أخوكي لمن يتغير عليك فجأة ! بدون مقدمات و يعمل حاجات كويسه و هو قبل كده كان زول بحب روحو ماشغال بيك ابدا دي حاجه بتخليك تشكي في نفسك انا عملت شنو 😂😂؟ صحيت من النوم و انا بعاين ليهو متحيرة شديد في شنو ؟ قال لي مافي شيء لكن عارفك حتكسلي من المنكير و حتصلي كده و انا ما عايزك تصلي بالطريقه دي من الليله و لو طلوع المنكير بتعبك انا كل يوم ح اجي بالليل اطلعوا ليك اتفقنا ؟ نططتا عيوني بسم الله ! اكون بحلم ؟ ده احمد اخوي ؟ جاني عريس ياربي! و خلاص بودعوا فيني بذوق من البيت ده ولا شنو ؟ قام على حيلوا و قال لي اجهزي عشان اوصلك في طريقي للجامعه ، قلت ليهو احمد مالك ؟ في شنو ؟ قال لي في شنو ؟ قلت ليهو لا يعني في شنو الليله من الصباح حاسي بشنو انت ؟؟ قال لي يعني الزول لو جا يدلع اختو شويه اختو تتعولق و تتعاور كده ؟ قلت ليهو لالا ياخ خلاص يابتاع الدلع ح اقوم اجهز روحي للجامعه .. جهزتا و جينا طالعين جنب الباب كان بكورك لي امي يا حجه نحنا مرقنا ، امي جات توصيهو يجيب عيش و هو راجع من الشغل لقتنا واقفين سوا 😂😂 الخلعه واضحة يعني في ملامح البيت كلو ، قالت ليهو و دي طابيها في يدك مالها؟ قال ليها لاحول ولا قوة الا بالله يعني حرام الزول يحن على اختو المشلهته في المواصلات؟ قالت ليهو لالا ما حرام اريتها الحنيه تطول .. ياولد اخصم منها العشرة جنيه بتاعت الهايص البتركبها من هنا من مصروفها اليومي مدام بتوصلها بعربيتك ، قلت ليها امممي😒👊 ده كل همك مشش😒، طلعنا و ركبنا سوا ..
بقدر ما كنت مستغربه من تصرفات احمد ، بقدر ما اتبسطت شديييد اني راكبه معاهو العربيه ، كل دقيقه كنت بعاين ليهو و بتبسم .. قال لي سندس بعدين ما تتأخري الليله الخميس و الدنيا زحممه اتخارجي بدري .. قلت ليهو يعني ما حتجي ترجعني ؟ عاين لي يازوله لا ياخ بس ما تكوني انشرحتي طوالي و قايلاني ح ابقى ليك ترحال .. قمتا ضحكتا و قلت ليهو والله انت فقر خلاص ما بتخلي الزول ينبسط و فرحتو تتم خالص .. قال لي شايفك استغليتي الوضع لكن ما طوالي كده .. لحدي ماوصلنا باب الجامعه ، كنا بنتونس في الطريق ، دي تقريبا اول مره بعد زمن طويييل اتونس فيها مع احمد و نهظر و نضحك سوا ، حاجه بسيطه جدا بتغير نفسية الواحد كده ؟ وصلت الجامعه مبسوطه و فرحاانه و ظااهر من وشي كان عندي نفس اني أكل ما عارفه ليه حسيت بالجوع ! مشيت للكفتريا و طلبت سندوتش و قعدتا اكل قبل حتى ما اتصل لي وحده من صحباتي و اوريها اني جيت .. انتهيت من السندوتش و بعداك مشيت ليهم .. احساس الجوع ده بالنسبه لي حاجه جديدة 💜 انا كنت باكل بس اداء واجب و مرات بالغصب ، ولا خوف من المرض و التعب و الهبوط .. هي الفرحه بتجوع كده !! حضرت اول محاضرتين و في الفاصل بتاعهم ، شلت تلفوني عايزة اتصل لمعمر 💜 معمر اول زول جا على بالي اني اكلموا ، ماعارفه ليه عايزة احكي ليهو ، نسييت تماما اني حكيت ليهو حكاوي زي صحباتي عن احمد و كذبت عليهو برضو .. طيب هسي حيقول سندس دي مالها فرحانه انو اخوها وصلها ؟ راجعت التلفون مية مره و بعد تفكير ختيتو ، زعلت من روحي لأني كذبت على معمر برضو ، هسي كان ممكن احكي ليهو عادي بالفرحه دي .. تلفوني رن ، احمد ! تاني! رفعت و رديت ليهو ، قال لي خلصتي ؟ قلت ليهو لسه ، قال لي لمن تخلصي اديني تلفون ح ارجعك البيت ، قلت ليهو حاضر تمام .. استغربت شديد تاني احمد مالوا ؟ بتصرف كده مالوا ؟ بين يوم و ليله عايز يبقى اخو مثالي ! ما ختيت في بالي ابدااا انو يكون معمر لاقاهو ، فكرت في حاجات كتيره زي مثلا الآخره قريبه ،زي مثلا سمع محاضره عن الاخوات او كده ؟ زي مثلا في زول حكى ليهو قصه مأساوية عن الاخوات .. ختيت سبب لتصرفات احمد بس ما اتوقعت انو يكون معمر اتصل عليهو .. لنهاية اليوم كده دقيت ليهو ، قلت ليهو اني خلصت و كلها ساعه و كان جنب باب الجامعه ، بالنسبه لي فرحتي زادت عشان صحباتي اول مره يشوفو احمد جاي يرجعني ، اول مره يصدقوا كلامي الكنت بقولوا تلاته سنوات و كل مره بتعذر بحجة احمد واقف لي بعيد و احمد قال لي نتلاقى جنب الحته الفلانيه عشان نرجع سوا ، كنت بتعذر عشان يصدقوا اني عندي اخو مهتم بي جدا 😢 المره دي كنت مبسوطه حتى قلت ليهم ارح معاي عشان تسلموا على احمد يمكن تاني ما تلموا فيهو قريب ، مشوا معاي شلة البنات كلنا ، بالنسبة لي مبسوطة شديد لأنو اخوي في حد زاتو وسيم شديييد و مكسر بنات الدنيا ، نزل بي بنطلونو الاسود و قميصو الابيض و ساعتو و عطروا عشان يسلم على صحباتي ، شايفه في عيونهن انهم اتكسروا شديييد 😂😂 ماقادرين يعبروا قدامو بس عارفه انو بعدين مسجاتي حتكون كلها احمد و درديق في احمد ، وقفت جنبو مبسوطه احساس شوفو ده اخوي😢💕 ده حقي انا ، كنت فرحانه شديييد بي وقفتي جنبو و طريقة كلامو الرسميه و بعاين لي حواجبو الغزيره و هو بتكلم و لي غمازتو الظاااهرة شديد لمن يقول ايوه .. سلم عليهم و ركبنا نمشي كنت بعاين للبنات بعين مكاواه😂😂 و بعمل في حركات بي عيوني و خشمي ، لمحني و انا بتعاور و بكاوي فيهم ابتسم عايز يضحك و قال لي مرقنا ؟ قلت ليهو ارح يا حبيبي 💕 الكلمه دي طلعت مني بطريقه عفوية ، قلت ليهو حبيبي قدام صحباتي لأني كنت بحكي ليهم انو انا مسمياهو حبيبي ، بس قدام احمد كانت اول مره تقريبا اقول ليهو حبيبي 😢 ركبنا العربيه و انا خجلانه ، كأني قلت الكلمه دي لزول غريب .. قبلت على الشباك محروجه من روحي ، ليه العلاقات الأسريه فاقدة للحنيه دي ! ليه الجمود الحاصل ده ؟ ليه بنحس بروحنا عملنا غلط لمن نعبر عن حبنا لي واحد من اسرتنا ؟ ليه السد القايم بين الاخ و اختو بيكون عالي قدر ده ؟ .. كنت حاسه بي اني عملت حاجه غلط عديييل ، احمد حاول يكسر لي توتري ده و قال لي ياسكره اكلتي ؟ قلت ليهو اي اكلتا قبيل قال لي يعني ما جعانه ؟ قلت ليهو اي .. قال لي خسارة راحت عليك بيتزا حااااره من ديبونيرز قلت ليهو لالا ما اكلتا كنت بهظر والله 😂 قال لي كلبه اخت كلب 😂😂 لفى بالعربيه و وصلنا هناك ، قعدنا في تربيزة برانا فيها كرسييين اول حاجه قلتها ليهو عارف يا احمد اول مره دي نطلع فيها برانا ؟ قال لي عارف اي ، لكن ما اول مره تطلعي فيها براك ! قلت ليهو كيف يعني ؟ قال لي كيف كيف ! اوريك كنتي بتطلعي مع منو ؟ قلبي هنا بررررد و طوالي شريط علاقاتي الكتيرة مرا علي و كنت بحاول استجمع سرييع ياتو واحد من الجكس الزمان جيت معاهو هنا😂😂 عاين لي مضطربه كده قال لي يابت وشك حيقع من الخوف ، كنت بهظر خلاص اتطمني😂😂 قلت ليهو والله صحي كلب😂💔 جابوا لينا البيتزا و اكلناها حاااره و قمنا طوالي ما اتأخرنا ، في الطريق قال لي ياسندس في بت عايز اعرفك عليها في اليومين الجايين ديل قلت ليهو بت كيف ؟ قال لي بت يعني بت ، قلت ليهو حبيبتك ؟ قال لي اي عايز اتقدم ليها ، بس عايزكم تتعرفوا عليها اول .. طوالي ختيت في راسي يكون ده سبب تغيروا معاي ؟ عايزني احب البت و ادخلها في نصنا عشان يحبوها امي و خنساء؟ 