غرام وانتقام ( الجزء الاول )

البارت العاشر

     
( في السوق )
يدخل سجاد الى محل ابو زيدون قائلا : السلام عليكم اشلونك عمي
ابو زيدون : هلو سجاد ها حصلت دراجه
سجاد : اي حصلت شوكت اباشر بالشغل
ابو زيدون : اليوم ارتاح وباجر ب٣ انته يمي
سجاد : ماشي ، سلام

( في الشركة )
اب ازل واحمد يتحدثان
احمد : صرفتلك نص البضاعة والنص الثاني خليته بالمخازن
اب ازل : ليش النص ثاني ضميته
احمد : عمي حتى ذا صار طلب عليه من التجار نرفع شويه من السعر وبهذا قيمه الربح تعلى
اب ازل : يعني مثل الاحتكار قصدك
احمد : يعني تكدر اسمي هيج لان البضاعة الي اشتريتها ما موجوده عند اي احد ونوعيتها زينه
اب ازل : احمد اذا اشتغلت ويايه راح انطيك راتب ضعف الي ينطكيا والدك واحتمال انطيك منصب بالشركة لان محتاجك اني كلش
احمد : عمي اني بخدمتك بكل وقت بس ابويه ما اكدر اتركه وحده بشركه وبعدين الشركة الي حصه بيها اذا اشتغلت وياك لازم اتنازل عن حصتي واني ما اعرف شراح يصير بالمستقبل
اب ازل : اي مثل متريد بس شنو تحتاج تعالي
احمد : ان شاءالله عمي

( بيت سجاد )
الام : هاي يمه شو راجع من وكت
سجاد : رحت لبو الشغل الجديد عساس اشتغل اليوم كلي على باجر اطلع
الام : ودراجه زينه الي اخذتها
سجاد : اي يمه زينه وهذا باقي الفلوس
الام : خليهن يمك تحتاجهن بعدين
سجاد : يمه جوعان
الام : يتخسى الجوع روح غير ملابسك وهسه اصبلك الغده 
اثناء الغداء تدق الباب ينهض سجاد لفتحها ليرى ندى واقفه امام الباب
ندى : اشلونك سجاد
سجاد : ابوج يدري بيج جايه لهنا
ندى : لا اصلا حتى طلعه ميخليني اطلع
سجاد : لعد وين راح
ندى : راح للنجف ابو صديق مات
سجاد : وشعندج جايه خير
ندى : امي سوت دولمة ودزتلكم هذا الماعون
سجاد : خاف حاطه بي سم
ندى : اني اسفه ذاك اليوم فقدت اعصابي ومدري شصار بيه
سجاد : انتي ما فقدتي اعصابج انتي فقدتي اخلاقج وفقدتي الحب الي بداخلي الج اخذي الماعون ورجعي للبيت عدنه اكل منحتاج
ندى : سجاد بس ...
يغلق الباب في وجهها ثم يدخل الى البيت
الام : منو اجه
سجاد : ندى جايبه ماعون دولمة
الام : وينه لعد
سجاد : منو
الام : ماعون الدولمة
سجاد : اجه مكدي خطيه وانطتهيا محتاجه اكثر منه
الام : بارك الله بيك وليدي
( يصبح القلب قاسي عندما يموت الحب وتنطفئ المشاعر ويصبح القلب بارد المشاعر اتجاه المحب )

( بيت ندى )
ام ندى : شو رجعتي الماعون
ندى ( بكسر خاطر ) قائله : طلعلي سجاد ومااخذه وسد الباب بوجهي
ام ندى : تستاهلين
ندى تضع الصحن على المائدة وتذهب الى غرفتها باكيه

