🔞حكايات القدر 🔞

البارت العاشر

هلو بنات ورجعت الكم وبارت جديد تحياتي الكم واحبكم كلكم شلع قلع عويناتي انتن وفديت حبيباتي اللي يعلقن الي فدوة لكلبهن واللي ما يعلقن خلف الكواليس لكن بصمتهن الحلوة موجودة من خلال النجمه فدوة اروح للجميع احبجن كولجن
وهذا بارت هديه للي علقن الي 😘😘😘😘😘😘😘
❤❤❤❤❤❤❤❤❤❤❤❤❤
علاوي :درة درة
درة :ها علاوي شصاير احجي كلبي وكع
علاوي :درة امج
درة لطمت على صدره وصاحت شبيه ماما
بعده علاوي ما حجه وكطع كلامه صوت مرت خاله ام علي :يمه درة تعالي وياي
درة :دارت وجه وراحت باتجاه ام علي
ها خاله شكو شصاير ماما شبيهة
ام علي لزمت ايد درة كلتله تعالي وياي هسه كولشي تعرفين
درة :خاله كلبي راح احجيلي شصاير
مشت ام علي وعبرت درة من بين الناس وهي تشوف بعيونهم نظرات حزن وذاك اللي يكول الله يساعدهم وهذا اللي يكول الله يصبرهم وهذا اللي يكول مساكين الله يعينهم كلمن جان يكول شيء واني جنت امشي ورة خالتي ام علي مثل الضايعه لمن دخلت للبيت شفت نسوان هواي وخالاتي ونسوان خوالي وبناتهم كولهن جايات ونسوان من جيران اول ما دخلت وكب صوت العياط والصياح ظليت صافنه ومبهوته واصيح :شنو شبيكم شنو الصاير احجولي اكو شيء التفت على اختي اسيل تصيح ولج درة ماما ماما :شبيه ماما اسيل احجيلي
اسيل :ماما ماتت ولج تيتمنه بقينه لا اب ولا ام
درة لطمت على وجهي حيل لمن صار وجهي دم احمر
يمه ليش يمه ليش استعجلتي ورحتي يمه شلون انطاج كلبج وعفتينه يمه شلون رحتي عنه وتركتينه يمه خلافج احنه ما نسوة شيء يمه دونج احنه لاشيء يمه جايه افرحج لكيتج مسافرة يمه يأ ام طول الحلوة يم من اروحلج فدوة ليش هيجي رحتي يمااااا ولج يماااااااا ولج يا ام سوالف دافيه يمااا يالحنينه يمااا جانت درة تبجي وتلطم وخلت كل الي موجود يبجي ويلطم على بجيه بعده كامت تنعى يمه شفت الهوة حرك الباب تالي الهوة طلع جذاب
يمه رجعيلي يمه كلشي ما اريد يمه بس حاجيني يروحي يمه صدك ودعتي ليش يمه ليش ولك يا اسد امك راحت يا اسد ولك سيف امك راحت
اسد :خاله كولي لاختنه كافي بجي شعلت النار اللي بكلبنه خلنهة تهداة خاله اختي لا يصير بيه شيء
وصلو بيت راضي كولهم
راضي :شنو هذا الخبر اللي سمعناه عمي البقيه بحياتكم يا عمي
اسد :وحياتك الباقيه عمي بعد هذا امر ربك واني عرفته امي متطول لان روحه حيل متعلقه بابويه
فراس :الله يعينكم على ما اصابكم
اوس :البقيه بحياتك خويه الله يصبركم
راضي :بويه يلا خلي نجهز كلشي ما اريد شيء ناقص
اوس :صار بابا تدلل
ورة ما يقارب ساعه التمت الناس وصار لازم ناخذ جثة المرحومه ونغسله ونواريه التراب
