مرت الشيخ جبل (مُكتمله)

" البارت السابع "

_شمس ؛مرت ايام واسابيع واحنه نعيد نفس الروتين اكعد الصبح منوكت وانزل احضر الريوك وي ام فرح وانوب اكمل شغلي واصعد قبل كعده مريوم وابقه اهتم بيهة اعاملهة مثل بنتي مو كانما مرت ابو وبس اني أكثر وحده تفهم مريم وتعرف شنو تحتاج لان فقدت امي بعمر صغير وبقه حسرة بكلبي حنيتهة ودلالهة لا تتوقعون الام مجرد كلمه او حتى مجرد شخص لا الام نعمه من رب العالمين ولازم نحافظ عليهة ونقدمهة ع انفسنه المهم..
_طبعا علاقتي بجبل جدا رسميه وماكو اي شي جديد بينه ما انكر اني بديت احب شخصيته القويه هدوئه وعاصفته وكت ميريد غموضه وصراحته شي يجذب الانتباه وماكدر اتغاضه عنه اكثر شي يعجبني بي حنيته ع مريم واشون يهتم بيهة وشكد يحبهة احيانا احسه يشبه والدي الله يرحمه اتذكر من جان يحبني ويهتم بيه ويسهر ع راحتي

_اما بالنسبه لغصون ف علاقتي بيهة كولش زينه احسهة الاخت الي مجابتهة امي اما رباب فهيه عكس غصون تماما رغم عمرهة بكدي الا انها تختلف عني دوم تحاجيني بتكبر وغرور احسهة واكفه وي ميسون ضدي ومتخذه مني موقف بس ع شنو مادري

_والي يسال عن ميسون فهيه تحاول بكل الطرق تسببلي المشاكل وحت من انزل مريم جوه تخلي ابنهة علي يبسطهة ويبجيهة حت انقهر لان تدري بيه احبهة وماقبل عليهة اني مرات اغلس واكبر حوصلتي بس مرات انفجر بيهة واتعارك بس شيفيد ابو طبع اسألو ع سلامته

_جبل ؛بهاي الأسابيع الماضيه صارت اهواي تغيرات بحياتي مانكر اني جنت رافض فكره الزواج ويمكن تنصدمون اذا اكلكم همزين ازوجت ..
اي والله اذا مو لاجل نفسي ع الاقل علمود بنتي حت ترتاح جانت متبهذله اهنا واهناك واني باقيه روحي تفرفح عليهة اريدهة يمي بس ماكدر لان ماكو اليهتم بيهة ويداريهة الحمدلله وكعت بيد شمس وصارت الهة ام هل بنيه دائما استغرب طبعهة وتصرفاتهة احيانا احسهة تتصنع كل هل برائه والطيبه لكن بعد ما جربتهة وعرفتهة شنو صرت متيقن انهة طبيعيه لابعد حد حبهة لمريم نابع من كلبهة حيل احب اهتمامهة بيهة واشون تداريهة وتهتم بنضافتهة شي يريح الكلب ..

_والاجمل من كولشي انو مريم اعتادت عليهة بهل فتره القصيره وصارت تعتبرهة امهة وتبادلهة الحب الأطفال صح ميفتهمون شي لكن تقودهم غريزتهم الطبيعيه فيصير عدهم ادراك للاشخاص الي فعلا يحبونهم او يكرهونهم وع هذا الاساس يتصرفون

_اما بالنسسبه لعلاقتنه الزوجيه مانكر انو مو بس مريم الي اعتادت ع شمس وتعلقت بيهة اني هم صرت متعلق بيهة رغم اني اقاوم نفسي بصعوبه حت لا اضعف كدامهة احس بتناقض حيل جبير الي هو متعبني فوق الوصف بداخلي اريدهة وماريدهة طيف زوجتي يلاحقني وين ماروح ماريد اخونهة من احس نفسي راح اضعف وانهزم كدام شمس انسحب بسرعه واتركهة اروح للمركز او اشغل نفسي بإي شي في سبيل اغير تفكيري وابقه صامد وبس..