أعد لي هويتي - للكاتبة : أنجال

21

البـــــــــارت الواحـــــد والعشـــــــــرين ..
000000000000000000000000
لن أقبل صمتك بعد اليوم
لن أقبل صمتي
عمري قد ضاع على قدميك
أتأمل فيك.. وأسمع منك..
ولا تنطق..
أطلالي تصرخ بين يديك
حرك شفتيك
أنطق كي أنطق
أصرخ كي أصرخ
ما زال لساني مصلوبا بين الكلمات
عار أن تحيا مسجونا فوق الطرقات
عار أن تبقى تمثالا
وصخورا تحكي ما قد فات
أخبرني ماذا قد يحكي صمت الأموات
ماذا في رأسك خبرني

فاروق
00000000000000000
ام احمد منيره : اذكري الله ياميثه
ام مشاري : الا اله الا الله عليها تدور الشر تبي تغيضني بكلامها يكفي بناتي كل وحده بمصيبتها .. جواهر وزوجها وعهود وطلاقها والعنود وطيحتها قوليلي ياختي وين بصبر
ام شاهين : هدي يام مشاري ان شاءالله بتنحل عند ربك ..
ميثه بدموع : ما ادري وش تبي ام ضاري مني بس ما تبغى الا تغثني وتحر اعصابي وترفض ضغطي .. والله من وين ارد عليها تبي تحرني ..
جواهر : يما لا ترفعين ضغطك فديتك خليها وطلال ماهوب بمطلقني وبعرف كيف بجوي قلبها ..
ام احمد : خليها تلقينها غيرانه منك ومن لمت بناتك حولك .. خليها تولي وانتي اهم شي ما نبي الا سلامتك ..
شريفه : عز الله صاجه يامنيره خليها تولي وهي بكره بتشوف وجواهر الله يخلي لها التوام العيال بفرح فيهم طلال والله يخليكم لبعض ولا يفرقكم ..
ام شاهين : امين يارب ..الا ياميثه وش قالوا الدكاتره عن العنود ؟؟
ميثه بتنهد : والله هذي حالتها من شهرين غيبوبه والاوكسجين يقل ويقول دقات قلبها ضعيفه ..الرجا بالله ..
ام احمد منيره : ونعم بالله ياوخيتي خلي املك بالله كبير ..
ا مشاري : املي بالله اكبر من الدكاتره اللي جابها لي بعد 21 سنه بدعائي والحمدلله ماخيب رجاي وماراح باذن الله يخيبه هذي المره .. ياقلبي عليها كيف حالتها بالمستشفى تكسر الخاطر الوايرات والاجهزه من كل جهه .. وهي ياحبة عيني ما تدري عن اللي يروح وعن اللي يجلس ..

ام شاهين : الله كريم يشفيها ويخليها لكم وما يخيب رجاكم ..
جواهر تقوم من السرير بتعب ..:
ام مشاري : وين بتروحين ياجواهر .؟؟
جواهر : بشوف عهود ..
شريفه : انا بشوف العهود وين راحت اجلسي انتي..
جواهر : خاله خليك من عهود انا بقوم لها ..
ميثه : لا ياجواهر انتي تعبانه وعمليه كيف تتحركين ..
جواهر : يمه خليني اروح اختي وعارفه وش فيها من نار ..
ام شاهين : الله يكون بعونها صعبه تسمع خبر طلاقها وزواج مشعل بالسرعه هذي ..
شريفه تتنهد : وش نسوي ام يوسف اصدمتنا بالخبر ..
ام شاهين : والله انه عهود دانه وكثير اللي يتمنونها والله يوفقها وش نقول الخسران هو مشعل ..
ام مشاري تطيح دمعتها : جزاج الله خير يام شاهين ..وانا بروح لعهود وانتوا خلكم عند جواهر ..
شريفه : ابشري ..

تقوم ام مشاري من جناح جواهر الخصوصي بالمستشفى الخاص .. وتطلع من الجناح تدور بنتها عهود تمشي بالممرات المستشفى الا تشوف البنت اللي جالسه عند صوب الرسبشن الانتظار .. تقرب منها وتحط يدينها على كتفها
ام مشاري : لا تبكين يا عهود ..
عهود وبيدها مناديل وتشهق وتبكي : ااا يمه متى الناس تنسى
ام مشاري تجلس معها بالكرسي المجاور لها : عمر الناس ماتنسى ياقلب امك تحملي وادعي الله مايرد دعوة مظلوم .. الله معاك ادعيله قوي نفسك بذكر الله والا الناس ماعندهم الا الظاهر يامك ..
عهود : ليه يجرح قلبي ويخطب بسرعه ويحدد زواجه وانا سنتين انتظره وضيعت عمري علشانه .. خلاني افكر به بكل ثانيه فيه خلاني اتعلق به يا يمه حبييييييته كيف اشيله من قلبي يكفي انه جرحني بقراره وخلاني اندم بحبي الوفي له .. كل اللي سويته غلطه مايعرف فيها الا انا وهو ليه ما سترني وهو سبب هالغلطه كلها ليييه يمه بنتك غزااها الكره اللي ماعلمتيها به .. بتكمل الا تنخرط بالبكا ..

