غرام وانتقام
البارت الاول
يمشي سجاد في الليل في منطقه مليئه بلاشجار والنخيل وفي حاله يرثى لها ماسكا سلاح بيده (مسدس) حتى وصل الى وسط البستان يجثوا على ركبتيه ويبكي قائلا : سامحني ياربي صحيح هذا الشي خطا وحرام بس بعد مااكدر اعيش بهلدنيا تعبت وادمرت ربي اني انتهيت
يقوم بوضع المسدس في فمه ويغلق عينيه
( قبل اربع سنوات )
( الغرام )
سجاد ينام في غرفته وعلى سريره تقترب منه والدته وهو نائم تنظر الى وجهه وتستمع الى انفاسه تقترب اليه اكثر وتنظر الى عينيه وهو نائم فجأة يستيقظ ويبدا بصراخ قائلا: يييييييمه
ويسقط على الارض
الام : اسم الله وليدي شجاك
سجاد : يعني اشلون بيج اني كلما اشوفيني نايم تجين تخرعيني
الام )ممتعضه(: هيج صرت اني اخرع روح بعد مااحجي وياك
سجاد يقترب منها ويضع يديه على كتفها قائلا : يمه قصدي اني نايم وانتي صافنه بوجهي اشلون اخترع منج غير انتي شمعه البيت (يقوم بتقبيلها من يديها وراسها)
الام: مواني اخاف عليك واجي اتفقدك خاف بيك شي يوجعك شي
سجاد : لا يمه نايم بطمئنينه وعز ووقار
الام : صدك هو اليوم مو القبولات يطلعن مال الجامعة
سجاد : اي اليوم بس يتاخرن احتمال للعصر
الام : ان شاءالله خير ويطلع قبولك زين حضرتلك الريوك واني اروح اشتغل عندي كومه ملابس لازم اخيطهن
سجاد يقبل يده امه قائلا : ان شاءالله اعينج واردلج التعب كله ونعيش بيت مثل القصر وانتي الملكه على عرش البيت
الام : الله كريم سجودي كلشي مااريد من الله غير بس يحفظك اليه واشوفك عريس وجهالك يلعبون كدامي
سجاد : ان شاءالله
الام : يالله اكوم اشتغل اني
( سجاد : شاب يتيم الاب يبلغ من العمر ٢٤ سنه متاخر في الدراسه لصعوبه ضروفه المعيشيه يعمل في ايام العطل في البناء او تحميل البضائع من السيارات (حمال) ليعين والدته التي تعمل خياطه في البيت
بيتهم صغير جدا وجدرانه هالكه وهو مابقى من تركه والده له ولامه)
(الباب تدق)
الام : سجودي شوف منو بلباب
سجاد : اي يمه جاي
يذهب لفتح الباب
ندى : صباح الخير سجودي
سجاد ينظر اليها قائلا: ياريتني ماكمت وفتحت الباب
ندى : خلف الله عليك شفتني بعبع
الام : منو بلباب
ندى : اني خاله امي دزتني اساعدج
سجاد : اتساعديها مو همزين راح اطلع
ندى : ضل ضل اشرد مني تاليتك صير رجلي وابو بيتي
سجاد : ضلي حلمي ولج بابا انتي مثل اختي تفهمين شنو يعني اختي
ندى : وانته مو مثل اخويه انته aşkım
سجاد : هاي شنو عود ؟
ندى : هاي بتركي معناها حبيبي
سجاد: غير تكعد راحه لميس ابو شعر ، يمه اني طالع راح اروح اشوف لطيف ابو الحاسبه
تدخل ندى الى البيت تقبل راس ام سجاد
ام سجاد : الله يحفظج بنيتي
ندى : لعد سجاد شعده يم لطيف ؟
ام سجاد : راح يشوف القبولات مال الجامعة طلعن
ندى : يارب يطلع قبوله زين والله اله اسوي ثواب لام البنين (ع)
ام سجاد : اشوفج تحمستي ولج
ندى ( تنزل راسه وعلامات الخجل على وجهها) قائله: اي يااخاله انتي تعرفين القلب شبي مابي
ام سجاد : اي اعرف اعرف واتمنى تصيرين اله يوم قبل باجر بس هو راكب راسه يكول ندى مثل اختي
ندى : ادري قابل راضعين سوا
ام سجاد : هاي بعد بلكي الله يهدي عليج
ندى : ان شاءالله
(ندى : فتاه جميله تبلغ من العمر ٢٢ عاما ربه بيت وجيران بيت سجاد تحب سجاد كثيرا وتتمنى ان يكون زوجها وتاتي بين فتره واخرى تساعد والدته في اعمال المنزل
اما عائلتها : تتكون من الاب والام واخ جندي في الجيش العراقي)
يجلس سجاد مع لطيف صاحب محل للخدمات الانترنت
سجاد : هاا لطيف بشر
لطيف : دخلت على موقع مال الوزاره بعد كلشي ماكو
سجاد ماشي اذا طلعن اخيك خابرني
لطيف : تدلل من عيوني سوجي
يغادر المحل متوجها الى الحاج عمر صاحب محل ادوات احتياطيه
سجاد : السلام عليكم اشلونك حجي عمر ( ينحني ليقبل يد الحاج عمر)
الحاج عمر : وعليكم السلام اهلا سجاد بشرني ياابني ماطلع قبولك
سجاد : بعد لسه مانشروهن
الحاج عمر : اكعد خلي اصبلك جاي واحجي وياك بموضوع
سجاد : خير ان شاء الله
يقوم بصب الشاي ينهض سجاد لياخذ كاس الشاي من يده
