طَريّق الوَهَم

بارت٣١

#طريق_الوهم
بارت ٣١ ..
نورا ناصر

استقريت بنص الصالة وماادري الالم منين يجيني
كل طرف بجسمي يوجعني .. نزف خشمي ملىء ملابسي ..
مااعرف اصرخ لو ابجي لو شسووي ..
ماحسيت غير اني بالمستشفى وامه وفاطمة
يمي ومسار يبجي ويرجف ..

الوكعة تسببتلي برضوض هواااية وخشمي وية انحرافه كسر بعظمه زغيرة
اصابيع ايدية اثنين تكسرت ولوي بالكاحل ورقبتي لبسوني عليها جهاز عظمي

اجت فاطمة يمي باوعتلي وكالت اشتكي عليه هذا حقج..

امه كالت لا شتحجين انت فاطمة اكرمينا بسكوتج
وانت عيني جلنار ابو بيتج ورجلج تحملي فدوة ..

كلشي ماحجيت وهو اجاني بس يبجي
ويهذي ويكول تنكسر ايدي الي نمدت عليج ..

حسيت نفسي خالية من كل المشاعر فاااارغة من كلشي مخدرة
احس نفسي ماعرفه لهالرجال ..
درت وجهي منه والتزمت الصمت ..

وراها ضليت بالمستشفى فترة اسبوع وطلعت كوة امشي احس هموم الدنيا كلها براسي وعلى قلبي وظهري ..
امشي بلا روح مجرد جسد وياريت جسد صاحي
احس كل مشاعري ميتة .. وين كنت وين صرت
..

وصلنا للبيت .. ومن دخلت شفت جايبلي كيكة وورد على سلامتي والبيت متغير شغلات بي هواية

بس مهتميت لشي كعدت على التخم واني ساكتة
اجه وكرفص مقابيلي .. اخذ ايدي وظل يبوس بيهه
حبيبتي اني اسف حقج عليه والله متتكرر والله ..

ظليت اباوعله ومانطقت بكلمة وحدة حاولت ابتسم مااكدرت ..

بنظرات كلها توسل وقهر كلي ادعي علية لج اني حقير اني نذل والله مااستاهلج ..

كتله .. مسار احسن حل خلي ارجع للعراق ..
اشتغل اني وانته ونقدم على شغل وننتظر فترة بسيطة واطلعك للخارج وياي امريكا ابسويد استراليا اي شي مو اله كندا ..
موكافي اني تعبت وانته تعبان اساسا خلي نبدي من جديد بنص اهلي ومعارفي هنا اني غريبة ابقى اني وياك غربة ..

انتفض وصار يتوسل..جلنار حياتي فرصة اخيرة وداعتج واعوضج عن كل الي فات واذا وصلنا اوربا انتي الي تبسطيني مو اني ابسطج هناك حقوق المرأة اني اخاف منج اصلا ..

أني تعبانة اريد اروح ارتاح .
كمت من على التخم كام وياية
يحجي ومبين حيل ندمان ويتوسل
كال ارتاحي حبيبتي تعالي اشيلج خاف مابيج تصعدين
يريد يمد ايديه عليه يشيلني بعدته مني
كتله ميحتاج اني اصعد ..
صعدت للغرفة ..
كعدت على السرير راودتني افكار هواية
كلت اسافر وانهزم منه والي يصير يصير
تمددت ونمت بين الصاحية والنايمة اسمعه يحوس بالغرفة ماادري شنو يسوي انطيته ظهر ورجعت كملت نومتي اريد . للمغرب كعدت ..
ظل هو يهتم بيه يجيبلي الاكل للسرير
يوكلني بيده واصده هواي ويتوسل
باوعتله شسويله اكيد مريض نفسي وماعندي غير اجاري ..
حاولت اخدعه اضحك عليه اتحايل عليه وانفذ بجلدي