بنوته عاديه عايزه تلتزم

العبادات اللى نركز عليها ف العشر إلاواخر

كل حد هيشوف الكلام دا بسببك ويعمل بيه .. هيكون ليك نفس اجره بدون ما ينقص من اجره شيئ !!
العشره الاواخر من رمضان .. ربنا قال عن ليلة القدر : ليلة القدر خير من الف شهر .. يعني لو عملت فيها اي حسنه افضل من انك تعملها في  84 سنه في الايام العاديه  !! مُتخيل الرقم الرهيب !؟ ليلة القَدر هي ليله فرديه محدش يعرف اي يوم بالظبط ف الايام الفرديه  ( 21 . 23 . 25 .27 .29 ) هي يوم من الايام دي .. عاوزك تلحقها يا صديقي ...
انا جبتلك شوية افكار تعملها .. في العشر ايام دول وان شاء الله ثوابهم عظيم .
أولاً : تِخلص النيه لله تبارك وتعالي وانك هتعمل الحاجات دي لله ومتقلقش امور بسيطه :))
ثانيًا : عاوزك تطلع كُل يوم 10 او 5 جنيه او 3 او جنيه واحد لله .. هتقولي ليه ؟! هقولك لان لو اليوم اللي طلعت فيه الصدقه صادف ليلة القَدر ! افضل من انك طلعت صدقه لمدة 84 سنه متواصل صدقه !! مُتخيل الثواب الرهيب ؟! ..
#ثالثًا : الاستاذ عمرو دياب .. منير .. انغام .. اصاله اي مُطرب انت بتسمعه .. اعتذرله وقوله اسف مُش هسمعك الـ 10 ايام دول .. واسمع قُران .. لانك لو سمعت قران في العشر ايام دول !! افضل من  سمعاك 84 سنه قرآن !! الامر مُش هين زي ما انت فاهم ! لعل الامر دا ينجيك من النار يا صديقي !! ..
ثالثًا : لو قولت كُل يوم : 100 مره " لا اله الا الله .. استغفر الله العظيم .. سُبحان الله .. افضل من ذكرك الله 84 سنه !! " ياسلام !! :))
رابعًا : ربنا قال : تتنزل الملائكه والروح فيها .. يعني الملايكه بتنزل من السماء والروح يعني سيدنا جبريل الروح القُدس بينزل معاهم .. ليه يا صديقي بينزلوا ؟! عارف بيكون عددهم كام ؟! اكتر من عدد رمَل  وحصي الارض !! نازلين ليه ؟! نازلين لُمهمه واحده فقط .. انك تدعي فهما يقولوا : آمين " وراك ! دي كُل مهمتهم !! ادعي كتير يا طيب عاوز تتجوز " بنت بتحبها ؟! قول يارب ارزقني بيها  ! والملايكه هتقول آآمين وصوتهم يسمع ف السما !! عاوزه ربنا يهدي جوزك الخنيق البخيل👐 ! قولي يارب اهديه وربنا هيستجيب لان اللي بيأمن الملائكه ! اقرب عباد الله الي الله  .. النبي قال ان المُسلم لو استغفر او دعي للمسلمين والمُسلمات ربنا هيعطيله علي كُل مُسلم حسنه عارف يعني ايه !؟ يعني امة الاسلام مليار و 300 مليون بُني آدم  ! لو قولت يارب ارحم واغفر للمسلمين والمُسلمات في ليلة القدر هتاخد مليار ونُص حسنه بدعوه !! ومُش بس كدا بل افضل 84 سنه دعاء ..
خامسًا : بالله عليك اعزم حد ع الفطار " انا عن نفسي معنديش مُشكله .. اكتبلي العنوان وجايلك 😂اعطيك الثواب #بهزر_طبعًا ربنا يجعله عامر😄 .. ولكن فطر صائم ولو بتمره افضل من انك فطرت صايم 84 سنه .. يا ربنا !! :))
الليله دي لابد نلحقها يا صاحبي ! مهما كانت الظروف لابد منسبهاش .. لو سبت ذنب في الليله دي وانت مستمر عليه !! كأنك تُبت وتركت ذنب من اجل الله افضل من 80 سنه  توبه!!
#سادسًا : بكل كلمة حاضر تقولها لامك او لابوك ومتشوحيش بايدك او تنفخي او تُردي او انت تعلي صوتك علي والدك .. هيتكتبلك ثواب البر سنين طويله يا صديقي .. عارف ان ابوك صعب شويه والدتك مبتفهمكش.. بس كُون جدع واصبر وبرهم لعل الله يرزقك بولد صالح يبرك ويكون عُكازك علي الدُنيا وع الايام !  #صدقني انا بكتب البوست وامي بتحدفني بالمخده فـ دماغي حاجه غُلب خالص 😂.. ببرك لاهلك ربنا هيكون فرحان  جدًا بيك وقتها ومتجيش امك تزعقلك تبص فـ النتيجه ! تلاقيها ليله فرديه تقولها خدامك يا حاجه .. ليله زوجيه تقوليها عاوززه ايييييييييييييه ارحميني يا وليه انتي😂! يا حبيبي مينفعش !! اتق الله فيهم ف كُل وقت وكُل لحظه هتكبر جدًا في نظر الله )
#سابعًا : القيام يا طيبه .. القيام يا مُحترم .. اهم شيئ .. الصحابه بيقولوا ان النبي كان في اول عشرين يوم من رمضان بيصلي وبينام .. لكن اخر عشر ايام مكنش بيغمض عيونه وينام !! كان بيصلي .. بس انا مُش عاوزك تصلي طول الليل يا طيب .. انا عاوز منك كُل ليله فرديه تصلي نُص ساعه بس قيام ليل صفحتين فـ كُل ركعه في اوضتك تختلي بنفسك مع ربنا .. هقولك المعاد اللي تنشن عليه فـ الجول " ربنا بينزل من السماء في الثُلث الاخير من الليل صح ؟! اذا " من الساعه 1 لحد 1 ونص .. ملاقيش واحد يمسك ساعه فـ ايديه وهو بيصلي واول لما الساعه تِدُق 1 ونص يقوم .. لا يا حبيبي 😄!! احنا هُنخم ! عيش مع ربنا وحس بلذة القُرب من الله وفضفض وبوح يا ابو قلب كُله جروح ..
تلقي الجراح طابت منك اوام غابت .. :))
#ثامنًا : 4 صفحات قران تقراهم كُل يوم .. وِش بس .. مُش مطلوب اكتر من كدا :))
#تاسعًا : اضحك فـ وشوش الناس بكل ضحكه هتاخد ثواب صدقه .. افتح بوقك 😂 .. هتلم حسنات بالهبل.. وحافظ علي الصلوات الخمسه لان صلاتك هتكون افضل من صلاة  84 سنه .. والله ثُم والله فرصه لا تُعوض .. مين ضامن اني هعيش لحد ليلة قدر جديده ؟! اذا استغلها حاليًا :))
وربنا يتقبل مننا جميعًا يا صديقي الطيب .. ورمضان مُبارك عليك وعلي كُل حبايبك ^_^ ❤