بنوته عاديه عايزه تلتزم

الحلفان او القسم

الحلفان 🌸

الحلفان او القسم من الحاجات اللي فيها كلام كتير و للاسف ناس كتير ماتعرفش حاجه عن احكامه و توابعها و بيتساهلو فيها جدا بطريقة مهلكه :/ .. خلينا نتكلم شوية عن بعض الحاجات دي اللي ممكن كتير منكم ما يبقاش عارفها :

* أول حاجه لازم نبقى عارفين طبعا القاعده الاساسية (( من حلف بغير الله فقد أشرك )) .. يعني الموضوع مش هين ...

و كل ما يشمل : ( و النبي .. و الكعبة الشريفة ... و حياتك .. و رحمة امي ... وشرفي ..  الخ .. ) .. دي بمجرد النطق بها بغرض الحلفان فقد أشرك ( شرك اصغر ) و عمل كبيرة من الكبائر  و محرم من المحرمات  .. لدرجة ان عبد الله بن مسعود كان بيقول انه يفضل انه يحلف بالله كذب و لا انه يحلف بغير الله من كتر ما الحلف بغير الله شيء عظيم
طب المفروض اللي وقع فالموضوع ده يعمل ايه ؟؟ (( سواء كان حلفه كذب او صدق ))
- يستغفر من ربنا .. و يقول كلمة التوحيد ( لا اله الا الله ) مع التوبة و النية لعدم الرجوع مرة تانية
(( عن سعد بن أبي وقاص  أنه حلف باللات والعزى، فسأل النبي ﷺ عن ذلك فقال: قل لا إله إلا الله وحده لا شريك له، له الملك وله الحمد وهو على كل شيء قدير، وانفث عن يسارك ثلاثًا، وتعوذ بالله من الشيطان الرجيم ولا تعد  ))

** نقطة مهمه .. ان لو حد حلف بغير الله و بعد كده حنث الحلفان ده يعني عمل عكس اللي حلف عليه .. لا تجب عليه الكفارة بتاعت الحلفان لانه اساسا بنسميه يمين غير منعقد يعني اساسا هو حلفان حرام ولم يقع و بالتالي ملوش بقيت احكام الحلفان بالله (( بس ده لا يمنع انه يعمل اللي قلنا عليه فوق ))

طب ولو حلف بغير الله علشان الحاجه اللي حلف بيها دي هو معتقد عظمتها و ان ليها شان زي انها بتنفع او بتضر او انها ممكن تبقى واسطه لربنا زي مثلا الناس الصالحه علشان كده هو بيحلف بيها  .. زي مثلا اللي بيحلف ب : ( و الحسين .. و المرسي ابو العباس .. و السيدة زينب .. و النبي .. الخ ) .. فده و الله اعلم نوع من انواع الشرك الاكبر .. يعني اللي بيعمله ده من غير ما يدري بيخرج تماما من ملة الاسلام و المفروض ما يتصلاش عليه و لا يدفن في مقابر المسلمين و لا يورث و لا يتورث الا لو تاب و نطق بالشهادتين (( و بالمناسبة زيهم زي اللي بيروحو المزارات بتاعت الصالحين و يقعدو يكلمهوهم و يدعولهم ))

في بقى نقطتين بقى ناس بتستسهل فيها اوووي و بقت عاملة زي اللبانة في بؤ الشباب و هي فالواقع حوار كبير .. اللي هما الحلف بالحاجتين دول (( عليا الطلاق .. عليا الحرام من ديني )) .. و بالمناسبة اللي بيحلف بالحرام من دينه ده وهو مش فاهم معناها يعني : ان هو بيقول كل شيء  ربنا محلله ليا في دين الاسلام حرام عليا .. و اللي من ضمنها الزوجة لو اللي بيحلف ده كان متجوز و ده بيدخلنا في دوامة تانية هل ده المفروض يكفر كفارة ظهار ولا لا و هل اللي حلف بالطلاق ده و حنث او اللي حلف عليه ما يحصلش حصل ... هل مراته مطلقة و لا لا ؟؟؟ ..الموضوع فيه تفرعات كتير اوي و اللي يقع فيه لازم يستفتي شيخ ثقة و نفس الكلام برضه للي حقيقي بيستهبلو و بيحلفو بغير ملة الاسلام و دي انتشرت برضه ..  زي اللي يقولك لو ماعملتش كذا ابقى كافر ولا حول و لا قوة الا بالله .. لان في حديث بيقول : مَن حلف بملَّة غير الإسلام كاذبًا متعمِّدًا، فهو كما قال .. بالتالي محتاج يسال فيها شيخ ثقة

**  حاجه من الحاجات اللي الناس ممكن ما تاخدش بالها اساسا انها حلفان .. لفظ (( يعلم الله .. ربنا العالم )) .. ماينفعش ابدا نقولها غير واحنا متاكدين من الحاجه دي .. انما لو شاكين او لو بنكذب ما ينفعش نقولها لانها تعتبر من الكذب على الله و من فل ذلك فقد كفر و الله اعلم

......
** طب بالنسبة بقى للحلفان بالله 🌷 .. ده حلفان واقع و اللي يقوله لازم يلتزم بيه .. بس في 4 نقط عابزين نتكلم فيهم :
- اول نقطة .. لو انا بحلف على حاجه و ممكن قدام انقضها او علشان احمي نفسي من دوامة تكفير الحلفان و كده ففي حاجه حلوة جدا ممكن نعملها و هي اننا نقول على طول بعد الحلفان ( ان شاء الله ) .. و احنا في نيتنا اننا نعلق الحلفان ده بالمشيئة مش مجرد لتاكيد الككلام يعني .. فلو انت حلفت على حاجه و قلت ان شاء الله و بعدين عملت عكسها باذن الله مش عليك كفارة .. قال رسول الله «من حلف فقال: إن شاء الله, لم يحنث»

- تاني نقطة .. لو انا حلف على حاجه و عملت عكسها .. طبعا لازم كفارة للحلفان ده ... طيب ايه كفارة الحلفان ؟؟
للاسف المشهور بين الناس ان كفارة الحلفان هو صوم 3 ايام .. و ده غلط جدا .. كفارة الحلفان على الترتيب : اول حاجه هي اطعام 10 مساكين او كسوتهم (( وياكتر الناس الغلابة حوالينا و الموضوع متاح جدا )) .. فلو ما لقاش يبقى عتق رقبة .. فلو ما لقااااش اااخر حاجه خالص هي صيام ال 3 ايام (( و ما ينفعش ننط على اخر واحده على طول ))

- تالت حاجه : لو انا حلفت على حاجه بس لو انا عملت عكسها هيبقى هو الاحسن و الخير .. زي مثلا اني في لحظة غضب حلفت اني ما اصلش رحم او اني ما اخليش مراتي تزور اهلها .. الخ .. بس طبعا ان مراتي تروج لاهلها او اني اكسر الحلفان ده و اروح اصل رحمي ده هو الصح .. يبقى المفروض اني اكسر الحلفان ده و اعمل الصح و اعمل الكفارة

- رابع حاجه : ان المفروض اصلا ما نحلفش غير فالشديد القوي .. (( لا تجعلوا الله عرضة لايمانكم ))

ده جزء من موضوع الحلفان يارب اكون افدتكم فيه .. اسالكم الدعاء 💙🌷