سجاد : اي حجي نورني الله ينورك دنيا واخره
الحاج عمر : اسمع اجاني ابو انور صاحبي وعشره عمر اني ويا
سجاد : اي
الحاج عمر : يريد واحد ويا يشتغل على الحسابات لان الولد الي جان مشغله يبوك بدخل ويريد واحد امين
سجاد : واكيد اني المنشود
الحاج عمر : اي انته المنشود بس سجاد مو مثل كل مره تتعارك وتسويلك مشكله وتبطل وراك جامعه ومصاريفها هواي
سجاد : حجي انته تعرفني زين اني روحي صغيره ومااتحمل واحد يصيح عليه او يهيني علمود شغله اهم شي كرامتي
الحاج عمر : مدام انته اجير تشتغل وتريد تعيش لازم تتحمل كلشي اذا ضل هيج مراح تكدر تعيش اني لو عندي شغل قوي بلمحل وعليه سحب جان شغلتك ويايه بس هلشوف بليوم ابيعلي قطعتين ثلاثه
سجاد : الله يرزقك حجي
الحاج عمر : بليل تعال مر عليه للبيت ومناك نروح للرجال
سجاد : ان شاءالله حجي ، يالله اني اروح ارجع للبيت
الحاج عمر : الله وياك ابني
ندى في البيت تطبخ الغداء والدته مازالت تعمل على مكينه الخياطه مرتديا النظارات الطبيه
يدخل سجاد الى البيت
الام : هاا يمه صار وياك
سجاد : بعد ماكو شي لحد الان ، ندى راحت
الام : لا بلمطبخ دسوي اكل
سجاد : مبروك علينه غسل المعده مقدما
ندى من المطبخ قائله : سمعتك سمعتك لتاكل لعد روح اكل من برا
سجاد : هاي مو اني الي حجيت هيج واحد حجه وشرد
(تدق الباب)
يذهب سجاد لفتحها ، يظهر رجل حاملا حقيبه صغيره ودفتر وصولات
الرجل : هذا بيت علي حيدر
سجاد اي
الرجل : اني ابو الكهرباء وعليكم ٢٥ الف
سجاد : ممكن تدخل جوا اريد اشوفك شي
الرجل : شنو شكو
سجاد : لا تخاف بس تعال طب
يدخل الرجل الى البيت
سجاد : يمه هذا ابو الكهرباء
الام : يايمه هي وينها الكهرباء مشوف البيت مابي كهرباء
الرجل : يمه اني موظف قابل مولد مال كهرباء لو وزير
تخرج ندى من المطبخ قائله : شدعوه عيني هيج عصبت واتنرفزت هذا البيت كدامك وين الكهرباء
سجاد : احب اعرفك (يشير بيده الى ندى) المحاميه مال العائله
ندى : شكرا سوجي
الرجل : انتوا عائله مخبله لوناصبين عليه هاك هذا الوصل وروح لدائره الكهرباء سدد عود
يغادر الرجل البيت
ندى : واني هم طالعه راح ارجع للبيت والغدا صبيته وخليته على الميز
الام : شكرا بنيتي باجر تجين لو لا
ندى : والله خاله مااعرف بعد اليوم بتواسيل يالله خلاني ابويه اطلع
سجاد : حقه الرجال يخاف على اميره القصر
الام : بس ولك عيب
ندى : لا خاله خلي هو من يحجي هيج بدافع الحب ادري بي ، يالله مع سلامه
الام : الله وياج بنيتي ، سجاد يالله يمه خل نتغده
ندى تجلس مع والدتها
ام ندى : ها ولج شسويتي
ندى : مثل ماكلتي حطيته بمركه وقريت عليه
ام ندى : بعد هذا العمل راح يركض وراج هسه شوفين
ندى : يمه كل مره تكولين نفس الحجي وماكو انوب يبتعد عني اكثر
ام ندى : لا هلمره اتصيب ام فراس خوش اسوي اعمال
يدخل الاب قائلا : هاا شو كاعدات اتبسبسن خير
ام ندى : لا ماكو شي
الاب : اشلونها ام سجاد
ندى : زينه وسلم عليك هواي
الاب وعليكم السلام ، وسجاد موجود
ندى : اي قبل شويه رجع خطيه اليوم القبولات مال الجامعة ولسه ماطلعن ودينتظر
الاب : الله يسهله ان شاءالله ، يالله كومن حضرن الغدا
(في بيت سجاد)
يجلس سجاد مع والدته ياكلون وجبه الغداء
سجاد : يمه المركه مو بيها مروره
الام : يعني خيط مروره اكو
سجاد : اول مره اكل فاصوليا مره
الام : اكل يمه اكل مابيها شي وأحمد الله على النعمه
سجاد : الحمدلله
(بعد مرور ساعات)
بينما سجاد نائم ووالدته مازالت تعمل على ماكنه الخياطه يرن هاتف سجاد يستيقظ ويجيب
سجاد : الوو ها لطيف _ صدك _ يالله جايك جايك ، يمه يمه طلعن القبولات راح اروح اشوفهن
الام : صدك يمه شطلعلك
سجاد : ماادري هسه اروح اشوف لان صايره هوسه يم لطيف كل الطلاب ملتمين يمه
الام : روح ابني وان شاءالله الله يفرح قلبك
نهاية البارت الاول
أنت تقرأ
غرام وانتقام ( الجزء الاول )
Romanceلم يعد يخيفني الفراق .. ٱن المخيف حقاً هو ٱن تجد من ٱحببته خصماً لك .. و ٱن يغدر بك من عاهدك ٱن الفراق الحقيقي هو ٱن لا تتذكر كيف كنت تحبهم