😒 قلت ليهو ايوااااا .. قال لي مالك ؟ قلت ليهو البت اسمها منو؟ قال لي اسمها جنات 💜 قلت ليهو و ليه يعني عايزني اتعرف عليها انا اول ؟ قال لي لاني كنت بحكي ليها عن اختي الصغيرة و كده ، و حبت تتعرف عليك انتي اول .. قلت في سري يحكي عني ؟ ياربي احمد ده فراس قاعد يزوروا بهناك ولا شنو ؟ 😂😂 قلت ليهو المهم اتفقنا يازول بس كان ما اشتريت لي لبسه ظااابطه ما بمشي معاك نقابلها ولا حاجه 😂😂 قال لي استغلاااليه للآبد بس😂خلاص بشتري ليك الدايراهو .. اول ما وصلنا البيت سلمنا على امي و خنساء و دخلنا جوه 💜 براااي دخلت الحمام استحميت و اتوضيت طوااالي ، لبست العبايه ووقفتا صليت العشاء .. احمد كان جاي داخل الغرفه لقاني بصلي ، ابتسم و طلع بعد انتهيت من الصلاة جاني تاني قال لي مبسوط منك شديد 💜 كلمتو دي كانت بالنسبه لي سبب كافي جدا يخليني انوم مرتاااحه ، قعد جنبي مواجهني في المصلايه و شال المصحف بتاعوا قال لي عايز اعلمك حاجه ، قبل ما تنومي كل يوم تمسكي مصحفي ده و تقري اربعه صفحات كل يوم لحدي ماتلقي نفسك ختمتي المصحف 💜 شهر شهرين المهم ما تستعجلي و ما تقري بشفقه عشان تختمي المصحف ، اقريهو برواااقه شديييد و ماتزيدي على الاربعه ديل .. قلت ليهو حاضر و ختيت المصحف في التربيزة الجنبي ، كأني ما مهتمه لكلامو قال لي لو عملتي كده الليله و بديتي انا ح اعلمك حاجه تحقق لي اي شيء دايراهو في لحظتها قلت ليهو كيف كيف؟؟ قال لي لمن تعملي كده اول وقام خلاني في المصلايه .. رغم انو ابوي وامي واحمد ملتزمييين بالصلاه و القران بس انا وخنساء نهااائيا ما كده ، انا بالذات يمكن اكعب من خنساء ، ماعارفه ليه انا بعيدة عن المصحف و يمكن بتمر شهووور كتييييرة مابكون شفتو هو قاعد وين ولا فتحتو ، ولا حتى يس ما قريتها .. روتيني واحد اساسا و القران ما ضمن الروتين ده للأسف💔 كتشويق للقصه القالها احمد ، شلت المصحف بتاعوا و قريت الاربعه صفحات ، بت جامعيه بتتلعثم في القرايه و نفسها بتقكع و دقات قلبها بتزيد في اربعه صفحات؟ بت بتقرا كم لغه في الجامعه ما قادره تقرا كلام بالعربي ؟ انا بقرا في الصفحات حسيت بقدر شنو انا انسانه ماعندها قيمه ! صفحات ما قادرة اقراها كويس ؟ لمن تميتها زعلت ، زعلت شديييد من روحي مشيت لي احمد في الصالون راقد بتفرج ، قلت ليهو احمد انا تميت القرايه ابتسم و قال لي طيب صاره مالك ؟ قلت ليهو مافي حاجه طيب وريني بس ، قال لي ايواا انتي عايزة تعرفي الحاجه البتحقق ليك طلباتك صح؟ 😂 قال لي طيب ياستي ، تصلي ركعتين وتقري يس بالمبين ، قلت ليهو كيف ؟ قال لي كل ايه بتنتهي بالمبين تقيفي فيها ، و ترجعي تقري تاني من الاول و تقيفي في المبين التانيه و كده كل مره ترجعي لحدي ما تتمي السبعة مبين الفي السورة .. يا تقريها بعد الركعتين يا تصلي 14 ركعه في كل ركعه تانيه تقري مبين .. قلت ليهو و بعدها ؟ قال لي بعدها تقعدي تتدعي بالحاجه العايزاها و براها بتحصل ليك .. قلت ليهو طيب تصبح على خير💜 قال لي وانتي بخير ، كان يوم حلو بالنسبه لي حاجات كتيره حصلت جديدة فيهو ، كان يوم كلو حب 💜 نمتا و حلمت بفراس قاااعد حكيت ليهو اي شيء حصل خلال اليوم كان هو برضو مبسوط و بسمع فيني مبسوط شديييد بس اول ما خلصت نمتا نومه عميييقه ، صحيت الصباح كان اول زول في بالي معمر ، عايزة الاقيهو و احكي ليهو الحصل معاي امبارح و انو فراس أول مره ما يقعد معاي كتير ؟؟!
يتبع