ام مشاري تمسك يدين بنتها وتقرب صدر بنتها منها : تعالي لا تطيح دمعتك وانا موجوده يا عهود
لا تكرهينه ادعي ربك بياخذ بحقك منه ..
عهود : حسبي الله ونعم والوكيل فيه
ام مشاري : روحي يا قلب امك للبيت ما ابيك تجلسين هنا وتتعبين اكثر روحي ارتاحي ..
عهود : ما ودي اشوف ابوي بالبيت ..
ام مشاري تتنهد : ابوك ........... ابوك الله يهديه انتي روحي غرفتك وارتاحي لين ارجع من جواهر ..
عهود : طيب بتصل على عثمان ياخذني ..
ام مشاري : وخليك من ام ضاري حرمتن عاجزه ما تسوي شي رمت كلامها لك الانه تعرف ماعندها شي تغيضني فيه الا بناتي .. الله يهديها ويسامحها ..
عهود : يما ربي لا يحرمني منك .. ولا من طيبة قلبك ليت الناس مثلك كان مافي قلوب كريهه نفس ام ضاري ..
ام مشاري : انا مصدقتك يا عهود الانك تربية يدي ولا تخافين يا قلبي نصيبك عند الله ما يضيع والله بيجيب لك الانسان اللي يحفظك ويصونك ويحب ..
عهود تنزل راسها : وش اسوي بحبه الي سكن جوفي ؟
ام مشاري : كل شي مع الوقت يروح ..
عهود : متخربطه بين حبي له وبين كرهي له ما اقدر يايمه ما اقدر انسااه كل السنتين اللي ملكنا وغيرها الخطبه كيف تطلبين مني انسااه ..
ام مشاري : بتنسييينه لما يجيك ولد الحلال اللي يسكن الجوف غيره ..
عهود : ما ظنتي بيطرق الباب احدن غيره .بعد سمعتي اللي وسخها هو الله يكوي قلبه مثل ما كوى قلبي..
ام مشاري : استهدي بالله ياعمري وقومي روحي لاخوك خليه يوديك ولا تفكرين به وبيعيه من تفكيرك ...
تقوم العهود تمسح دموعها وتتجه لمصعد بعد ما طمنت امها عن حالتها تتجه له ومخها شارد بـ مشعل .. كيف الحب يصبح سراب .. كيف الحب يصبح ذكرى ..؟ كيف يطلبوني انسى سنتين الا سنين من عمري وانا افكر فيه .. من صغري ونظاراته تحاصرني .. من صغري واسمه في اذني .؟ كيف كيف تطلبون منه يشوف غيري ..؟ّّ!! مافكرت فيني يامشعل ..؟ ماهميتك ؟؟ ودي ودي بس تعرف وش الجمره اللي بقلبي .. بتتزوج بهذي السرعه وانا اللي احبك نطرت اسنين علشانك ..؟
قلبي حبك وتبي الجد لو اشوفك بقول اكرهك .. وش ذنبي حطمت لوحة كانت اجمل لوحاتي .. خليتني اكره الحياة .. اكره مصيري .. كيف بعيش وانا اللي رسمتك معي بكل لحظه بمستقبلي ..؟
كيف هانت عليك ترميني وانا اللي متمسكه فيك ومستحيل لو يصير اللي يصير افرط فيك ..؟
لكن انت اللي بديت يا مشعل وتحمل اللي يجيك مني ..... وانا بنت عادل والله لتتحسف على قد شعرك على زواجك وانك فرط فيني براحة يديك ..
تنزل من المصعد وتشوف اخوها عثمان تحت ينتظر .. تركب معه السياره بهدووء ..