( بيت ازل )
فاديه تتحدث مع عادل في الهاتف قائله : اي ياحبيبي وين اجي وشوفني
عادل : يعني متكدرين تطلعين من البيت ونلتقي فد مكان
فاديه : اني بودي بس ما اكدر اترك البيت وبعدين ما اريد ازل وابوها يحسون علينه
عادل : وشنو يعني خلي يدرون اني احبج وانتي تحبيني وشكد عانينه يالله انجمعنه تريدين اجيج هسه للبيت واكف بنصهم واكلهم هاي البنيه مالتي
فاديه ( تضحك ) قائله : علكيفك روميو الرجال عده حرس وكلهم مسلحين
عادل : اني هم عدي حرس ومسلحين واشعلها حرب العالمية ثالثه واسميها حرب العشاق المعذبين في غياهب البيوت
فاديه ( تضحك ): بس عاد كافي بليل اتصل بيك ارد اسوي غده راح تجي ازل وابوها
عادل : زين بس يوم ذكريني فد اكله من اديج صارلي سنيين ماماكل من اديج
فاديه : خلص باجر راح اجي للكلية واجيبلك اكل ويايه
عادل : لعد ما راح اكل منا لباجر
فاديه : يالله مع سلامه ديربالك على نفسك
بعد الانتهاء من الاتصال فاديه تقبل سماعه الهاتف وتضعها على قلبها

( في الجامعة )
ازل وسجاد يتحدثان
سجاد : شعدها فاديه جايه وياج اليوم
ازل : عدها صديقه تجي شوفها
سجاد : اهاا جيد
ازل : اي سولفلي لاتغير موضوع
سجاد : شسولف ؟
ازل : سولفلي بلبدايه عن هاي البنيه الي تهمتك وبعدين على البارحة الي طلعت من كلت عدي شغل
سجاد : البنية اسمها ندى جيرانه و ربينه سوا وصاحبة وكفات يعني زلم متلحكها بوكفاتها
ويبدا بالكلام عن ندى وصفاتها ويشرح لها عنها

فاديه : صباح الخير يا نظر عين
عادل : صباح النور يوجه السرور
فاديه : هذا ريوك جبته الك واني مااكلت كلت خل ناكل سوا
عادل : يعني نعيد امجاد الماضي من جنتي زعلين عليه وماترضين الا بماعون كيمر وكاهي
فاديه ( تضحك ) : لسه تذكر
عادل : اني ما نسيت شي حتى اذكر كل ايامنه الي عشناها محفورة بذاكرتي
فاديه : اني اليوم راح احجي للأزل عن علاقتنه واشوف رده فعلها وراها اكول لبوها
عادل : ايييييي واخيرا
فاديه : مااريد بعد اعيش باقي العمر من دونك اريدك يمي وبحضني
عادل يلتمس وجهها ويلعب بشعرها قائلا : واني هم ما اريد اكضي باقي العمر بعيد عن عيونج
عيناهما تبدا بالاحمرار ويقتربان محاولة لتقبيل بعضهما ( قليلين ادب )
لكن تُدق الباب عليهما
عادل : هذا الي دك الباب المفروض افصله من الوظيفة
فاديه ( تبتسم بخجل ) قائله : كوم افتح الباب

ازل : اذا هلكد تحبك ليش ماحبيتها خطية
سجاد : ماعندي مشاعر حب اتجاهه يعني فرضا كولي ازوجتها ورا الزواج شفت وحده عجبتني وحبيتها شسوي بهاي الحاله اني
وبعدين هي مامتعلمه ابتدائيه مامخلصه اشلون اكدر اتفاهم وياها وهي ماعدها معرفه معلوماتها على كد حالها
ازل : اوك اذا هيج انته احساسك اتجاهه خوش سويت

( في السوق )
ابو زيدون مخاطبا سجاد قائلا : هاك هاي البضاعة والله يرزقك
سجاد : شكرا عمي
يذهب سجاد الى بيع البضاعة وسط المناطق ويبدا بدق الابواب
لم يكن يومه الأول في البيع جيد فقد باع فقط خمسة قطع مما سبب له احراج وعاد الى المحل متاخرا في الليل يتملكه حزن وخيبه امل
ابو زيدون : ها عمي اشلونه الشغل وياك اول يوم
سجاد : عمي مابعت هواي بس خمس قطع
ابو زيدون : عادي لان اول اول يوم ولتنسه انته دتطلع ورا الظهر اكو جماعه يطلعون الصبح وميبيعون شي
سجاد : يصير بايام العطل اطلع الصبح والعصر لو لا
ابو زيدون : سجاد اني سئلت عنك وكلولي ضروفك صعبه كلش لذلك راح اقدملك عرض اذا بعتلي بليوم من ٢٠ قطعه الى ٥٠ قطعه راح اشغلك هنا بلمكتب واعلمك الشغل
سجاد : بس اشلون ابيع هلكد كميه ؟
ابو زيدون : هاي عليك تعتمد انته وشطارتك
سجاد : ماشي عمي

