قمتا من الصباح ، عايزة اقابل دكتور معمر .. قلت اصارحوا بمعاملة اخوي احمد قبل كده كانت كيف وهسي بقت كيف لأني لو ما صارحتو ما حيفمهني انا مبسوطه مالي ، دخلت العيادة قالوا لي دقايق انتظري معاهو ضيفه جوه قلت طيب انتظر شويه لأنو ما دايما بنتظر فقلت دي بتكون مريضه ، لكن البت الفي الاستقبال كانت بتتكلم مع الولد و بتقول ليهو حلوييين ياخ و جايين مع بعض غفران و دكتور معمر ديل سمحييين خلاص .. ياريت امورهم تتم على خير و الولد كان برد ليها اللهم امييين يارب العالمييين .. سمعت الكلام اثناء ما انا بتصفح في الفيسبوك ، قلت انا مالي و مالوا يرتبط او لا دي ما حاجه بتخصني ، بس شويه كده و الأسئلة اشتغلت في مخي ياربي خطيبتو ؟ ولا حبيبتو بس ؟ يكون متزوج و انا ما لاحظتا ؟ طيب البت ما كان قالت ربنا يتم على خير .. يكونوا متشاكلين حاليا؟ تكون البت قصدها ربنا يتم على خير و مرتو حامل؟ يكونوا مالهم الاتنين ديل!! خلاص ياسندس انتي ما ليك دخل انتي هنا مريضه و بتتعالجي عندو ما تشتغلي بيهو ولا بهمك الموضوع تمام ! مخي كان شغال حوارات مع نفسو و عدت نص ساعه بفارغ الصبر متشوقه اشوف شكل غفران كيف ، فتح الباب و طلع معاها هو زاتو بسلم عليها في يدها و بقول ليها اول ما تصلي وريني ، كانت بت حلاتها شديييد 😢 لابسه تونك طويييل ابيض مخطط بالاسود و طرحه بين الرمادي والاسود و شنطه بيجي .. ساعتها من ck بت انيييقه شديد و ده وااضح من شكلها ، حسيت بالإحراج من شكلي المبهدل و عدم اهتمامي عاينت ليها جميله شديد ! و هي محجبة ! راقية جدا و محترمه ، يمكن بحبها عشان كده ؟ عاينت ليهم الاتنين واقفين و زعلتا وصريت وشي بوضوح ، ما عارفه ليه زعلت ولا اتضايقت و لا احتمال حسدتها ! عاين لي قاعدة قال لي اوو سندس وصلتي ،تعالي اتفضلي .. قمتا على حيلي و مشيت ليهم قال لي غفران .. سندس .. سندس.. غفران 💕 سلمنا على بعض انا وهي مبتسمين اهليين ، يدينها ناعمه 😭 ناااعمه شديد ، ما عامله منكير ! و ضفورها مقصقصه ؟ البت دي بتتشاف ملاااك و نضيييفه كده كيف ؟ حتى الاسبوىت الابيض مع بنطلون الجينز الغامق يفتح النفس 😢 كيف بتكون مرتبه و نضيفه كده و الطرحه ثااابته و الملامح جميله و واضحه ، حسيت اني مطفيية من الوجود قدامها .. دخلت للمكتب و نفسي اتسدت زاتو من الكلام .. هي مشت و معمر دخل و قفل الباب قال لي كيفك ياسندس؟ طولتي ! ليك يومين ؟ قلت ليهو معليش كنت ملخومه مع الجامعه ، قال لي كيف صحتك و اخبارك ؟ قلت ليهو الحمد لله تمام والله . كان نفسي اسالوا غفران دي مرتك ولا خطيبتك ؟ عاينت لي يدو الشمال لقيتو لابس خاتم فضة ، قلت خلاص حتكون مرتو او عاقد عليها .. لأنو الخاتم في يدو الشمال بدل على كده .. قال لي الجامعه كيف؟ قلت ليهو تمام والله .. كان شايف ردودي مختصرة شديد فقال لي مالك ؟ في زول ضايقك الليله ؟ احكي لي ؟ .. أنا بحاول ارجع روحي من المنعطف الماشي عليهو تفكيري ده ، معمر دكتور و اكيد تعاملوا حيكون كده راقي و بتهذيب و بحنان معمر ما بعاملني كده عشان انا سندس او مميزة عندو ، تعاملوا حلو مع اي زول ، انا ما مفروض انجرف لي سكه تتوهني و يبقى لي ده مرض جديد ، رغم انو اهتمام معمر بالنسبه لي شايفاهو حاجه بتخصني انا عشان كده احتمال زعلت لمن شفت غفران دي ، بحاول اخلي مخي يستوعب انو انا مريضه و هو دكتور و التعامل ده حيكون كده .. قلت استغفر الله في سري و رديت ليهو لا والله ما متضايقه ، بالعكس جايه احكي ليك حاجات كتيرة الليله ، قال لي اتفضلي و ده الأنا كنت منتظرو و ابتسم لي .. ابتسامتو بتخلي اي وحده تحبو ياخ😭😭😭 ياسندس اثبتي و اركزي و ما تنجرفي طوالي ياخ ، حاولتا اتجاوز ابتسامتو الكساارة ، و رديت ليهو بابتسامه معمر انا ما عندي اولاد خالة و اخوي ما بعاملني كويس لكن كنت بقول للناس البره كده عشان البنات عندهم اولاد اهل حلوين و بعاملوهم حلو و بهظروا و بطلعوا معاهم و بفسحوهم و بختوا الحاجات دي كلها استيتوس و انا بشوفها ، حقيقة انا عندي اولاد اعمام بس و ما متواصلين معاهم و لابعرفوا لي حاجه .. كنت مستغربه انو الناس البره عايشين حياة حلوة كده كيف مع اهلهم؟ مع معارفهم؟ قلت لي انا ما يكون عندي زي البنات اخو و اولاد خالة زيهم .. فكنت بحكي لصحباتي عن الحاجات الحلوة الأنا كان نفسي فيها شديد .. كان نفسي تحصل لي و تكون عندي زي بقية الناس ، قال لي ليه ما قلتي لي اخوك انو نفسك في الحاجات دي ، يعني ليه مثلا ما قلتي اتصل عليهو و اقول ليهو يا احمد انا عازماك الليله ، كان حيرفض؟ ما اظن لي في اخو برفض حاجه زي دي لي اختو الصغيرة بالعكس ممكن تفرحوا كمان ؟ قلت ليهو انا بخاف من احمد بخاف منو شديد ، كيف ح اقول ليهو انا عازماك وانا بخجل منو ، لو احرجني ؟ قال لي يعني انتي خايفه يحرجك ويقول ليك لا؟ قلت ليهو اي .. قال لي طيب واصلي لي كلامك ، قلت ليهو لكن مع مرور الوقت صحباتي بقيت احس بيهم ما بصدقوني ، مرات بلمحهم بتغامزوا و هم بقطعوا فيني او بهمسوا لبعض ... مرات بكون بحكي ليهم بقصصنا انا و اولاد خالتي و عادي يقطعوا كلامي في موضوع جديد وكأنوا موضوعي ما مهم ، قال لي و بتزعلي ؟ قلت ليهو اي بزعل شديد .. قال لي رغم انك عارفه انو الموضوع وهمي وما حاصل و بتزعلي ! ليه بتزعلي؟ قلت ليهو بزعل شديد وبمشي بعيييد منهم مرات ببكي و مرات بتشنج ، و بغضب قال لي بتغضبي لأنو الدايراهو ما حصل ليك .. لانو صحباتك اتجاهلوا كلامك الشاكيين فيهو و الإنتي عارفاهو كذب ، عارفه ليه بتزعلي ؟ بتزعلي من نفسك ياسندس ما من صحباتك ، بتلومي نفسك و بتقولي انا بعمل كده ليه ! لأنو جواك في شخصيتين والاتنين انتي ماقادرة تتحكمي فيهم .. قلت ليهو لكن امبارح حصل الكلام الكنت دايراهو كلو دي ماحاجه غريبه! قال لي حصل شنو ؟ قلت ليهو احمد كان بتعامل معاي بطريقه غريبه ، من الصباح و لحدي المساء . كان مهتم بي شديد ! ماعارفه مالوا ! قال لي طيب دي مش حاجه كويسه؟ قلت ليهو اي حاجه كويسه و انا اتبسطت شديد امبارح بس كنت مستغربه منو يعني ... قال لي طيب حكيتي لفراس؟ قلت ليهو ده الكنت دايره اقولوا ليييك ، فراس ما اتكلم معاي كتير في النوم و بالعكس مشى طوالي كمان ! ما زي كل مره انا بس حكيت ليهو بي احمد و هو مشى .. معمر ضحك 😂😂 و عاين لي قال لي يكون بغير عليك حتى من اخوك ، 😂انا زاتي ضحكت معاهو قلت ليهو احتمال برضو مش ، قال لي طيب بالنسبه لي انا دي حاجه كويسه ياسندس 💜 يعني في امل ، قلت ليهو امل ؟ قال لي سندس ح اتكلم معاك بقسوة شوية ، انتي حاليا في مرحله خطيرة شوية ... حيبدا فراس يخلط الامور في احلامك ، حتشوفي انو كلامو صح و احمد بدا يتصلح معاك ، و كل الدايراهو بديتي تلقيهو .. ما عايزك تختي احتمال ولو بسيط انو البحصل ده الفضل برجع لفراس ، سندس فراس ده مفروض تعترفي بي انو شخصية وهمية مؤثرة عليك بطريقه ممكن تبعدك من الدنيا .. قلت ليهو نعم!! فراس ما حاجه وهميه ، قال لي زي ما انتي اتقبلتي اولاد خالتك الناسجاهم من مخيلتك اتقبلي انو فراس ده حاجه زيهم نسجتيها من مخيلتك خوف من انو تكوني وحيدة ، قلت ليهو معمر يعني انت قصدك انو انا مريضه و بتهيأ وجود زول اسمو فراس؟ اي صاح انا كذبتا في اولاد خالتي لكن انا عارفه اني كذبتا ما زي فراس ، فراس براهو .. قال لي لا ما براهو .. قلت ليهو معمر انت قصدك اني بكذب؟ قال لي ما بتكذبي لكن مافي وجود لشخصيه اسمها فراس في الواقع ! انتي مقتنعه بي انك بتتهيأيهو و بالتالي اقتنعي انو كذبه زيو زي اولاد خالتك . قلت ليهو معنر انت بتتكلم كيف ! فراس مازي الناس قلت ليك ، وقفت على حيلي كنت عرقانه و برجف و غضبتا شديييد من معمر قلت ليهو غلطانه انا لأني صدقتك انك مصدقني من البدايه ، انت خاتي في راسك اني مجنونه صح ؟ بتعاملني كده صح؟ تاني انا ما جايه هنا ابدا ، مرقتا منو و مشيت انا كلي عرقانه و بتراجف .. و باكل في ضفوري ، ورجعت لحركة انتف شعري من النص مجرد نقاش رجعني لحالتي الاولى ..
#تابعوني 💚
#تنبييييه🚨
، انو القصه واقعيه للبسألوا ..