00000000

بجناح جواهر بالمستشفى ..
تدخل ام مشاري الجناح وتستغرب من عدم وجود ام شاهين وخواتها شريفه ومنيره ..
ام مشاري : وين راحوا ؟
جواهر : راحو يا يمه شافوك طولتي ..
ام مشاري : انا قايله لشريفه تجلس عندك ..
جواهر بتوتر : يمه اتصل طلال وقال بيدخل عندي ..
ام مشاري : اها اجل انا بجلس بالاستراحه لين تخلصون والله الله ياجواهر لا اوسيط لا تضيعين طلال منك ..
جواهر : مستحيل يضيع او اسلمه لهند مره ثانيه دامه يحبني وشفته بعيوني كل اللي سوا لي اخجلني واستحيت من نفسي بجد تصدقين يا يمه ما قال لامه انه شرالي بيت ولا خبر اهله انه بيرجعني .. كل توقعاتهم انه بيطلقني .. يما تكفين حدي فرحانه ودي اشوف وجه امه لما تعرف بالخبر ..؟
ام مشاري بضحكه : يارب لا يغير عليكم ويدوم فرحتكم يارب والله يسعدك يا جواهر ..
جواهر : اللهمه امين يارب ..

الا يطرق الباب ..
جواهر : اكيد انه طلال ..
ام مشاري : انا تحت بشتري لي شاي وجلس لين تخلصون واتصلي علي لا تنسين لما يطلع ..
جواهر : ابشري .. ادخل ..
طلال : السلام عليكم ..
ام مشاري وجواهر : وعليكم السلام والرحمه ..
ام مشاري : يالله استاذن ..وتطلع ..
طلال بعد ما تاكد خروج ام مشاري قرب من جواهر وكان عليها جلابيه ستان لونها بيجي ورافعه شعرها لفوق وحاطه كحل خفيف .. ومسنده ظهراها للخلف ..
طلال بابتسامه شاقه الحلق : هلا وغلا بالزين وام المزاييين ..
جواهر : هلا بك اكثر ..
طلال : كيفك اليوم لا شكلك احسن من امس اللي كله على البنج ..
جواهر : الحمدلله بفضل ربي ...
طلال : والكروشه ذي متى تروح ..
جواهر بخجل : لا ذي شكل مشوارها طويل ..
طلال : هههههههههه
جواهر : يعني تبيني والا تبي الكرش ..
طلال : يافديتك انتي والكروشه ..
جواهر : شفتهم ؟؟
طلال : ياحلوهم صغاار كثير ..
جواهر :هههه ما شفتهم ودي اشوفهم ..
طلال : صورتهم شوفيهم ياحبي كلهم يشبهون ليان ..
جواهر : قررت وش بتسميهم ..؟
طلال : والله محتار توام اعيال والله محتار بالاسامي ..؟
جواهر : طول حملي وانا افكر باسمين حلوين وقراب من بعض ..لكن ما اظن بتحب الاسامي ..
طلال : قولي وانا بوافق عليهم ..
جواهر : من جدك ما اظن بيعجبوك ؟؟
طلال : انت تعرفين انتي منوو ؟
جواهر بتعجب : انا ؟؟
طلال : ايه انتي .. انتي ما تدرين وش بقلبي مقامك .. والقلب ما يقدر يرفض لك طلب ..
جواهر براحه قلب : يافديتك انت شرايين هالقلب من غيرها ما تسوى بالدنيا شي ..
طلال : جواهر ..
جواهر : لبيه ..
طلال : لبيتي مكه يارب وش الاسامي الي ببالك ؟
جواهر : اياد وجهاد ..
طلال يفكر : ........
جواهر : ما عجبوك ؟
طلال : الا اعجبوني غريبين وحلوين يالله توكلنا على الله بس جهاد بخليه الكبير واياد الصغير ..
جواهر : اهم شي انك مقتنع فيهم ..
طلال : وكيف ما اقتنع وانتي امهم ؟؟
جواهر : يافديتك والله طلال تكفى انا اسفه على كل شي سويته لك وبعد عنك تكفى لا تضيعني مره ثانيه صدقني عندي الموت ابرك من بعدك ..
طلال يقرب منها ويحظنها بين بدينه : اسم الله عليك من الموت ياحبي ودنيتي وحياتي .. ما تصدقين فرحتي برجعتك حياتي من بعدك قريبه من الجحيم ..
جواهر تقاطعه : لا تكفى خلاص بننسى اللي فات ولا تذكره بنعده صفحة وحرقناها سويه ..
طلال : انا اوعدك من اليوم بظل ضلك وسندك وحياتك الجديده ..
جواهر : الله لا يحرمني منك يا ابو جهاد ..
طلال يبتسم : حلو ابو جهاد شوفي صوهم كيف حلوين ..
جواهر : يشبهونك .
طلال يحط راسها على صدره : هذا ثمرة حبنا ..
جواهر بضحكه : هههههه وبسقيها وسهر عليها علشان تدوم وتدوم ..
طلال : وانا لو تسقيني نظراتك بدوم وادوم وادوم ..
جواهر بخجل : هههههههه بس طلال ..
طلال : بس طلال يعني حاف ..
جواهر : ياعمري وحياتي وقلبي ياطلي ..
طلال بـ هوشه خفيفه بضحكه : طلي بعينك شايفتني خروف ..
جواهر : وانا انعجتك يالخروف ..
طلال : يافديتها والله ..
جواهر :طلال ..
طلال : ياعيون طلال ..
جواهر : البيت وش صار عليه ؟
طلال : قرب ينتهي ابشرك بس تجلسين فترة الانفاس عند اهلك وتلقينه خالص ..
جواهر : بجد والله ..
طلال : ايه والله وما خبرت احد فيه والبيت باسمك ..
جواهر : الله لا يحرمني منك
طلال : ولا منك ... الا بسالك امي جتك ..
جواهر بتضايق: ايه جت وياليتها ما جت ..
طلال بضيق : افا ليه عسى ماشر ؟
جواهر : لا تزعل مني .. من جت وهي مضايقه امي واختي عهود ..
طلال يتنهد بتعب : والله امي وش اسوي فيها ..
جواهر : من ادخلت وهي تقول لعهود ليه طلقك مشعل .. وتقول لي والله لخلي طلال يطلقك ويحرمك من اعيالك تبي تحرق قلبي ياطلال ..
طلال : هذي امي ياجواهر .. مهما كانت انتي بتكونين ببيتك وهي في بيتها .. تكفين ياجواهر قولي ان شاءالله وخليها لا تتحرشين فيها اذا بجد تحبيني ابعدي عنها واستحمليها ولا تردين عليها ..
جواهر : انا عشانك ابيع عمري علشان اشتريك ..
طلال : بس هذا اللي ابيه منك تكونين جنبي وتسمعيني وتسعديني ..
جواهر : فديتك يا ابو جهاد ..
طلال بدلع : قوليلي طلي ..
جواهر بضحكه اوجعت العمليه : ههههههههههههههههه ..

