غرام وانتقام ( الجزء الاول )

البارت الثاني

            
(بعد مرور ساعات )
بينما سجاد نائم ووالدته مازالت تعمل على ماكنه الخياطه يرن هاتف سجاد يستيقظ ويجيب
سجاد : الوو ها لطيف _ صدك _ يالله جايك جايك ، يمه يمه طلعن القبولات راح اروح اشوفهن
الام : صدك يمه شطلعلك
سجاد : ماادري هسه اروح اشوف لان صايره هوسه يم لطيف كل الطلاب ملتمين يمه
الام : روح ابني وان شاءالله الله يفرح قلبك
يخرج سجاد من البيت مسرعا متوجها الى محل لطيف للانترنت  يصل الى المحل ويرى مجموعه من الطلاب يقفون احد الطلاب خرج قائلا : شباب باركولي طلعتلي تربيه مستنصريه
الموجودين : اي بيها الخير
سجاد يقف في الطابور متحمس وقلق والطلاب يدخلون ويخرجون حتى وصل اليه الدور دقات قلبه تتسارع ويتنفس بسرعه يدخل الى قاعه المحل
لطيف : تعال سجاد اكعد بصفي وانطيني مدرستك ورقمك السري
يقوم سجاد باعطائه فتخرج النتيجه يبتسم وجه ويقوم بتقبيل خد لطيف قائلا : مشكور خويه ورحمه الله والديك
لطيف : الف مبروك وتستاهل كل الخير وهسه روح كبل بشر امك خل تفرح بيك
سجاد : اي اي اهم شي امي خل تفرح خطيه
يخرج راكضا بين ازقه وشوارع منطقته هذه المنطقه المتكاتفه التي تجمع جميع اطياف الشعب العراقي التي فيها ناس طيبون واصحاب قلوب بيضاء الجار يسئل عن جاره وان احتاج مساعده الكل يهب لمساعدته
يصل البيت يدخل على امه وهو تعب من كثره الركض يرمي بنفسه بحضن والدته ويقبل يديها وراسها وينظر الى عينيها قائلا : يمه افرحي طلعلي اداره واقتصاد جامعه بغداد
الام  تبدا بلبكاء وتهلهل حتى يصل صوت الهلاهل الى بيت ندى
ندى : يمه دسمعين الهلاهل اكيد طلع قبوله لسجاد امشي يمه خلي نروح نشوفهم
ام ندى : يالله امشي
ام سجاد : ياايمه فرحتني وبدي اكوم اركص هسه
سجاد (ضاحكا): لا يمه شتركصين ضميها لعرسي عود
ام سجاد : اي هيج الي عمر واشوفك متخرج وعريس
سجاد : الله يطول بعمرج ويحفظج اليه

(تدق الباب )
ام سجاد : هاي اكيد ندى وامها اجن سمعن الهلاهل
يذهب سجاد لفتح الباب ندى تهلهل بوجه سجاد
ام ندى : بشر ابني شطلعلك
سجاد : إدارة واقتصاد جامعه بغداد
ندى : صلوات على محمد وال محمد (وتهلهل)
يدخلن الى داخل البيت
ام ندى : مبروك دادا ام سجاد يوم تشوفين تخرجه وزواجه وجهاله
ام سجاد : الله يبارك بيج ويوم الي تفرحين بزواج مهدي وندى
يعم الضحك والسرور داخل المنزل والابتسامات المتبادله مابين سجاد وندى لكن هناك نظرات القلق بدات على محيى وجه ندى

