بعد ما أكدتا لي ناس ماما عدد الناس الجايين للتعارف ، و اتطمنتا على اهل عريسي😂💔 مشيت رقدت شويه في السرير و اخدت لي غمده كده ، صحيت الساعه 2 صباحا ما لقيت مكالمه من معمر! اتذكرت انو انا مفروض ارجع ليهو اتكلم مع امو؟ شلت التلفون و ضربت ليهو ماردا علي قلت احتمال يكون نايم ؟ تاني ضربت ليهو زي مرتين ما رد علي ، قلبي اكلني اللحظه ديك بس اتجاهلتو ، رقدت شويه على جهتي اليمين و بقيت اقول ان شاء الله خير ، بعد شويه جاني تلفون من معمر 😍 رديت عليهو ملهوفه شديييد ..
" الصوت كان غريب ..
_الو السلام عليكم سندس
_و عليكم السلام ايوة سندس منو معاي
_معاك عثمان
_ معمر وين ؟؟
" و انا بسمع في صوت نحيب من بعييييييد ، قلبي بيقبض فيني زيادة و نفسي كان واقف على الرد ، وبديت ارجف رجفه ما عادية حسيت براسي منمل و اضنيني صنت و صفرت شديييد .. بشيل في نفسي بالعافيه ، المشاعر كلها اتلخطبت علي بعد ما سمعت النحيب جاي من بعيد و كأنوا اللحظة دي عايزة الزول الماسك التلفون يختفي و ما يرد على سؤالي و ياريتو لو ما رد على سؤالي ، معمر اداك عمرو ، احسن الله عزائكم "
على قدر ما كنت بصبر الناس الكانوا بسمعوا خبر وفاه على قدر ما اللحظه ديك ضاعت مني جملة انا لله و انا اليه راجعون ، للحظه حسيت اني تايهه ؟ ما قادرة استوعب الكلمه دي مات ؟ مات كيف يعني ؟ مات كيف ؟ هو كويس ! يموت عشان شنو ؟ كل الأسئله دي حامت في راسي و انا لسه كلمة مات دي شايفاها بعييييدة و ما سامعه غير صوت النحيب في راسي ، صحت اختي على صوتي و انا بقول مات ؟ قالت لي سندس ؟ مارديت عليها كنت لسه بسأل مات؟ فتحت النور و قامت من السرير مفزوعه بتنادي فيني سندس ؟ سندس؟ شالت التلفون من يدي لقت مافي زول في الخط ، قالت لي بسم الله الرحمن الرحيم بتحلمي كنتي؟ انا لسه كنت بسأل مات؟ و هي ما لقت الخط مفتوح .. رجعت لي اخر رقم و سمعت صوت النحيب زيي ، سألت الزول الماسك التلفون خير في شنو ؟ الحاصل شنو ؟ ردو ليها واااحد معمر اتوفى ؟ ده نفس الرد الرداهو لي ! رمت التلفون و بقت بتصرخ و تكورك لي امي و احمد لحدي ما جونا جارييين شديييد .. لقوني لسه بسأل مات؟ ، خنساء كانت بتصرخ و تكورك و تتشهد و تقول انا لله و انا اليه راجعون .. صوتها ذكرني زماااان لحظه رفعت جثمان ابوي ، يادوب بديت استوعب انو في موت لكن مستحيل يكون المات معمر ؟ معمر كان بتكلم معاي قبل ساعات؟ معمر يموت كيف؟ احمد جرا جاب العربيه و لبسوني عبايه سريع .. ما متذكره الشارع كان كيف و لا كيف وصلت للمستشفى ، متذكره ملامح امو لمن شفتها اول مره مرميه في الارض جنب غرفة العمليات جنبها دكتورين ملطخين بالدم ! ببكوا فوق راسها و واحد ماسك راسها و بعزي زي الطفل ، الرجال ببكوا فيهو كده ! انا كنت بعاين للناس كأنوا ده ما عالمنا ، انت وين يامعمر ؟ احمد و امي و خنساء كانوا ببعدوا مني شويه شويه و بسألوا في الناس الحصل شنو ؟ قالوا كان راجع البيت و عمل حادث ، العربيه اتقلبت بيهو ، سمعت الكلام ده بي اضاني بس اضاني التانيه كان فيها صوت ضحكتو ، خلي بالك من نفسك ياسندس ، التريبات ماشه كيف ؟ فرحتو بي ! .. واقفه في نص الناس بعاين ديل بكذبوا علي ؟ انا بحلم ؟ كدي اكفت نفسي احتمال اصحى ؟ كفتا روحي يمين و شمال عشان اصحى من الحلم ، بعاين ليهم لسه و مافي شعور جديد اتلجتا زيادة و اطرافي نملت ، باب غرفه العمليات فتح ، كان الناس بهللوا و بكبروا ... في سرير سايقنوا فيهو جثه مغطيه ! اللحظة دي عرفت انو مات، قعدت في نص الارض و صرختا صرخه كبيييييرة ، لو الحيطان كانت بتتشقق من الصراخ كان مفروض تقع بصرختي .. بكيت بكيت شدييييد و انا شايفه السرير مجرور و الناس بكبروا و بهللوا .. إتأكدت انو معمر لمن امو كانت جاريه ورا السرير و بتقول ياوحيدي 💔 مسكتا بطني عصرتها شديييييد كنت حاسه بي انو انا بتقلص اني ح ارجع طفله تاني ، حجمي بصغر شديد ؟ .. كنت بكورك شديييييد بنادي فيهو ، ما كان سامعني ما كان برد علي .. كنت بقول ليهو معمر خطوبتنا بكره ! معمر فرحتك حتتم بكره ؟ معمر ابتسامتك و فرحتك ؟ معمر انت كنت متحمس لليوم ده ؟ انا عارفه انك بتريدني شدييييد .. معمر تعااال .. كنت بنادي في زول رجوعوا مستحيييل ، كنت بطلب في حاجه ما حتتحق للأبد .. ناديييت و نادييت و ما كان برد .. احمد جا قعد في الارض وبقول لي ما عزيز على ربو ، رديت ليهو و انا ماعزيزة على ربي برضو .. خلي ربنا ياخدني معاهو .. حضني شدييييد عليهو و بكى 💔 كنت بقول ليهو احمد بتبكي ليه ! احمد انت مصدق معمر مات! كان بقول لي استغفري .. و انا بين بينيين ، موت و حياة ماديرة اصدق و اي حاجه قدامي بتقول الحاصل ده حقيقة .. قوموني من الارض زي كوم التراب و ختوني في العربية تاني .. مشينا بيتهم اول مره ادخل بيتكم يامعمر ، و انت مافي ؟ ماعايز توريني الشقه حقتنا؟ ما عايز تحكي لي عن حياتنا لقدام ؟ ما عايز تضحكني زي كل مره ؟ .. الموت ده حاااار حاااار شديييد .. احمد كان ضاميني عليهو لحدي ما طلعوا الجثه بعد غسلوها قال لي سندس امشي شوفيهو قلت ليهو بعين مكسورة هو حيجي يزورني ، قال لي سندس معمر اتوفى و لفت راسي للجثه فوق العنقريب ديييك جثتو ياسندس امشي شوفيها عشان قلبك يبرد امشي .. ابيت اتحرك من مكاني كلووو كلووو ، لحدي ما سمعت البوكسي دور جريت حفيااانه ، كنت بقول ليهم اقيفوا ما تشيلوهو اقيفواا 😭😭😭 الرجال ماكانوا سامعني ، امو كانت بعيدة واقفهوفي الباب بتعاين من بعيييد ، احمد جا للرجال و بقى بقول ليهم خلوها تودعوا بس ، امو عاينت لي بحنس فيهم ، انتبهت لي انو دي سندس ، من بعيييد كوركت ليهم بصوتها المبحوح خلوها تودعو دي حبيبتو ، لحظه قالت كده انا انهرتا زيااادة قعدت في الارض ماسكه رجلينو و في العنقريب ببكي .. القعدة دي هي الريحت قلبي هي البردت وجعي شويه .. قلت ليهو انا بريدك شديييد ، انت ليه خليتني ؟ الجنه نادتك ؟ .. الرجال ماخلوني اتكلم معاهو كتييير و رفعوهو و كانت اخر رفعه ..