0000000000000
بالسياره ..
عثمان : وش فيك ياعهود من ركبتي السياره وانتي ساكته مو عهود الي معي ..
عهود تشوف الدريشه بهدوء : عهود اللي تعرفها ماتت روحها مابقى منها الا الجسد ..
عثمان : اسم الله عليك لا تخافي هذي فترى وتعدي ..
عهود : شهرين مروا وللحين الضيقه والذكرى ياعثمان توجعني ..
عثمان بشوفها ويسسوق : كل شي بالدنيا له فترى ويزول لابد بيجي يوم وينمحى بارادك انتي تقدرين تغيرين كل شي وترجعين عهود اللي اعرفها ..
عهود : ياليت ياعثمان ياليت ...
عثمان : وش رايك نزور العنود لي مده ما جيتها ..

عهود : وحشتني كثير الله يشفيها بجد ما تستاهل ..
عثمان يتنهد : حالتها صعبه ياعهود من النوع النادر اللي تشوفينها تقولين مافيها شي وتكذبين النظر بس لما تتضايق تثور حالتها النفسيه ويمكن تؤدي للموت تخيلي سويت دراسه عنها بجد ما توقعت كذا بتكون حالتها ..
عهود : بتطلع نفس ناصر شكلك ..
عثمان : بتعلم منه كل اللي اجهله وبالذات حالت اختي ..
عهود تتنهد بينها وبين نفسها : ابغى من يحل نفسيتي ويعالجها ..
عثمان : وش فيك سكتي وسرحتي ؟
عهود : ابد مافيني شي
عثمان احترم سكوتها وسرحانها وما كلمها الى ان وصل المستشفى اللي فيها العنود ..
عثمان : انزلي هنا على ما ادور مصفط للسياره ..
العهود : طيب بروح لها وانت بتلحقني ..
عثمان : انتظريني هنا بالانتظار ماراح اتاخر ..
العهود تتافف : طيب لا تتاخر ..
ويمشي عثمان بالسياره يدور مصفط للسياره .. وتجلس العهود بالانتظار ..
وتشوف الرسبشن والاطباء وتتخيل نفسها دكتوره نفسهم لكن ابوها حرمها من الحرم وجلسها بالبيت الانه فضحته .. نزلت دمعه حاره على خدها لما تذكرت كلام ابوها ..
ابو مشاري : والجامعه مافي بتجلسين من اليوم بالبيت وش تبين الدكاتره اللي يدرسونك عني بنته في شقق دعاره وش بيكون موقفي اجلسي بالبيت وعمرك ما درستي ..