في المساء يستعد سجاد للخروج من البيت
الام : ها يمه وين رايح بهليل
سجاد : يمه رايح وي حجي عمر شافلي شغله يم واحد صاحبه
الام : خوش وليدي ديربالك على نفسك ولاتتاخر برجعه اريد انام تعبانه ومااكدر انام اذا انته ماموجود كدام عيني
سجاد : لا يمه نروح للرجال وارجع كبل لاتفكرين ،يالله سلام
الام : الله وياك سوجي ربي يحرسك
(في بيت ندى)
ندى جالسه على الاريكه وسارحه في خيالها تاتي امها قائله : هاي يمه شو صافنه شبيج
ندى : هيج حسبه ابالي
ام ندى : مدام حسبه ابالج يعني الموضوع سجاد
ندى : اي سجاد يعني راح يطب جامعة ويشوف بنات هواي ويمكن يحب وحده او وحده تحبه اني شنو موقفي شراح يصير بيه
ام ندى : لا تخافين سجاد مو من هلنوع لو يريد يحب جان حب من زمان سجاد كل حبه لامه
ندى (متأفأفه): اهوووف هسه مفعول العمل مااشتغل
ام ندى : صبري بنتي شيشتغل كالت ام فراس ثلاثه ايام ويشتغل
ندى : انتضر واشوف منا لثلاثه ايام

