طَريّق الوَهَم

بارت ١٩

#طريق_الوهم
بارت ١٩
نورا ناصر

كسرت علينا سيارة عالية سودة جبرت سيارتنا توكف
نزل منها واحد واجه صوبنا ..

باوعتله هذا مهيمن ابن خالو اقترب من المكان الي كاعدة بي اني باوعت لعيونه من الجامة  يخوزر

وظل يدك بالسويج على الجامة الي من جهتي ..
ويأشرلي انزل

.. استحيت منهم
كلت خاف ياخذون علية نظرة موزينة او يشكون بالوضع الي صرت بي ..

كلت للسايق عمو هذا ابن خالي راح انزل اشوفه شيريد ..

نزلت بالشارع وسديت باب السيارة ..
صرت يمه ..
باوعلي بنظرته الحادة كال ..  شلونج جلنار

جاوبته  الحمدلله خير شصاير

.. ليش لازم متعرفين المحافظة نصها النا.....

ها .... بس استغربت جيتك

..  غير دنحميكم يااابة

.. الله الحامي وهنا مو مثل بغداد

..انتي مغمضة متعرفين الوضع شلون صاير خففي طلعاتج هالايام

.. ان شاء الله يلا اني اروح تاخرت ع البيت
درت وجهي اريد اركب السيارة ..

صاح  اوكفي جلنار  اذا تحتاجين شي اني موجود ترا

كتله ..  الله يسلمك

... ولاتصعدين بالصدر تجيج حجاية ترا ولاتضحكين بالشارع نصيحة لو تلبسين بوشية تغطي وجهج ..

.. انت تدري اني الوحيدة موظفة بنص هالولد والورى ٣ شباب يعني قابل اكعد يمهم مثلا ؟!
والضحك ترا السايق رجال بكد ابوية بعدين انته مجنت تضحك بالكلية وية زميلاتك

..مكلت شي دا وصيج يابة

...لاتوصي حريص الله يعرف بنيتي سليمة وماشية صح وممسوية شي يغضب الله

.. لو تمريلنا للحوزة النسوية تستفادين منها

.. ان شاء الله صار لازم اروح ميصير أخرتهم دينتظرون سلم على خالو والبنات ..

كال الله يسلمج .. رجعت صعدت بالسيارة زفرت نفس شكده  افور اغلي من الغضب ..

حرك السيارة السايق ووصلنه للبيت ..
نزلت واني ادردم على مهيمن .. واحس وجهي راح ينفجر من الغضب ومن حرارة الشمس لان جان بعده عصرر وجو حار .. ظليت اباوع للدرب بس لا هم يطلعلي علاء الفرفوري ويكملها عليه
جنه زرزور لحيمي ومسوي روحه زلمة براسي ..

فتحت باب الشارع ودخلت .. 
شفت امي بالحديقة .. دتسقي الزرع ومؤمل يحوم حواليها ويلعب ..
_الله يساعدج ماما
_هلا نارة .. خيرج مو على بعضج ..
_شكولج والله ياماما هذا ابن اخوج اشو معشعش هنا هالايام خير  شعنده ..
ماما وهيه تخول الصوندة على غير مكان
_يكول شغله تخول هنا ليش وين شفتي ؟
كعدت ع صبة ونكتت ايدية على رجلية اجه مؤمل يمي يلغي شلته وخليته على رجلية وحضنته وبسته على خده ..
_اليوم اعترضلي بنص الطريق ووكف سيارة الي بيها اني ..
_ليش ؟؟
_يكول يحمينه عشتوو
شمرت الصوندة بالحديقة وسدت الحنفية اجت كعدت كبالي ..
_اي يوم حقه انت تشتغلين ويا الاجانب ووضع البلد موو شي ..