كلمات هزتها وحرقت خدها وغير الموقف وطلاقها وظربها حست الحياة لا معنى لها ... انتبهة على عجوز تهذري يحركونها بالكرسي المتحرك .. وشاب توه باول عمره ماسكينه اثنين الانه مجنون .. احمدت ربها انها بنعمة العقل للحين والجنون تحسه باول بداياته ..
تصحو على صوت عثمان ..
عثمان : يالله نمشي ..
تتحرك وراء عثمان وتكشف حالات حوليها .. حالات تتحسر لوجودهم هنا .. رغم العنايه الا انه مرضهم النفسي مستحيل يتعالج من دكاتره من غير ما يتغيرون الناس حوليهم .. مثل العجوز اللي ما حولها لا بناتها ولا اعيالها اللي اتركوها بالمستشفى النفسي لاحول ولا قوه لها سوا اثنين من السسترات حولها .. وهم الشاب حوله عاملين والاكيد اهله رموا بهذا السجن قصدي المستشفى الكئيب .. محد عاجبه حياته محد عاجبه شي ..
حتى لو طاح الانسان ما يلقى من يلمه او يساعده .. مثل الطفله اللي شافتها فيها التوحد كانت جميله اول ما قربت منها لقت كرت عليها اسمها واسم الحاله اللي فيها .. علشان اذا ضاعت يعرفون وش حالتها .. حست انها بنعمه محد مقدرها .. رغم جمال الطفله انه الله بلاها بشي وعطاها شي جميل .. تمنت لو انها تملك لو ثانيه حالتها لتنسى اللي وجع قلبها ..

تمشي وراء عثمان وعيونها مره يمين ومره شمال وتفكر وتفكر باللي حولها فجاء يتكلم عثمان ..
عثمان : بطولين وانتي ساكته ترا ما تعوتك كذا ..
عهود تبتسم ابتسامه باهته : هههه وش اتكلم ..
عثمان يبي يكسر حاجز الصمت : يعني على ما نوصل غرفتها ..
عهود : وصلنا قصدك ..
عثمان يبتسم : هههه ..
يدخلون الغرفه ..
والعهود اول ما شافت حالة اختها جتها الخنقه بصدرها .. كيف الاجهزه عليها وعلى فمها نفس الواير للاكسجين وكيف عيونها مسكره باللصاق الابيض .. ويدينها فيهها المغذي وشعرها حولينها طايح ..
تقرب منها العهود وتمسح يدها بشعر اختها وتدعي وتسمي وتطيح على خدها دموعها .. وتصيح بقوى ..
عهود : كله مني ياعنود كله مني انا خليتك تطيحي ودمرت حياتي ..
عثمان :تعوذي من ابليس هذا مقدر ومتكوب ..
عهود : لا هي شافت ابوي يضربني ويهاوش وكان وضع البيت يخنق هي ما استحملت وشافت شي ما تمنته بحياتها .. تمنت تروح للوحده والحريه ابرك من انها تشوف ابوه اللي كانت تنتظر منه الحنان تشوف منه الوجه الثاني العصبيه والصوت العالي ..
عثمان : لاحول ولا قوته الا بالله يابنت ترا بجرك مع شعرك اذا ما سكتي ..
عهود : عثمان حالتها تخوف اللي كذا ما اظن بتعيش ..
عثمان : كل شي على الله لا تتفولين عليها..
عهود : ونعم بالله . (وعيونها على عنود ) بطول حالتها يا عثمان ..؟؟
عثمان : ما عندي خبر ...
الا يدخل من غير ما يدري الدكتور ناصر ..
ناصر : اسف على بالي مافي احد ..
عثمان يقرب منه : هلا والله الدكتور ناصر كيف حالك ..
ناصر : هلا والله فيك الحمدلله تمام وانت كيف حالك ..
عثمان : تمام نحمد الله ..جيت اتطمن عليها اخبارها اليوم ..
ناصر وعيونه على العنود : الحاله للحين مستقره وهذا الشي حلو ..
عثمان : والاوكسجين اللي ينزل ويصعد ؟
ناصر : شي طبيعي الانه الحاله توها استغرت ..
عثمان : في امل ان شاءالله ..
ناصر : باذن الله ..
ويكشف على العنود ويقوس الضغط .. والتنفس ..
عثمان : اجل نخليك يا دكتور ناصر ..
العهود تهمس لعثمان : خلنا نجلس شوي بقراء عليها قران ..
عثمان : انا لازم امشي وراي اشغال .. ويهمس لاخته : بعدين نجيها على راحتنا ..
ناصر : الله معاك ..
ويمشي عثمان وعهود الي تتحلطم له ..