سجاد والحاج عمر جالسان في بيت ابو انور
الحاج عمر : اي ابو انور جبتلك سجاد ولد امين وسبع ويعتمد عليه
ابو انور : لا واضح عليه الله يخلي ان شاءالله
سجاد : ممكن اعرف طبيعه شغلي شنو
ابو انور: انته مكانك محاسب كدامك حاسبه والدخل اي شي يطلع او يطب من المحل اسجله ورقه وقلم وكدامه سعره
سجاد : بس هيج
ابو انور : اي بس هيج واهم شي ياابني الامانه اني مرات يصير عندي شغل واطلع اعوف المحل الك وانته الي تؤمر وتنهي مكاني
سجاد : ان شاءالله اكون عد حسن ظنك ومااخيب املك بيه
ابو انور : خوش لعد من باجر تباشر الصبح اريدك موجود الساعه سته الصبح
سجاد : الله كريم ، بس اكو شغله
ابو انور : شنو ؟
سجاد : اني بعدني طالب والسنه راح اداوم كليه اداره واقتصاد جامعه بغداد فيعني يصير مثلا اذا بدا الدوام ورا الدوام اجي اشتغل يعني
ابو انور : اذا شفت شغلك زين ومضبوط تعال ورا الدوام واشتغل بس احنه ب٦ نسد المحل يعني اجرك راح يكون قليل
سجاد : عادي المهم اشتغل لان محتاج هذا الشغل حتلوا تحسبلي شي قليل قابل اني
ابو انور : خل يجي الدوام ونشوف وان شاءالله منختلف
الحاج عمر : مدام اتفقتوا على كلشي يالله احنه نترخص
ابو أنور: بعدكم كاعدين ودنسولف
الحاج عمر : والله الكعده حلوه وياك بس اني تعبان واريد ارتاح وسجاد امه وحده بلبيت
ابو انور : اذا هيج اخذوا راحتكم
الحاج عمر : يالله سلام
يعود سجاد الى البيت ويتفاجأ بجلوس والدته في الباب منتظره عودته
سجاد : يمه شمكعدج هنا متكوليلي
الام : يمه منتظرتك شفتك تاخرت كلت خلي اطلع انتظره بلباب قلبي مينطيني ابقى بلبيت وانته ماموجود
سجاد : دكومي طبي اجيت بعد شكو
يدخلان الى داخل البيت
الام : اي صار وياك
سجاد : باجر راح اطلعله يريدني بسته الصبح
الام : بس لا بعيد
سجاد : لا قريب محله على شارع العام صاحب جمله
الام : يعني مو بجميله
سجاد : لا يمه لا شورجه ولا جميله هياته قريب على المنطقه
الام : وهم راح تشتغل حمال
سجاد : لا هلمره اترقيت صرت محاسب
الام : اي اشوه ظهرك واديك يتعبن
سجاد يمسك يد امه قائلا : يمه بعد مااريدج تنتظرين يم الباب ترى اني كبرت مو صغير واعرف اصرف وانتي مو تكولين انته رجال البيت وابو بيتي فدوه بعد لاتوكفين وتنتظرين
الام : يمه اني مااكدر اخاف عليك انته وحيدي شسوي
سجاد : يمه ميخالف والله موجود يمج وين اروح يعني
الام : ماشي بعد مااوكف
يقوم بتقبيل يدها وراسها قائلا : يالله روحي نامي حتى تكعديني باجر من وكت
الام : وانته هم نام لاتسهر
سجاد : حاضر ياسلطانه قلبي
في منتصف الليل تدق الباب بقوه ودقات متسارعه
يفز سجاد من نومه وامه ايضا
الام : خير ياساتر منو هذا بهليل
يذهب سجاد مسرعا نحو الباب يقوم بفتحها فاذا بها ندى قائلا : سجاد الحكنه ابويه مدري شبي ديلوج ويصيح وكامش بطنه
سجاد : يالله هسه جايج
يدخل الى البيت قائلا: يمه هاي ندى ابوها متخربط وراح اودي للمستشفى
الام : خلي اجي وياكم لعد
يدخل الى بيت ندى يسمع صراخ والدها قائلا : اخ بطني راح اموت
ام ندى : دادا سجاد الحكنه الرجال مدري شبي
سجاد : خلي اروح لاامجد ناخذه بسيارته
ندى : بسرعه سجاد
ابو ندى : ولكم بطني موتتني احس مصارييني تتكطع
ام سجاد : اتحمل خويه ابو ندى هسه يجي سجاد يوديك للمستشفى
ياتي سجاد ومعه امجد
سجاد : تعال امجد طب خل نشيله
يقومان بحمله واخراجه من البيت وادخاله السياره
سجاد : انتن ضلن لاتجن ندى ديربالج على امي
ندى : ماشي
تتحرك السياره نحو المشفى
ابو ندى : اخ بطني لحكوني راح اموت اخ اخ اخ
سجاد : اتحمل عمي راح نوصل مابقه شي امجد اسرع اشويه
امجد : هاي جانت عايزه سيطره مال امريكان
سجاد : وشعدهم ذوله
امجد : سجاد خليني اني احجي وياهم
يقوم احد الجنود بوقف السياره قائلا : Stop and walked from the car
(الترجمه : اوكف وانزل من السياره )
امجد : There is a sick inside and caring to be predicted to the hospital
(الترجمه: اكو مريض بسياره ولازم نودي بسرعه للمستشفى)
يقوم الجندي بنظر داخل السياره ويرى ابو ندى ماسكا بطنه ويتقلب
الجندي : ok ok go  (الترجمه : ماشي اتحرك)
سجاد ينظر الى امجد قائلا : مادري بيك تحجي طلقه بلانكليزي
امجد : لعد شكو جاي ادرس تربيه انكليزي
سجاد : متعوفها للكليه لعد وتشتغل وياهم مترجم
امجد (ضاحكا): اي حتى انصك ، وصدك نسيت اكلك مبروك على قبولك
سجاد : شكرا ، واريد اجي يمك فديوم تنطيني ملاحظات عن الجامعة والجو مالتها
ابو ندى : شوكت نوصل فضوها مو جاي اموت وانتوا دتناقشون مستقبلكم يمي
يصلون الى المشفى ويدخلون الى غرفه الطوارئ
(في بيت ندى)
ام سجاد : مو تاخرو خاف صار بيهم شي بطريق
ام ندى : ان شاءالله ماكو شي ننتظر والله كريم
ندى : خاله اذا نعسانه افرشلج ونامي
ام سجاد : لا خاله كاعده عيني متاخذ نوم اذا مااشوف سجودي