( بيت ازل )
فاديه تدخل الى غرفه ازل تراه تقرا
ازل : ها فاديه
فاديه : عبالي ماعندج شي ردت احجي وياج
ازل : لا ماعندي اصلا خلصت تعاي كعدي
فاديه : تذكرين الفتره الي مريت بيها والحالة النفسية الي صارتلي وبوكتها صيحت عليج وطردتج من الغرفه
ازل : اي
فاديه : ماعرف اشلون ابدي !!
ازل ( تمسك بيد فاديه ) قائله : احجيها مثل ماهي اسمعج
فاديه : اني اتقدملي واحد يريد يخطبني
ازل ( منصدمه ) : لحظه لحظه شنو ؟
فاديه : تقدملي واحد يريد يخطبني !
ازل : تحجين صدك لو تشاقين ؟
فاديه : وشوكت اني اشاقه بيهج موضوع لا صدك اتقدملي واحد
ازل : منو هذا الواحد
فاديه : اني راح احجيلج بس لا تكليله لابوج
ازل : ليش ؟
فاديه : احسن خلي ميعرف
ازل : اوك
فاديه : هذا الواحد جان حبيبي وربيت ويا ومن منطقتي و جانوا اهلي واهله عائله وحده وحتى دخلنه جامعه سوا
ازل : اي
فاديه : بوكت النظام السابق جان يسوون حملات على الي يعترضون على الحكم فااخو جان معارض سياسي وعنده جماعه يلتقي بيهم
ازل : اي
فاديه : من عرفوا بي سوو حمله على المنطقة واعتقلوا كل الشباب وحتى النساء بوكتها جنت اني ويا بداوم لمن اجه الامن وراد ياخذه فهو كدر يشرد بعد مساعده من الطلاب الي ويانه
ازل : اي
فاديه : اخذو اخويه وابويه واهله كلهم اخذوا وضليت بس اني وامي بوكتها اجوا للبيت اعتقلوني واخذوني للمركز وسئلوني عنه وعن علاقتي بي وطبعا انضربت همات بعدها ماحصلوا مني شي وقنعتهم باني مااعرف شي عنه
ازل : اي
فاديه : اني وامي شردنه وضلينه نتنقل من بيت لبيت الى ان اجه واحد وجايب رساله وانطانيها بان عادل مات
ازل : اي
فاديه : من اجيت وياج للكليه شفت الذكرى الي كاتبيها اني ويا حرفي وحرفه وعباره مكتوبه ( يا مالكا قلبي ) وكفت بجيت وذكرته الى ان اجاني ذاك الصوت الي اكدر اميزه ابين ملايين الرجال التفت عليه طلع هو وبعد عايش
ازل : اشلون عاش ؟
فاديه : طالع للخارج ومنظم للمعارضة
ازل : يعني كل هذا صاير ضامه عليه واني شيصير كبل اجي اكلج
فاديه : مو شويه موضوع حساس يعني اني نفسي مامصدكه ولسه مامصدكه  المهم فتح موضوع الزواج واني وافقت
ازل : مادري شكلج محتاره يعني مااكدر اتخيل البيت من دونج وابقى اهنا وحدي
فاديه : انتي بس كولي ضلي يمي ولا تزوجين اضل
ازل : لهل الدرجة تحبيني وضامه عليه
فاديه : انتي بنتي الي ما جابتها بطني
ازل : لا تاخذيني بلحجي الحلو يعني جنت تجين ويايه حتى اشوفي مو
فاديه : اي
ازل : مراهقين اخر وقت
فاديه تضحك وتقوم باحتضان ازل