ناصر يجلس على طرف السرير ويحط يدينه على جبينها ويقرا عليها من المصحف اللي اقباله ..
ويقرا لين خلص سورة الانعام ..
وقبل المصحف وجلس اقبالها ويسوالف ..
ناصر : العنود ادري تسمعيني الحين .. اصحي الكل ينتظرك .. شهرين ما اشتقتي للاهلك ؟؟ لامك لابوك .. اصحي اغلبي المرض اللي داخلك .. عارف ماتعرفين اللغه اللي اتكلم بها لكن بتحسين باني اناديك لتصحين .. انا اشتقت لك واشتقت لهرجك وطيشك .. الله يهدي ابوك صحيح كان منفعل لكن تاكدي انه يحبك لا تكرهينه الانه الابو عمره ما كره اعياله .. يمكن يتضايق بس مستحيل يدخل بقلبه ذرية كرهه لهم ..
سامحيه يالعنود .. انتِ جوهرة وعارف بانه الجوهرة اذا انخدشت تفقد ربع جمالها الروحي .. اصحي كلهم يحبوك شوفي اخوك عثمان واختك زايرينك .. مشتاقين لك ..
طولتي عليهم .. اصحي حتى ديفيد يتصل يتطمن عليك .. الكل مشتاق لك وانا اولهم ياعنود ..

يشوف عيونها المغمضه .. وفمها المفتوح مدخلين عليها الاوكسجين وحالتها ضعفانه وذبلانه ..

يشغل جهاز صغير فيه القران يتطلع من الغرفه وكله امل في شفاها ..

0000000000000

بالمستشفى عند عادل .. كان يكلم مشعل ولد اخوه قايل له تعال بمكتبي بالمستشفى ..
كان المكتب بعيييد كل البعد عن المرضى والمراجعين الانه دكتور كبير له جناح وله سكرتيره خاصين به ..

مشعل : عمي لا تطلب مني ارجع العهود ..
عادل : كيف تخطب غيرها انا خليتك فتره تفكر فيها ..
مشعل : اسمحلي ياعمي عهود ماعاد ابغاها..
عادل : كيف ما تبغاها ؟؟
مشعل : انا طلقتها وانت تعرف السبب ..
عادل بصوت عالي : بسببك انت وبنتي مالها أي علاقه فيهم وانت اعترفت انهم يدورون لك كميد .. كذا تفضحني بالعرب يامشعل .. تخلي سيرة بنت عمك بكل لسان .. تخلي الناس تفضحنا وتاكل وجهي .. يرضيك عارك من اهلك ينفضح والسبب كميد لك .. وش دخل العهود به ؟؟ قلي وش علاقتها بالمصيبه اللي صارت لها قلي .. كله من فعايلك معهم .. وبنتي خبله طاعتهم علشانها تحبك .. والحين تخذلها وتخذلني ياولد اخوي وتطعني وترميها وتنشر بلوتها على كل لسان ما توقعتها منك توقعتك تستر عليها وبعدها سوا الي يريحك ..