دخلنه حتى نشيل التابوت ولفت انتباهي بنيه هي نفسه البنت اللي شفته بالمطبخ بنيه سبحان الخالقه من حاولنه نشيل التابوت شبكت التابوت وكامت تبجي خذوني وياهة وكعد يمه سيف يهدي بيه صراحه بجيه زرف كلبي حيل فجعتني واللي صدمني اكثر اكتشفت هي بنت عمي عادل درة سبحان الله الخالقه لمن تقربو الشباب كامت تزيد بالبجي اخر شيء قررو ياخذونه وياهم وفعلا راحت ويه التابوت واني صعدت بالصدر بنفس سيارة اللي بيه التابوت شفته شلون تبجي وتون وتعاتب امه ظليت صافن عليه غسلنه المرحومه ودفناهة يم كبر عمي عادل ركضت درة وصاحت هنا هنا هنا يالحملت وشلت عنا جانت تحجي وهي رافعه ايده وتحجي بكل قوة وصلابه صح صوته مبحوح من البجي بس خلت الكل يصفن عليه  عاتبت ابوهة وراهة التفت لامه يمه ضاكت عليج الوسيعه ورحتي مودعه يمه مودعه وبلغي سلامنه للوالد وكوليله ولدك وبناتك رفعت راس الك حقيقه ظليت صافن على هاي الانسان وبوكته مشاعري جانت متخربطه تجاهة
ما اعرف اعجاب شفقه او شنو جان بالتحديد ما اعرف دفناهم وبابا كال لازم نروح نزور الامام علي قبل لا نطلع من ارض النجف ونروح وفعلا رحنه
درة :جنت امشي بخطوات متعبه وجنت صافنه واذكر ايام اهلي وايامنه وشلون جانت حياتنه وهسه وين صارت صفينه بلا اهل لا ام ولا اب حسينه بالغربه رغم الكون شكبره واني امشي حسيت الدنيه افترت براسي دخت ردت اوكع شفت شخص اجه يركض باتجاهي ولزمني وظل يضرب خفيف على خدي ويصيح درة درة
اوس :جنت امشي مسافه عنه واتابع بيه حسيت بيه تمشي بدون وعي رادت توكع ركضت عليه لزمته وظليت اصحي بيه اعاين الكل صار بعيد عنه بس اني وهي ظليت محتار بيهة درة درة اكعدي درة
درة :هاا اااه
اوس :اكعدي بيج شيء
درة :لا ما بيه
اوس :تكدرين تمشين
درة :اي اي اكدر
اوس :يلا لعد كومي ،رادت تكوم ومكدرت كلت اله اني راح اسندج ونمشي سوة
سندته خليت ايدي على خصرهة ورفعت ايده خليته على كتفي وكمت امشيه على كيف
اجه اسد يركض باتجاهنه سند درة واخذه مني ما اعرف ليش من اخذهة مني ليش ضجت بداخلي تمنيت تبقى وياي ما اعرف شعوري بوكته شنو غيرة او شيء ثاني ما مفهوم ما اعرف راحت هي تمشي بصف اخوهة واسمعه يكول اله شبيج حبيبتي بصراحه حيل انقهرت ليش هيج يكول الهة
رحنه للزيارة دخلنه زرنه ورجعنه لبيت عمي عادل كملنه الفاتحه بطلاع الروح لان اني صراحه ما احب اجواء الحزن وخاصه من اتقرب من غرفة الللي بيه النساء واسمع صوت درة تبجي اموت من القهر ما ادري ليش خلصت الفاتحه اني رحت لان باقي كم يوم عن اجازتي راح تخلص ولازم اروح اترخصنه منهم ورحنه وره انتهاء الفاتحه وبعد مرور اربعين يوم رجعنه الهم سوينه الاربعين مالتهم اتجمعنه بيت عمي عادل  وابويه جهز الذبايح والكل جان مشغول بالاربعينيه
فراس :اكلك علي خلي نروح اني وياك نجيب الجادر
علي :هذا عقيل صاحبي عنده كيه حمل ناخذه ويانه ونجيب الجادر والكراسي والمناضد
اوس :اني واسد نروح للطباخ نتفق وياه عالاكل
سيف :خوش حجي يلا لعد بسرعه راحو الكل توزعو
سارة :يا بنات هاي المواعين جابوهة الولد يكولون حطنهن وخضنهن
نسمه :لا خلي نغسلهن بزاهي ونشطفهن احسن وانظف
سميرة :اي هم خوش اقتراح جا همن نفسجن عليهن
سما :عدنه بنات خير من الله خلي نكوم كلنه سوة ونشتغل
درة :اني هم اساعدجن