( بيت سجاد )
الام : متتريك يمه
سجاد : لا يمه اتاخرت اكل بالجامعة
يغادر المنزل ذاهبا الى الجامعة يمر بجانب بيت الحاج عمر سابقا الذي سكنوا به اشخاص مسلحين يخرج احدهم قائلا : ابو الشباب اوكف
سجاد : انلاصت ، نعم
احد الأشخاص : تعال بلا زحمه عليك
يذهب اليه ودقات قلبه تتسارع من الخوف والرعب
سجاد : نعم تفضل
احد الأشخاص: شسمك
سجاد : سجاد
احد الأشخاص : عاشت الاسامي ، شتشتغل
سجاد : مااشتغل طالب جامعي
احد الأشخاص : عفيه العلم اهم شي ، تعال طب جوا
سجاد : لا ارد اروح اتاخرت
احد الأشخاص : ترى اني ماعزمك اني جابرك اطب يعني اطب
سجاد : ماشي
يدخل الى البيت يرى على الارض صناديق من الاعتده السلاح يدخل الى داخل البيت يرى اشخاص يصنعون المتفجرات
أحد الأشخاص : هذا الولد اسمه سجاد وطالب جامعة
احد الأشخاص : تعرف تستخدم حاسبه
سجاد : هاا لا
احد الأشخاص : شنو لا
سجاد : يعني اعرف بس قليل
احد الأشخاص : هو القليل الي تعرفه تعال اهنا اكعد بصفي
يجلس بجانبه وهو يرتجف
أحد الأشخاص : هاي شبيك ترجف لا تخاف احنه منئذي الي من دمنه ولحمنه تعال دخلت قرص مجاي يفتح
سجاد : اني هم مااعرف والله
احد الأشخاص : لعد شلون دخلوك جامعة لخاطر الله متكلي
سجاد : بس اعرف واحد هو عنده محل مال حاسبات اتصل بي ويكلي
احد الأشخاص : اتصل خل نشوف
يقوم سجاد بلاتصال لكن ليس لديه رصيد كافي
سجاد : اااا رصيد ماعندي
احد الأشخاص : ولك متكلي منين جايب هذا العطل من الصبح وجايني هاك هذا الموبايل وخابره
سجاد : حاضر
يقوم بتسجيل رقم الهاتف ويتصل به ....
سجاد : الو صباح الخير اشلونك لطيف ، اكو قرص دخلت بلحاسبه مااشتغل ليش ، هاا انته هيج تشوف ، ماشي
احد الأشخاص : ها شكالك
سجاد : يكول هذا القرص مضروب
احد الأشخاص : اني مو كتلك طكطكله حرمل قبل منشغله ، ولك مضروب شنو
سجاد : ماادري والله هو كال مضروب وكبل
يرن هاتف سجاد ازل تتصل ..
احد الأشخاص : هاي شنو عندك حبيبه
سجاد : لا هاي زميله ويايه بلكلية
احد الأشخاص : الله شوف شلون يكولها زميله الله عليك يازميل يامحترم
سجاد : اذا خلصتوا مني حتى اروح
احد الأشخاص : خلص روح منحتاجك بعد
يخرج من البيت مرتعبا ويذهب الى جامعته

