طَريّق الوَهَم

الفصل ١٢

هلاو حبايب مشتاقتلكم واشكر كلمن سالت عني بغيابي واعتذر على التاخير 😘

طريق الوهم
بارت ١٢
نورا ناصر
الاقنعة متشعبة وكثيرة ومتعددة
ننجبر احيانا نلبسها حتى نتماشى وية مسار النهر ومانكون عكس التيار
خاصة لماتكون امواج الحياة عالية ومتلاطمه....
تشبه البحر الثائر المنفجر..

مرة نلبس قناع القوة حتى ماياخذنا روج البحر
ومرة نلبس قناع التسلط حتى نصير اقوى من غيرنا ومننداس بالرجلين
ومرات نلبس قناع القسوة والوحدة حتى نغطي على واقعنا المرير ..

لكن القناع الوحيد الي منكدر نلبسه هو قناع الحب
هذا القناع مستحيل ننجبر نلبسه او ندخله بلعبة الادوار

موجعة ومؤلمة هي الحياة لما تحاول تقسي علينا وتحاربنا باقرب ناس النا
تخلق من عدنا اشخاص احنا نفسنا
مانعرفهم ولانفهمم
نكون ضايعين بين الواقع والحقيقة
ولاتخيرنا
ولاتساعدنا
بالعكس تاخذنا وتسحبنا
مرة للوحل مرة لإعماق البحر
وتصعدنا وتغنينا  لأعالي النهر

وهناك...... بعد طول انتظار وصبر
وحياة كلها قهر بقهر
طعمها حنظل مرار

يبدي يبتسم القدر.......
لما تزهر بقلبنا زهرة من نار
تشبه الشمعة الي تحترق لإسعاد البشر

هذه ببساطة لعبة الادوار بكافة اقنعة البشر .....

جلنار..
سمعت حروف كلماته الاخيرة
كال وهو يحرك اصابعه على لحيته
سهله يصير خير ..

معرفت شنو يقصد بالضبط .. معقولة يهددني ...
اخذتني خواتي وظليت امشي واني سرحانة
الى ان وصلت للمستشفى ..
دخلت عليهم شفت حنان دتسوي كمادات لامي ..
اقتربت من السرير ..
.. تعبتج حنونة ..

... ماكو تعب بيننا حبيبتي المهم تكون بخير .. تكدرين تبقين وحدج لو ابقى وياج ؟

جلنار .. لا حبيبتي روحي مقصرتي ابقى اني ..
..

راحت حنان وبقيت يم امي ..
مرت  ٢٤ يوم وامي بالمستشفى  عمليتها عبارة عن جرح مفتوح وملتهب بقائها بالمستشفى حتى لاتتلوث بين العمليات ..

هالايام كانت صعبة جدا بينت لي معادن هواي بشر بحياتي  بينت لي مو كل وعد وعد ولاكل اخ ينحسب عزوة وظهر ..

امي اليتيمة الي توفت امها بولادتها كانت متعرف اي شي عن الامومة ولا لحكت تعيش اجمل لحظات البنت وية امها بحنانها بغضبها..

ولدتها امها منا توفت منا فصرت اني اختها وامها وصديقتها وكل شي بحياتها
مااكدر اتخلى عنها ولا اكدرارفض لها طلب اذا تطلب روحي انطيها الها بدون تردد..

لان شفت بعيني شلون كانت تحفر بالصخر وكبرتنا..... اكثر شي يعز علية لما اهلها ميسالون عليها كاطعين كل رحمة مابينهم..