(في المشفى)
ياتي الدكتور الى سجاد وامجد
سجاد : ها دكتور بشر
الدكتور : عنده زائده دوديه ولازم يسوي عمليه انطينا مهدئات وحضروا روحكم باجر نجري العمليه اله
سجاد : يعني اليوم يضل اهنا
الدكتور : اي يضل
يغادر الدكتور
سجاد : امجد وصلني للبيت لان باجر عدي شغل
امجد : ماشي واني راح اجيب عائلته واضل وياهم
(في بيت ندى)
يدخل سجاد مع امجد
ام ندى : ها سجاد وينه لعد ابو ندى
سجاد : طلع عده زائده دوديه وباجر الصبح يسووله عمليه واني باجر عدي شغل فراح ياخذكم امجد للمستشفى ويضل وياكم
ام ندى : خوش لعد اروح احضر غراضه
سجاد : يالله يمه امشينه
حل الصباح واشرقت الشمس وقد عبر الساعه السادسه صباحا ومازال سجاد نائم ووالدته ايضا
استيقظ سجاد من نومه بسرعه لليرى الساعه انها العاشره صباحا وقد تاخر عن العمل
سجاد : انلاصت اول يوم اليه بشغل واتاخر ، يمه يمه كومي الساعه بالعشره
يقوم بتغير ملابسه بسرعه
الام : ادري مااتتريك
سجاد : شتريك اتاخرت عن الشغل وفشله من الرجال يالله طالع اني
الام : محروس وليدي والله يرزقك ويبعد عنك ولد الحرام
تذهب امه وراءه لتقوم بسكب الماء خلفه
يصل الى مكان العمل يرى عمال يعملون وينقلون بالبضائع يدخل الى المكتب
سجاد : السلام عليكم
ينظر اليه ابو انور قائلا : وعليكم السلام بعد وكت
سجاد : اني اسف عمي بس البارحه بليل جيراني اتمرض وديته للمستشفى
ابو انور : هاي اليوم وبدات الاعذار اذا ضل هيج متعجبني ترى
سجاد : لا صدكني جيراني اتمرض واذا تريد اسئل حجي عمر
ابو انور : لا خلص ميحتاج ، شوقي
شوقي : نعم عمي
ابو انور : اخذ سجاد وعلمه على الشغل
شوقي : حاضر عمي
شوقي ياخذ سجاد الى مكانه المخصص قائلا : شوف خويه انته هذا مكانك اني راح اجيبلك الوصولات لهنا انته كل الي عليك تكتبهن بسجل وكدامهن السعر عليك بس المبيعات اما المشتريات فعلى ابو انور افتهمت
سجاد : افتهمت
يبدا بلعمل ويتعرف على الأشخاص العاملين داخل المحل ويتحدث معهم ويضحك وقد دخل اجواء العمل
بعد الانتهاء من العمل وحان موعد اغلاق المحل وقد غادر العمال وبقي سجاد وابو انور فقط تاتي سياره فارهه ينزل منها شخص وامرأة يدخلون الى المحل
المراه : السلام عليكم بس لا عزلتوا
سجاد : اي عزلنه
المراه : فرينه المجمعات كلها معزله بلكي تمشينه اذا تكدر
ياتي ابو انور : ها سجاد شكو
سجاد : الجماعه يردون يشتروون اجهزهم لا
ابو انور : اي جهزهم وسوي وصل باسمهم واني طالع من تخلص قفل المحل وخلي المفاتيح يمك عندي نسخه اني
سجاد : حاضر عمي
يقوم سجاد بتجهيز الوصل واخذ المعلومات عن المكان وقد حمل البضائع مع الرجل ووضعها في السياره
بعد الانتهاء راجع بحسب الفلوس فكان هناك زياده مئه الف
سجاد : هاي زياده ميه الف اهووو لازم اعيد الوصولات 
يبدا بمراجعه الوصولات فاذا به يصل الى النتيجه المئه الف الزائده هي من المراه والرجل الذين جاؤوا متاخرين لم يحس بذلك بسبب تعبه الشديد
سجاد : لازم اروح ارجعلهم الميه
(صوت انفجار)
تسمع ام سجاد صوت الانفجار ويبدوا قريبا على مكان عمل سجاد تضع يدها على قلبها قائله : يايمه وليدي
          
             نهاية البارت الثاني