مشعل : اسمح لي ياعمي انا من بعد الموقف ماقدرت اصدق اللي شفته عيوني انها بين اثنين ومكشوفة الراس والملايس الداخليه ..
يقاطعه عادل : عهود مالها علاقه فيهم كل الي صار انت تعرفه ..
مشعل : ايه اعرفه ولا ابي أبيها تكمل معي المشوار من يدري بكره تصدقني ويصير اللي يصير وانا مدري ..
عادل يعطيه طراق من غير ما ينتبه مشعل الا بالكف الحار على وجهه : استح على وجهك بنتي متربيه يامشعل احسن تربيه واذا راحت من خوفها عليك .. ولو انت حاط نفسك بموقفها اكيد مابتسكت الا تدور وراها .. عطها فرصه وتزوجها وسكت حلوك خلق الله ..
مشعل : بعد الكف تطلب مني اتزوجها بالقصب خلاص النفس عافتها ..
عادل بصوت عالي ويعض اسنانه .: يعني تعاندني يامشيعل هذا اللي راباك ابوك عليه .. تطعن بنات عمك وتخلي دمهن يسر .. ترا والله اذا ما تزوجتها لكرها نفس الخروف ميته ..
مشعل بخوف : انا ما عندك بس ماعاد للنفس خاطر ..وليه تذبحها دامك متاكد انها ما سوت غلط ..
عادل : اجل تزوجها ..
مشعل : الحياة والزواج ماهي اجبار ياعمي ..عن اذنك ..
عادل : مابتطلع الا وانت مملك عليها ..
مشعل : ملكتي وعرسي بعد اسبوعين ياعمي ..
عادل : روح واخذ بنت الغريب اللي ما تدري عنها وخل بنت عمك وشرفك اللي ماخليت احد ما قلته سبب طلاقك منها خليتها مكسوره وسيرتها على كل لسان وهي اطهر منك .,. روح الله لا يوفقك ولا ييسر امورك ..
مشعل : ماراح ارد عليك انت عمي وكبير ..
ويطلع من غير ما ينتظر منه رد ..

عادل يتنهد بتعب ويجلس بكرسيه ويفتح زرار الدشادشه الاول يحس انه مختنق وده يقتل هالمشعل باسنانه ببروده وقوت عينه ..
ندم انه ضرب بنته وحرمها من الجامعه علشان واحد بارد لا قلب له .. لواحد بنته ضحت لنفسها وسمعتها علشان تتاكد من حبها له .. واحد ما يستاهل يعطيه دره يحافظ عليها سنتين كان مخدوع فيه .. جلس على المكتب وهو متضاايق الا يدخل عليه دكتور توه يتتدرب عنده لسه ما اخذ الشهاده الدكتوره ....
انس : استاذ فيك شي ؟
عادل يرفع راسه : هلا انس ..
انس : في شي ..؟
عادل استوعب : لا بس تعبت شوي ..
انس : اشوف لك الضغط ..
عادل ياخذ نفس ويسند جسمه للخلف : لالا خلني ارتاح شوي
انس : بجيب لك عصير برتقال تروق ..
عادل بتعب : لا خلك يا انس بجلس اسوالف معاك
انس بابتسامه : خير يا دكتور ..
عادل : ماشاءالله عليك كل درجاتك بالتدريب امتياز ..
انس : كله بفضل الله ثم فضل تدريبك يا دكتور ..
عادل : كل شي من الله له الفضل انا ما سويت الا اللي علي واقل ..
انس : لا يادكتور عادل انت علمتني للعمليات والخياطه وكيف اسوي اشياء ماتعلمتها من كتب تعلمتها بطرايقك الخاصه ..
عادل يرفع جسده ويرتكي على الطاوله المكتب : خلنا من الكتب والدراسه الا بسالك يا انس ..
انس : سم يادكتور ..
عادل : انت متزوج او خاطب ؟؟
انس : لا والله يادكتور ما نفكر الا بعد ما نتخرج من الميداني ..
عادل : حلو ..
انس : وش الحلو يادكتور ..
عادل : يقولون اخطب لبنتك ولا تخطب لولدك ... وانا الصراحه عندي بنتي كبرك وخريجة طب اسنان .. وانت ولد ونعم فيك اخلاق ودين ودراسه .. وانا كذا مره اشوفك ومعجب بصراحه فيك .. وعندي بنت ودي انك تتزوجها طبعا الشور لك ولاهلك .. واذا رفضت ياولدي لا تخاف ماراح اتغير عليك لكن انت عاجبني وودي يكون عندي زوج بنت مثلك ومنها تنافسني وتتعلم اشياء كثيره مني ..
انس مصدوم : أأأأأأ والله يا استاذ لي الشرف والله بكريمتك .. لكن انت بصراحه صدمتني ..
عادل بضحكه : ههههههه عارف
انس : لكن انا بعدي ما تخرجت ..
عادل : لا تخاف كل اللي ابيه الحين تملك وتتزوجها ما ابي فيها مهر الا اريالين ..
انس انصدم من المهر : ليه اريالين ..
عادل : هههه كل ما قل المهر كثرت بركته يا انس ..
انس يسكت : .......
عادل : ودي اقولك شي عنها قبل لا ترتبط وقول لاهلك واذا ودك تشوفها قبل الخطبه ماعندي مانع .. لكن البنت قبل عرسها بولد عمها طلقها .. والسبب الانه (يتنهد ) ما يبيها ما دخلت مزاجه .. ولا هي في خاطره ملكة اعيال عم وما يبي العادات بالزواج .. وبس هذا سبب طلاقها .. اسال عنها اذا حاب ..
انس : افا اسال عنها وهي بنتك بس اسمحلي انا لازم اخبر اهلي ما اقدر اعطي الموافقه وانا ما شرت اهلي ..
عادل : اهلك لهم حق وتصل علي باي وقت اذا تبي تشوف البنت عادي وتسوالف معها وتشوف اخلاقها وتسوالفون ماعندي مانع بس بعدها اسمحلي اذا كتب لكم الله ملكه ما تشوفها الا بعرسكم ..
انس : هي بنتك وانا افتخر في تربيتك لها هههههههههههه انت دخلت بالملكه يا استاذ ..
عادل بهدوء وابتسامه : بصراحه انت انسان ما يتعوض ماشاءالله عليه .. كل رجال عنه بنت يتمنى يكون نسيبه انت ..
انس: لا تمدحني يا دكتور وراي عمليات ما اقدر اركز بعدها ..
عادل : هههههههههه متى ما حبيت رد لي الخبر ولا تستحي بالرفض ..
انس : طيب .. فمان الله بمشي تبغى حاجه ..
عادل : الله معك وركز بالعمليه ..
انس بضحكه : ههههههه ابشر استاذن ..
عادل : اذنك معاك ..
ويمسك جواله ويتصل في العهود ويلقها بالسياره مع عثمان ..
عادل : الووو
عهود : هلااااا يبه
عادل : وينك
عهود بهدوء وخوف : مع عثمان راجعه من العنود ..
عادال: وكيفها اليوم ..
عهود بخوف : مثل حالتها وشفنا الدكتور ناصر ..
عادل : كويس .. الا عهود وش صار باوراقك بالجامعه ..
عهود : مشاري وقف قيدي .
عادل : حلو انا برد اوراقك بكره ومن بكره تلحقين رفايقك بالمذاكره والاختبارات .. بس لا تفشليني بالاختبارات بمقبول ابيهم امتياز هذا اخر كورس لك ابيك تبيضينها وانا ابوك ..

