بنوته عاديه عايزه تلتزم

صلاه العيد 💃💃

*_صلاة العيد_*💜🌸
يلا بينا نصلي ع النبي🌸

*_أولا وقت صلاة العيد🌸_*
بتبدأ من ارتفاع الشمس قدر رمح يعني بعد طلوع الشمس بحوالي ربع ساعة وبتستمر لقبل الظهر بحوالي ربع ساعة برضو.. *زي وقت صلاة الضحى لو تاخدوا بالكم😉*

*_عدد ركعات صلاة العيد🌸_*
بتكون ركعتين...
ومن المستحب ان البنات يخرجوا يصلوها ف المساجد حتى لو عليكي البريود اخرجي ف وقت الصلاة بس متصليش معاهم طبعا..
انتي بس هتحضري فرحة صلاة العيد وهتستمعي للخطبة وكدة💜🌸

*_السور اللي بنقرأها فيها🌸_*
من سنة الرسول صلى الله عليه وسلم انه كان بيقرأ بسورة الأعلى ف الركعة الاولى وسورة الغاشية ف الركعة التانية أو بسورة ق ف الركعة الاولى وسورة القمر ف الركعة التانية..
لكن لو الامام صلى بسور غيرهم أو انتي لو عاوزة تصلي ف البيت بسور غيرهم فعادي طبعا💜

*_عدد تكبيرات صلاة العيد🌸_*
*الركعة الاولى* بتكون 6 تكبيرات غير تكبيرة الاحرام والبعض قالوا انها بتكون 7 تكبيرات غير تكبيرة الاحرام..عادي الاتنين صح بس أغلبية المساجد بيتصلى فيها 6 تكبيرات غير تكبيرة الاحرام..
*والركعة التانية* بتكون 5 تكبيرات غير تكبيرة القيام..
متلغبطين صح🤔..
طب يلا تعالوا معايا نفسر هنصليها ازاي💫
صلوا ع النبي الاول بقى💜🌸

*هنصلي صلاة العيد ازاي🌸*
ركزي معايا كويس جدا..
فى الركعة الاولى هنبدأ طبعا بتكبيرة الاحرام..أول اما الامام يقول الله أكبر هنرفع ايدينا ونقول الله أكبر بعد كدة من سنة الحبيب صلى الله عليه وسلم اننا نقول دعاء الاستفتاح ولو مش عاوزة تقوليه عادي لكن الأفضل انك تقوليه طبعا..
بعد كدة هنكبر 6 تكبيرات غير تكبيرة الاحرام يعني كل اما الامام يقول الله أكبر ترفعي ايدك وتقولي الله أكبر وممكن ترفعي ايدك ف تكبيرة الاحرام بس ومترفعيهاش ف باقي التكبيرات..وتفضلي ترددي التكبيرات ورا الامام سواء هترفعي ايدك أو لا يعني كل اما يقول الله أكبر هتقولي الله أكبر..
بعد كدة هتقرأي سورة الفاتحة ولازم تقرأيها بلسانك..
وبعدين الامام هيقرأ سورة بعد الفاتحة افضلي مستمعة للقرآن اللي بيقوله بكل جوارحك وتركزي كويس ف كل آية..متقرأيش انتي قرآن مع نفسك لا اقرأي الفاتحة بلسانك واستمعيله ف اللي هيقرأه..
بعد اما الامام يخلص قراءة السورة هيقول الله أكبر ويكمل بقى باقي الركعة الاولى عادي خالص زي ما متعودين وهتكملي معاه عادي..
بعد كدة ف الركعة التانية الامام هيقوم من السجود ويقول الله أكبر فانتي كمان هتقومي تقفي وتقولي الله أكبر وبعد كدة هتكبري معاه 5 تكبيرات
وهتكملي برضو باقي الركعة التانية زي الاولى بالظبط..هتقرأي الفاتحة وتستمعي للامام ف السورة اللي هيقرأها بعد الفاتحة وبعد كدة بقى عادي خالص هتكملي وتقولي التشهد وهكذا💜🌸
وع فكرة هي سهلة جدا والله ومثلا زي صلاة الفجر بالظبط ماعدا بس ف عدد التكبيرات..علشان البنات اللي أول مرة هتصليها كل اللي عليكي بس انك تحفظي عدد التكبيرات علشان متتلغبطيش وتفضلي مركزة مع الامام💜

*_طب هل ينفع اصليها ف البيت🤔_*
أيوة ينفع عادي خالص لكن من المستحب اننا نخرج نصليها جماعة..وصلاتك ف البيت هتبقى بنفس الطريقة بالظبط💜

*_طب لو فاتتني صلاة العيد الصبح اعمل ايه🤦🏻‍♀_*
عادي صليها ف أي قت قبل الظهر لكن من الأفضل طبعا انك تصليها ف ميعادها💜

*_بالنسبة بقى للبسك وانتي خارجة تصلي..خارجة تصلي هاااا مش رايحة فرح🗡🔪_*
مش احنا اتفقنا قبل كدة اننا هنعمل كل حاجة ترضي ربنا..يعني المفروض وانتي خارجة من باب بيتك تكوني محافظة ع نفسك وع جسمك زي ما ربنا أمرك..يعني المفروض متتعطريش بأي عطر علشان متبقيش زيك زي الزانية..يعني المفروض متلبسيش كعب وتمشي تتمختري بيه وتسمعي الناس كلها انك لابسة كعب عالي وشكله شيك.. بصي كدة ربنا بيقولك ايه👇🏻
*_وَلا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ مِنْ زِينَتِهِنَّ_*..ربنا كدة والله بيحافظ عليكي ده مش تعقيد أو حاجة..اعملي كل اللي نفسك فيه بس ف بيتك لكن برا بيتك خليكي عسكري ف نفسك كدة ومحدش يقدر يبصلك بصة حتى💪🏻..
يعني من الاخر المفروض تعملي أي حاجة تدخلك الفردوس مش تعملي الحاجة اللي تبعدك عنها..
هي حاجة سهلة جدا والله بس للأسف ناس كتير شايفينها حاجة تقيلة..
وفعلا زي ما ربنا قال *_وَاسْتَعِينُوا بِالصَّبْرِ وَالصَّلَاةِ ۚ وَإِنَّهَا لَكَبِيرَةٌ إِلَّا عَلَى الْخَاشِعِين_َ*
عافري علشان تبقي من الخاشعين دول وتبقى متاع الدنيا ولا حاجة بالنسبة لك
وانا عارفة انك جميلة ومش هتلبسي لبس ضيق ولا هتحطي ميكاب ولا هتحطي أي كلووونيا بعد كدة😂💜💜
وربنا يجعلك ويجعلني ويجعل جميع المسلمين من أهل الفردوس الأعلى يارب ونتجمع فيها ع خير يا حبايب قلبي ويهدينا دايما ويدلنا ع الصح اللهم امين🤲🏻💜🌸

ابعتوها بقى لاصحابكم علشان كلنا نستفيد وناخد بايد بعض للفردوس بإذن الله💜🌸