غرام وانتقام ( الجزء الاول )

البارت السابع

            

فاديه تلتفت اليه وعيناها غارقه في الدموع
عادل : فاديه !!!!!!
فاديه تلتزم الصمت وتنظر اليه فقط وتبدا بتنفس بكثره ثم تغادر
يذهب وراها قائلا : فاديه فاديه اوكفي منا الطلاب فاديه
لكنها لا تقف ومحاولاته باءت بالفشل دون جدوى
بعد الانتهاء من المحاضرة سجاد وازل يتمشيان معا في اروقه الجامعة
ازل : ليش جيت متاخر
سجاد : مو صادفتني شغله بطريقي هي الي اخرتني
ازل : وشنيه الشغل هاي
سجاد ينظر الى عينيها قائلا : احسن الج متعرفين
ازل : هلكد هاي الشغله خطره
سجاد : واكثر مماتصورين
ازل : اوك امشي خل نكعد بمكان

( بيت ازل )
تدخل فاديه الى غرفتها تبكي قائله : بعده عايش بعده عايش بس اشلون ( تذهب الى خزانه الملابس وتخرج الصندوق وتفتحه لتلتقط صوره عادل وتقبله وتنظر اليه وتبكي )

( في الجامعة )
سجاد : هو مو المفروض نتعرف على زملائنه الي بلقسم ليش طلعنه
ازل : لازم ضجت مني اوك اني اترخص
سجاد : لا لا مو قصدي بس غير يعني اتعرف عليهم
ازل : اوك روح تعرف واني اخذلي فره بالجامعة من رخصتك (تغادر وتتركه وحده)
سجاد : ازل ازل ، عفيه استاذ سجاد هاي اول جفصه هسه وكتها تريد تتعرف على زملائك بيك توحد مشايف بشر ( يتكلم مع نفسه)
ينهض من مكانه ويذهب الى القاعه الدراسيه ليراها فارغه خاليه من الطلاب قائلا : ذوله وين راحو مااحب افشل نفسي
يقف في مكان الاستاذ وينظر الى المقاعد الخاليه من الطلاب قائلا : بما انو ماكو احد وحدي بلقاعه وطبعا هذا الشي صحيح احب اقدملكم نفسي اني سجاد ( يلتف امام السبوره ويقبلها ) اهلا وسهلا سبورتنه الحلوه
في هذه الأثناء تقف مجموعه من الطلاب من الولد والبنات ومعهم ازل  و الاستاذ ينظرون اليه وبعضهم يضحكون يلتفت اليهم قائلا : اااا شسمه شفت ماكو احد موجود فحبيت اسوي بروفه لتعريف عني نفسي
ينفجرون من الضحك ذكورا واناث وازل كذلك تضحك وتهز براسها
الاستاذ : اذا خلصت بروفه تفضل استريح عدنه محاضره
سجاد : طبعا طبعا تفضلوا
تجلس ازل بجواره قائله : هيج احسلك لو مكانك مداوم بعد (تضحك)
سجاد : اي ماحبيت افشل نفسي شسوي لعد وانتي زعلتي ورحتي
ازل : لا مزعلانه ادري ماجنت تقصد
سجاد : يعني مزعلانه ابد ابد
ازل : لا مزعلانه ابد ابد
الاستاذ : انتباه طلاب بلا كلام

( بيت ندى )
اليوم هو يوم خطبتها وكل فتاه تتمنى ان ياتي هذا اليوم حيث تكون سعيده وفرحه لانها ستتزوج وستنتقل الى حياة اخرى بعيدا عن اهلها واحبائها ستكون لها عائله مستقله ستصبح زوجه وام وجده حتى تفارق الحياة هذه هي سنه الحياة
لكن الفرق بين ندى وفتاه اخرى ان ندى تتمنى الموت قبل ان تتزوج ولا تبدوا سعيده فهذا الشي من حقها لانها احبت بكل صدق مشاعرها لكن حبها كان من طرف واحد وهو لوحده عذاب تجلس في غرفتها تبكي بصمت تنظر الى صور سجاد المحتفظة بها تنهض من سريرها حامله الصوره تقف امام المرآة وتنظر الى نفسها ثم تمسح دموعها بعد ذلك تخرج قداحه وتقوم باحراق جميع صور سجاد لتتغير ملامح وجهها من بريء الى حادٍ وقاسي