عهود استغربت اسلوب ابوها وكانه يصحح الغلط اللي كسره بداخلها .. لكن افرحت انها بترجع للجامعه ..
عهود بعدم التصديق وفرح : بجد يا يبه برجع للجامعه ..
عادل : ايه بترجعين وتجيبين امتياز وترفعين راس ابوك ياعهوده ..
عهود بفرح : مشكور مشكور يا يبه بجد فرحتني بالخبر الدراسه ..
عادل : اهم شي ابيك عهود اللي اعرفها واللي اول ما ادخل البيت تبتسم ما تنحاش لشوفتي وتخاف ..

عهود تحس ببكيا بجوفها ماقدرت تحبسها كلام ابوها ونبرته واسفه ودها لو كان اقبالها تحضنه وتقبله بكت من غير ما ترد عليه ..
عادل : افا تبكين ياعهود تبكين وابوك عندك ..
عهود : انا اسفه يبه بجد اسفه انا غلطانه ..
عادل : لا تتاسفين انسي السالفه وشمعيها بالشمع الاحمر ..
عهود : ابشر بس انت راضي علي ..
عادل : كل الرضا يابنتي الحلوه عهوده ..
عهود : الله لا يحرمني منك يالغالي ..
عادل : ولا منك يالملسونه ..
عهود بضحكه : هههههههههههه
عثمان بالسياره : وش السالفه تضحكين وتبكين سلامات ياختي ..
عهود : عثمان بس خلني اكلم ابوي ..
عادل : اخليك ياعهود عندي شغل بكمله . بس حبيت اعطيك خبر من بكره تروحين مع مشاري تكملين اوراقك وتلحقين على الاختبارات اللي طافتك ..
عهود : مشكور يالغالي ..
عادل : ابيك تبيضينها بالامتياز ..
عهود : ابشر من عيوني ..

انتهاء الجزء الواحد والعشروووون
عارفه انه بارت قصير وبسيط .. لكن لنا تكمله بعد رمضان باذن الله..
عارفه بتقولون الروايه بتفقد رونقها .. لكن اسمحولي بين فطور واعيالي وبين جماعتي والصلاة والقران ما اقدر اسيطر على وقتي .. التكمله باذن وراء رمضان باذن الله لا تخافون بكملها والله بس والله ظروفي بالشهر صعبه شويتين ..واللي يحبني بينتظرني ..كونوووا بالقرب مني ..


نتواصل انجال