( في الجامعة )
ياتي احمد الى الجامعة ليرى ازل يبحث عنها في أروقة الجامعة حتى يجدها واقفه مع مجموعة من البنات
احمد : صباح الخير
ازل تلتفت اليه : هلو صباح النور استاذ احمد
احمد : اهلا ست ازل
احدى البنات : ازل احنه نترخص اخذي راحتج
احمد : خاف سببتلج احراج بوجودي
ازل : لا بلعكس بس اتفاجات يعني
احمد : اني جيت اخذج الى الشركه اشوفج الشغل اشلون يمشي وطبعا كتله لسيد الوالد وعند علم بقدومي هنا
ازل : اهاا يعني متفقين عليه
احمد ( ضاحكا) : لا من كتله بسرعه وافق
ازل : اني عندي بس هلمحاظره استئذن من الأستاذ واطلع
احمد : اوك منتظرج 
وبعد مرور الوقت يصل سجاد الى الجامعة متلهف لرؤيه ازل لكنه ينصدم !
حيث راى ازل جالسه في السيارة مع احمد تتبادل الابتسامات ويغادر بها خارج الجامعة هنا قد انكسر شي في قلب سجاد هنا اصبحت روحه قلقه هنا بدا قلبه يخفق سريعا هنا انتابه شعور الغيره والخوف من الفقدان وبدات افكار عقله تتلاطم هل اول عندها علاقه بهذا الشخص ولماذا لم تقل ذلك وهل هو مجرد صديق والكثير من الأفكار التي جائته لكنه في وقتها خرج من الجامعة وذهب الى العمل

وفي المساء ازل تتصل بسجاد لكنه لا يرد وتتصل مرارا وتكرارا لكنه لا يرد عليها حتى قام بإغلاق هاتفه فقد اخذته افكاره وضنونه بانها على علاقة به وراجع حساباته قبل ان يتعلق بها اكثر لانها من بيئة غير بيئته واصبح متيقنا بانها لم تعد له

( في الجامعة )
وفي صباح اليوم التالي يجلس سجاد في اخر مقعد في القاعة الدراسية بعيدا عن أنظار ازل لكن ازل لاتتحمل بعده عن أنظار فتقوم بلالتفات نحو مابين حين واخر حتى انتهاء المحاضرة
تاتي نحوه وهو اقف يحاول الخروج قائله : وينك البارحة اتصل عليك ماكو لا وفوكاها غلقت جهازك صاير شي
سجاد ( متجهم الوجه ) قائلا : لا ماكو شي ( ويحاول الخروج لكن ازل تمسكه من مرفق يده )
ازل : اوكف وين طالع شبيك ويايه ليش متغير
سجاد : نزلي ايدي ارد اطلع اتريك ماتريكت
ازل : سجاد حاجيني شبيك
سجاد ( صارخا ) : كتلج ماكو شي
بعض الطلاب الموجودين في القاعه يلتفتون نحوهم
ازل تشعر بلاحراج تخرج مسرعه من القاعة
يبقى سجاد داخل القاعه وحيدا بعد خروج جميع الطلاب يذهب ليجلس في مقدمه القاعه ويتئفئف ويرمي بكتبه على المقعد ينظر الى الباب ليرى ازل واقفه وتنظر اليه بنظرات غضب تقوم باغلاق باب القاعه ينهض سجاد من مكانه ليقف امامها وكلاهما ينظران الى العيون ليرى كلا منهم الكلام الذي لايستطيعان قوله
ازل : اني راح اتغاضى عن صياحك بوجهي لان ضغطت عليك بس كلي ليش متغير عليه شبيك صاير شي وياك سويت اني شي غلط
سجاد : البارحة من جيت لجامعة شفتج صاعده وي واحد بسياره وضحكين ويا منو هذا ؟
ازل : هذا احمد من معارف بابا واجه اخذني حتى يشوفني الشغل الي بشركه ويدربني حتى اتعلم
سجاد : يعني مو حبيبج ؟
ازل : سجاد لاتحجي حجي ماصخ اني لا عندي حبيب ولا شي وبعدين تعال كلي انته شعليك ويامن اصعد ويامن امشي واذا جان هذا الشي خلاك تغير تعاملك ويايه فممكن اعرف السبب
سجاد : لا ماكو سبب اسف اني واعتذر اجاوزت حدودي وياج
ازل : لا كلي السبب
سجاد ينزل براسه الى الارض بعد ان شعر بظلمه ل ازل
ازل ( متعصبه ) : سجاد ارفع راسك وباوع بعيني وكلي شنو السبب
سجاد ( صارخا في وجهها ) : لان اني احبج

           نهاية البارت العاشر