( في الجامعة )
ازل وسجاد يجلسان معا في احد اماكن الاستراحه في الجامعة
ازل : سجاد ممكن اسولفلي عن حياتك
سجاد : يعني من اي ناحيه تريدين
ازل : من توفى والدك اشلون عشتوا انته وامك
سجاد : اني مااحب ارجع للماضي لان من اذكر اضوج
ازل : اووو اسفه والله مو قصدي بس ردت اعرف يعني
سجاد : لا ماكو مشكله راح افتحلج قلبي واسولفلج
ازل : ماشي سولف
سجاد : جنت بلخامس ابتدائي وجبت النتيجه مالتي ناجح وفرحان وصلت لشارع بيتنه شفت ناس ملتمه نسوان وزلم وهوسه وبواجي امي اني خفت رحت اركض اشوف اصار تاليها لكيت ابويه متمدد بلكع وادي سود ويابس امي شافتني كبل جتي حضنتني وباستني اني هنا مابجيت ابد ضليت بس صافن ومصدوم واول محجيت كلت ابويه شبي امي كالتلي اتكهرب كتلها يعني مات بعدين سحبني خالي وجرني طببني للبيت جوه وبقت امي تبجي وتنوح
ازل : الله يرحمه ويسكنه فسيح جناته
سجاد : بعد هاي عشت يتيم الاب وبس امي ومرت الايام والشهور اجه خالي لامي كللها جايبلج عريس هم ارمل وعنده بنات اثنين شتكولين توافقين لو لا ، امي ماوافقت كالت اضل اربي ابني ماريد ازوج بعد علي ميجي بعيني رجال خالي كاللها معناها عيشي روحج وابنج اني بعد مالي دخل بيكم
ازل : زين وعمامك ؟
سجاد ( يضحك): عمامي عمامي حالهم من حالنه هم فقره وديشتغولون بسوك عدي ثلاث عمام واحد يدفع عربانه لسه وعد اربع جهال واحد يبيع مخضر هذا مكضيها بس شرب وينام بفندق اجاره الفين الليله واحد سايق شاحنه ومزوج بس ساكن بشمال ولا واحد بيهم اجه دك بابنه وكال شمحتاحين ممحتاجين
ازل : وشلون عشتو لعد ؟
سجاد : بلبدايه امي كامت تشتغل ببيوت العالم تنضف وتطبخ بعدها اشتغلت خبازه وراها اشتغلت بمعامل اهليه واخر شي خياطه
ازل : الله يساعدها وانته شلون جان وضعك ؟
سجاد : اني اصعب فتره مرت بحياتي هي بسادس ابتدائي والمتوسطة تدرين بهاي الفتره جنت بس اتغده وبليل امي جانت جيب خبز يابس من الجيران وتنكع بمي وناكل اني بلمدرسه جنت اجوع واجوع كلش اشوف بقيه الطلاب يشترون اكل وشرب جنت اباوع على حلوكهم واكو منهم ميكملون الفه يذبوها اروح وراهم اخذها واكلها منا لمن كملت متوسطه بطلت وكمت اشتغل انواع الشغل ابيع علاليك وشكد جنت اتعارك بسوك وانكتل بس ابد ابد مامديت ايدي للناس وكلت لله يامحسنيين ، وبعدها كدرت ادرس مسائي اعداديه وهلشوفيني
ازل :  انته المفروض ينطوك وسام لمقاومه الحياة البائسة والصعبه
سجاد : حتى وسام ماريد الي اريده شي واحد ان اخلص امي من الشغل وترتاح جابت عمرها بس تشتغل وماتهنت بكلشي
ازل : زين ماحبيت ابنيه
سجاد (يضحك): لا
ازل : ليش تضحك لعد
سجاد : ازل الفقير لازم ميحب لان لو حب ماعنده شي ينطي غير بس قلبه واذا مااصارت اله قلبه ينتهي ويموت عكس الغني او الشخص المتمكن عادي عنده يكدر يحب اكثر من وحده بس الفقير يحب وحده بس لا غير

