالفه صادق
ام ندى : اي نفس السالفة الولد متمكن وعنده شقه وشغله خير من الله وبلكي من تزوجين ياخذج ويسافر وتعيشين هناك احسن مما تاخذيلج واحد يعيشج بفكر وجوع
ندى : زواج ماازوج افتهمتي لا سجاد ولا غيره خلص قفلت الموضوع
ام ندى ( تغير نبره صوتها): اسمعي صبرت عليج هواي وحق لا اله الا الله يجي اخوج واكله على كل سوالفج يااما تخلين عقلج براسج وهواي بنات ازوجن بدون حب وبعدين حبن وخلفن ويالله كومي سوي غده بسرعه كومي

(بيت الحاج عمر)
شخصان يركبان على دراجه ناريه يضعان ضرف امام الباب ويدقان الباب قويا ويغادران يخرج الحاج عمر من البيت  ينظر يمنيا ويسارا لا يرى احد فيرى على الارض وجود ظرف فيقوم بفتحه فيخرج منه رصاصه ورساله مكتوب فيها ( اطلع من البيت قبل لا يوصلك السره )

(في شركه اب ازل )
اب ازل يتكلم بالهاتف مع ابنته قائلا : هااا بابا طلعتوا
ازل : اي بابا وانته شوكت ترجع من الشركة
اب ازل : اجي لليل
ازل : اوكي احبك يااغلى انسان على قلبي
اب ازل : واني هم احبج يااميرتي ، ديربالج على نفسج ،باي
يستمر بكلام بعد اغلاق الهاتف قائلا : تدري ياامحمد عندي بنتي كلشي بدنيا هاي الشركة واملاكي متسوى خصله شعر وحده من بنتي وضحكتها
محمد : الله يخليها الك ويحفظها وشوف جهال جهالها

(بيت سجاد )
سجاد ووالدته نائمان تدق الباب مره مرتان ثلاث اربع خمسه بعدها يستيقظ قائلا : يعني شنو هلازعاج واحد يريد ينام يرتاح يعني ماكو راحه بهلبلد ابد
يخرج ليفتح الباب وهو يرتدي شورت وفانيله مثقوبه وسط البطن ( يعني مزروفه)
فاذا به يتفاجأ بوجود فاديه وازل يقفان امام الباب
سجاد (مرتبكا): اااا اهلا وسهلا بس ثواني واجي
ازل تضحك وتحني راسها قائلا : هذا شلابس
فاديه : بس عيب
سجاد يوقظ والدته : يمه يمه كومي اجونا خطار
الام تستيقظ : خطاريش يمه
سجاد : الناس الي سولفتلج عليهم
يقوم سجاد بتغير ملابسه وبعدها يذهب اليهم ويدعوهم للدخول : اتفضلوا اتفضلوا
فاديه : جنت نايم
سجاد : اي والله شويه تعبان وكلت خل ارتاح
يدخلان الى داخل المنزل تستقبلهم الام قائله : ياهلا ومرحبا زارتنه البركة ( وتقوم بتقبيلهن )
سجاد : سجاد ششربون
فاديه : لا لا زحم نفسك شاربين وماكلين واصلا جينه نشوف والدتك سمعنه عنها مريضه
سجاد : منين ؟
فاديه : جنا نازلين للسوك اني وازل وكلت خلي نمر عليك لمكان شغلك فامالكيناك وابو الشغل كال والدته مريضه وبقه يمها بلبيت وطبعا توفيق وصلنه الى هنا
سجاد : شكرا لجيتكم واني ممنون منكم هواي
فاديه : اي خاله اشلونج هسه ان شاءالله بخير
الام : بخير بنتي الحمدلله اشويه انهبطت من سجاد ضل يمكم واني مامتعوده غيابه عليه هلكد
فاديه : حقج خاله هو راد يروح بس اني جبرته يضل
الام : الحمدلله على كل حال
ازل : سجاد صدك مقبول اداره واقتصاد جامعة بغداد
سجاد : هاا اي انقبلت
ازل : يعني ويايه راح اداوم
سجاد : ليش انتي هم ادراه واقتصاد
ازل : اي واني الي ردتها حتى اساعد بابا بلشركه
سجاد : خير ان شاءالله
ازل : اذا تحب اكل لبابا يشوفلك شغله بشركه
سجاد : لا شكرا ازل شغلي مرتاح بي وناس زينين

لأول مره يتكلم معها متلبك وخائف ودقات قلبه تتسارع وينظر اليها بخجل وهي جالسه امامه في بيته المتواضع والمتهالك لم يكن يتوقع قدومهم بظنه ان قصتهم انتهت مجرد صدفه واجتمعوا وتفرقوا في النهاية الا ان القصة قد بدات الان

              نهاية البارت الرابع