نسمه :لا حبي انتي تعبانه
درة :لا اطلع اشتغل وياجن احسن لان اذا ابقى كاعدة اضوج
سارة :اي حبيبه هم صدك دتعاي لعد ويانه ساعدينه
كمنه كلنه ع الشغل ونظفنه المواعين ورتبناهن وجهزنه كلشي
اوس رحنه لكينه الطباخ مكمل كلشي جبنه الاكل واجينه دخلناه بالبيت ومن بعيد والمح طيرة حلوة تحوم بين البنات ظليت صافن عليهة لحد ما اسد صاح هنا خلو الكدور خليتهن ورتبنه الهن مكان حتى نكدر نصب اكل للناس
واني افتر بين الكدور التفت شفت عقيل صاحب الولد صافن على درة وهاي الثوله واكفه ما منتبهة الهة رحت اركض عليه وسحبته من ايدهة ودخلته جوة
درة :اووي هاي شبيك ليش هيج تسحبني وبعدين منو انته حتى تهيج تجرني
اوس حط اصبعه على حلكه وكال اله :اسسس ولا كلمه صوتج ميطلع لا اكصه الج لج ثوله هذا يعاين عليج وانتي ملتهيه وصافنه
درة :واني شمدريني يعاين اشم ايدي بعدين اني كاعده بيتي قابل بالشارع وبدل مجاي تطلع عضلاتك عليه روح اله وطرده برة موجاي تستقوي على بنت
اوس وهو يتقرب منه ويحجي بعصبيه :انتي لسانج هذا يرادله كص بس بسيطه يا درة اني اعلمج اله اربيج من جديد
درة :روح ربي نفسك
رفع ايده راد يضربه ولزمته نسمه كافي هاي شبيك هو نزل ايده وطلع عصبي نسمه التفت لدرة وكالت اله :اكو وحده تحجي ويه خطيبه وابن عمه وزوجه المستقبلي هيج
درة بتعجب :هاااا هو هذا اوس
نسمه :اي عيني هو هذا اوس
درة ظلت تبلع بريكه :واني شمدريني بعدين انتي يا حبيبتي اكرصيني اندسيني سوي ضجه اشري الي شبيك
نسمه :شندسج اذا انتي ماكو عندج بريك طلعتي بينه كبل
درة :يبووو شكد عيب هسه شيكول عني
نسمه :الله اليستر 
درة :اوك حبيبتي خليه على الله وخلي نروح نساعد بالشغل .
نسمه :يلا امشينه
مر اليوم بسلام وكملنه شغلنه والناس كملو عشه وكلمن راح لبيتهم وبقينه احنه وبيت عمو راضي
ام اوس :عمه فرشو للولد بالاستقبال لان جبير ويكفي والبنات ينامن بالغرفه جوة
درة :صار عمه من عيونه
رحنه اني واسيل ونسمه طلعنه فراشات من غرفة بابا الله يرحمه ورحنه نفرش جنت افرش واشوف واحد عيونه ما نزلت من عليه كملت فرش اني واختي وطلعت من الغرفه ورحت لغرفتنه عمتي ونسمه نامن بغرفه بابا واني واختي نمنه بغرفتنه من دخلت للغرفه ظلينه نحجي اني واختي اسيل بعدين طلبت مني اروح اجيب اله ماي لان حست بعطش وتخاف تجيب ماي نزلت على الدرج على كيف جان البيت هدووووووء مبين الكل نايمين من التعب ما سمعت صوت لاحد جنت امشي بهدوء حتى اجيب ماي دخلت للمطبخ على اطراف اصابيعي وصلت للثلاجه اخذت الماي وردت ارجع ما حسيت اله انصدمت بشخص جان واكف وراي ردت اصيح بس هو بسرعه خله ايده على حلكي  ورفعني من الكاع وصار اللي صار .........

يتبع

برايكم شنو اللي صار لدرة ؟
ومنو هذا الشخص اللي دخل للمطبخ ؟
هل هو شخص من داخل البيت او من خارج البيت ؟
اشوفكم باجر ان شاء الله وبارت جديد
باااي حبيباتي احبكم
😍😍😍😍😍
😘😘😘😘
❤❤❤
🤩🤩
😻
فديتكم يا حلوات