( الفقير أصدق العشاق لأنه لا يوجد ما يقدمه من الإغراءات سوى قلبه)

ازل : يعني اكو هواي فقراء عاشوا قصه حب وي بنات مستواهن المادي عالي وازوجوا بلاخير
سجاد : هذا الحجي الي كلتي بس بلافلام والمسلسلات وبروايات والقصص الحب الي يضحكون بيها على الناس البسطاء اما بلحقيقه مستحيل يصير لازم واحد يستغني عن الثاني اذا مو برادتهم فبالإجبار وينتهي العهد الي بيناتهم

( في الشركة )
اب ازل جالس في مكتبه تُدق باب المكتب يدخل شاب ويحمل في يده ملفات ينهض اب ازل من مكانه قائلا : اهلا احمد اشلونك
احمد : هله بيك عمي
اب ازل : اتفضل استريح ، شتشرب
أحمد : لا عمي مستعجل ابويه دز بيدي هاي الملفات وكال خلي يدققهن
اب ازل : عيفنه من الشغل والملفات كلي ليش ماجيت بعيد ميلاد بنتي ازل
احمد : والله عمي انشغلت كلش بلشركه وتدري بلمشاكل الي صارت بينه وبين شركه اللؤلؤة حتى ليل ما نمته
اب ازل : الله يساعدك المهم خلصت المشاكل وفكست اعيونهم واخذت حقكم
احمد : اي والله ، يالله عمي اني اترخص
اب ازل : احمد باجر معزوم يمي على العشه بلبيت لازم تجي
احمد : ان شاءالله
( احمد : شاب في عمر ٢٨ عاما رجل اعمال ويعمل في شركه والده لتجاره الأجهزة الكهربائية )

( بيت ندى )
ندى تتكلم مع ام سجاد في البيت قائله : خاله سجاد اليوم داوم
ام سجاد : اي طلع من الصبح وكال ارجع الظهر
ندى : وشغله تركه
ام سجاد : لا بعد يشتغل بس ابو الشغل انطا استراحه يومين مابين يضبظ وضعه بلجامعه
ندى : اهاا الله يساعده وويوفقه ان شاءالله

( في الجامعة )
يتمشى سجاد وازل بعد انتهاء الدوام
ازل : تعال ويايه اوصلك للبيت راح يجي توفيق يوصلني
سجاد : لا شكرا اروح وحدي
ازل : سجاد دتعال شبيك
سجاد : لا مااكدر والله اروح وحدي
ازل : زين انطيني رقمك
سجاد : شسوين بي
ازل : بطلت مااريد رايحه اني باي
سجاد يقف في مكانه قائلا : هو اني غبي لو استغبى
ياتي وراها قائلا : ازل لحظه اوكفي
تقف قائله: نعم شرايد
سجاد : يعني انتي مو كل كلمه والثانيه كبل تعيفيني وترحين ميصير هيج لو لان شفتيني فقير ووحيدي
ازل ( تضحك ) قائله : اي شسويتلك اني كتلك تعال ويايه اوصلك ماقبلت كتلك انطيني رقمك ماقبلت شسويلك بعد
سجاد : توصيل مااريد اشوفها صعبه عليه
ازل : اوك
سجاد : اما رقمي فعادي اخذي
ازل تبتسم قائله : اوك صار بعد تريد مني شي
سجاد : لا سلامتج ، بس راح ابقى وياج منا لمن يجي توفيق لان مو من شيم الرجل يترك انثى وحده بوسط الغرباء
ازل ( تضحك ): اوك ياحارسي الامين

( كم هي جميلة البدايات وياليت من نحبهم يكونون كما عرفناهم منذ اول لقاء جميلين من الداخل لا ان يتغيروا بمرور الوقت )

( بيت ازل )
تدخل ازل المنزل قائله : فاديه فداوي اني اجيت
لا تسمع اجابه منها تصعد الى غرفتها تطرق الباب قائله : فاديه ، فاديه ، فاديه
فاديه : جايتج لحظه
ازل : شنو جنتي نايمه
تقوم فاديه بفتح الباب
ازل : هاي شنو شو عيونج مورمه بس لا جنتي تبجين
فاديه : لا شكو ابجي بس من رجعت مااعرف شو بدن يحكني حيل غسلتهن وهسه صارن زينات
ازل : امشي نروح لدكتور مال عيون
فاديه : لا ميحتاج ،انتي استوج اجيتي
ازل : اي استوني اجيت
فاديه : خوش لعد اروح احضر الغده اني واتصل بابوج اشوفه شوكت يجي
ازل : اوك

( بيت سجاد )
تدخل الام الى البيت ليلا
سجاد : هله بسلطانه البيت لازم نسيتي عدج ابن
الام : اي يابني المره جلبت بيه وضليت يمها
سجاد : عساس ماعدها احد خطيه
الام : اتغديت
سجاد : اي
الام : اشلونه دوامك اليوم
سجاد : يخبل مثل عيونج
الام : الله يسهلك ابني ( تبدا بتثاوب ) اني اروح انام تعبانه كلش
سجاد : نامي

( بيت ازل )
ازل ماسكه بيدها هاتفها المحمول وتتمشى في الغرفه يمينا وشمالا قائله في (مخيلتها) : اتصل لا خاف نايم خل اتصل واشوف
تتصل به
سجاد جالس يشاهد فلم اجنبي في التلفاز يرن هاتفه يقوم بالتقاطه يرد قائلا : الو
ازل : مساء الخير سجاد بس لا نايم
سجاد : شنو هلصوت الحلو
ازل ( تضحك ): عرفتني
سجاد : واشلون ماعرفج  ازل
ازل : اي اني
( الباب يُدق)
سجاد : بس اشوف منو بلباب
ازل : ماشي
يضع هاتفه في جيبه دون ان يغلقه كذلك ازل لم تغلق الهاتف لفضولها لمعرفه من  القادم في هذا الوقت من الليل
سجاد : منو بلباب
ندى : اني سجاد افتح الباب بسرعه
يفتح الباب تدخل ندى الى البيت قائله : خالتي نايمه
سجاد : اي نايمه خير خو ماكو شي
ندى : اني انخطبت اليوم اجن النسوان وشافني واقتنعن
سجاد : طبعا يقتنعن وين يلكن وحده بجمالج واخلاقج
ندى : بس اني بعدني اريدك
سجاد : ندى اعقلي وروحي دنيا ليل والحجي ينسمع
ندى تقترب منه وتضع يدها على خده فيقوم بابعادها قائلا : هاي شبيج تخبلتي
ندى : اي تخبلت خبلتني انته مال ازوج واعوفك مستحيل
سجاد : ندى امشي طلعي برا ليصير غير حجي
ندى تقترب منه محاولة تقبيله فيقوم بضربها كف ( تستاهل قليله ادب )
ندى تضع يدها على خدها قائله : تضربني سجاد
سجاد : انتي جبرتيني يالله طلعي برا
ندى ( تصرخ باعلى صوتها): سجاد تضربني !!!!
سجاد : ولج اش سكتي لحد يسمعج ( يضع يده على فمها )
ندى ( تصرخ باعلى صوتها) : وخر عني ولك تضربني تريد تموتني سجاد !!!!!
يخرج بعض الجيران وكذلك ام ندى واب ندى وام سجاد على صراخ ندى ومازالت ازل تستمع من الهاتف كل الحديث الذي جرى

          نهاية البارت السابع