اخوي أحمد اداني مصاريف يوم السبت قال لي اشتري العايزاهو مشيت سوق بحري يوم الاتنين من الصباح في محل بتاع تونكات طويله و بناطلين رهييييب ، اشتريت زي تلاته تونكات و طقمتهم مع الطرح الشفون الخامه التركية الأصليه ، و إسبورتات تلاته .. يعني زي تلاته لبسات مطقمااات و جيت نازله للكوفير قلت ليهم عايزة استشوار و اظبط وشي ، عملوا لي حاجاتي و طلعت و فعلا اي تغيير بسيييط في الزول ممكن يتسبب براحه نفسيه كبيرة 💓 طلعت من مكاني مبسوطة انو شكلي اتغير شديييد و بقيت حلوة شديييد ، لمن رجعت البيت امي استغربت فيني شديييد قالت لي يابت زايدة حلا كده مالك عملتي شنو! قلت ليها مشيت الكوفير قالت لي لكن والله ملامحك لمن ظهرت ، ضحكت و دخلت جوه اخدت لي حمام منعش و صليت الضهر و العصر سوا ، و فتحت المصحف و بديت اقرا سورة مريم💓 تميتها و قعدت في سريري اسبح بعداك ، خنساء جات راجعه بدري اليوم ده 💓 كانت تعبانه من السخانه و الجو .. دخلت قالت لي كيفك ؟ و طوالي للحمام و بعدو صلت وجات واقعه رقدت حتى ما كانت ملاحظه لي ، لمن اتقلبت و هي شبه مدروخه بتسأل فيني اتغديتو بشنو ؟ قلت ليها لسه ما اتغدينا يادوب كانت عاينت لملامحي وصرخت 😍سندددددس😍😍😍 ده شنو ياسندس 😍😍 قلت ليها براحه مالك 😂😂 بس مشيت الكوفير قالت لي العمل ليك حواجبك منو 😍 بقيتي مبالغه لكن 😍 في شنو مالك التغييير ده .. و فجاة صحصحت بعد ما كانت نعسانه ، قعدت في نص السرير رفعت لي شعرها كعكعه و قالت لي الفي الاكياس دي شنو ؟ قلت ليها اشتريت حاجات .. امي جات داخله علينا بالشاي قالت لينا الجوطه في شنو؟ مالكم؟ قلت ليها اقعدي يا امي نفرجكم سوا .. قمتا لبست اللبسه الاولى بتطقيمتها ، و التانيه و التالته و هم بعاينوا وخنساء مخلوعه قالت لي حلواااات شدييييد😍😍 الاداك قروش منو قدر ده و مشيتي ياتو سوق؟ قلت ليها اداني احمد و مشيت سوق بحري من الصباح ، امي قالت ليها والله قامت بدري عملت حاجاتها و رجعت خلعتني والغتيته غامده القروش و ساكته ولا جابت لي خبر 😂😂 خنساء قالت لي ولييه احمد يديك و مايديني؟ امي ردت عليها انتي عاد بشغلك ويصرفوا عليك؟ قالت ليها حق الأخو ده برااهو قلت ليها خنساء والغيرة لكن 😂💔 اسمعوني انا عايزة اقول ليكم حاجه لكن لمن يجي احمد بصرح بيها ، خنساء قالت لي والله لكن ماعرفت الحب الكبير ده شنو بينك انتي و احمد .. قلت ليها مالك اخ و اختو البحشرك بين التومه و بصلتها شنو ! امي فكت الضحكه قالت لي اسمها الفولة و قشرتها 😂😂😂 غايتو لكن مابتعرفن اي شيء كدي اقعدوا اشربو الشاي و بطلوا المناقرة ، الباب دقا مشيت فتحت لقيتو احمد قال لي ازيكم ؟ قلت ليهو كويسين الحمد لله جييت في وقتك ولد حلال والله تعال .. جا معاي للغرفه سلم على امي و خنساء و قعد تااني عملت عرض الازياء 😂😂 و وريتو لبسي عجبو شديد .. خنساء قالت لي اها احمد و جا قولي الشمار سرييع روحي حرقتني، قلت ليها غايتو جنننك شمشرة مباالغه .. احمد قال لي في شنو ؟ قلت ليهم انا سندس من الليله اعلن اني سوف اكون محجبه من يوم بكره و اني ح التزم بالحاجه دي لنهاية عمري💓 بإذن الله و الله يقدرني على الإلتزام .. بعد خلصت لقيتهم التلاته مبحلقين فيني ؟ احمد قال لي سندس واعيه لكلامك ؟ متأكدة انك دايرة كدة ؟ القرار ده ما حاجه الزول بعملها بين يوم و ليله.. و القرار ده الزول ما بتراجع عنو ابدا يعني تاني مافي فك شعر لافي اعراس لا في اي مكان حتى عرسك زاتو ، حتلتزمي باللبس برضو لازم يكون واسع و فضفاض و محترم ؟ الحجاب ما طرحه بس ولا حماس ساي كده .. قلت ليهو احمد انا واثقه من قراري و عارفه يعني شنو حجاب يا احمد .. قال لي كان كده تعالي ادي اخوك حضن كبييير💓💓 مبسوط منك شديييد ، قام على حيلو و باسني في راسي💓 و قال لي مبسوط بيك شديييد ، خنساء قالت لي انتي جاااده يعني تاني مافي شعر شعر كلو كلو😂😂 قلت ليها كلو كلو .. قالت لي والله لكن حظك و الله يهديك اكتر ، يعني بقيت انا منحرفة البيت الوحيدة😂😂 امي قبلت عليها الله يهديك انتي يا الكبيرة و عويرة .. قومي ختي لينا الغداء يابت قالت ليها حاااضر يا امي و لمن قربت للباب اتلفتت عاينت لي وقااالت لي عشان الخبر السمح انا كل شهر ح اطلع ليك 1000 جنيه من المرتب حقي و اثبتها ليك ان شاء الله عشان ما تقولي احمد براهو البديك 💓💓 قلت ليها خنساء صححي 😍 جيت جاريه ليها حضنتها حضن فررحه كده و مشيت .. اتغدينا و بعدها اي زول مشى يشوف الوراهو شنو ، كان بالنسبه لي يوم التلات زي يوم العيد 💓 نفسي اشوف وش معمر عامل كيف .. صحيت الصباح جهزت روحي و لبستا و لفيت الطرحه لفه حلووة شفت الخطوات من الانترنت ..طلعت لي امي و احمد بشربوا في الشاي صبحت عليهم احمد قال لي ياصباح الورد يا جميل انت ماشاء الله .. قلت ليهو ما تخجلوني ياخ 💔 قال لي انتظريني اوصلك قلت ليهو لالا بمشي عايزة اتمشى لحدي الزلط عاين لي كده و قال لي طيب .. سلمت عليهم و طلعت لحدي الزلط ركبت المواصلات كنت متشوقه لشوفة معمر شديد 💓 وصلت العيادة ما كان في زول غير المرة البتنضف قالت لي لسه مافي زول جا قلت ليها ما مشكله عارفه الدكتور بجي بتين قالت لي ولا ناس الاستقبال مافي بجو الساعه تمنيه كده، قلت ليها ايوة عارفه ما مشكله عاينت لي وقالت لي اتفضلي طيب قعدت بره في الاستقبال الساعه تمنيه لمن جات جوا ناس الاستقبال و بعدهم معمر جا داخل 😍 عليكم السلام و دخل ، ما لاحظ لي قاعده 😂😂 كان قايلني وحده من المرضانين و قاعده منتظراهو .. قمتا عشان ادخل وراهو بتاعت الاستقبال نادتني ، قالت لي يا استاذة ممكن اخدمك بشنو؟ قلت ليها انا جاية اقابل دكتور معمر .. قالت لي وين الكرت بتاعك لو سمحتي؟ قلت ليها ما جبتو معاي لانو ماجايه لمقابله ، قالت لي طيب جاية لشنو ! قلت ليها بصرة وش انتي ممكن تدخليني ؟ قالت لي اسفه ما بقدر ادخلك بدون الكرت ، قلت ليها انا بجي هنا كل مره ؟ انتي ما اول مره تشوفيني ؟ قالت لي اسفه يا استاذة سندس ايوة بتجي بس بدون الكرت ما مسموح لي ادخلك للدكتور .. قلت ليها اجي ؟؟ سبحااان الله ! معمر جا طالع يقول ليها تعمل شاي لقاني واقفه بتناقش معاها ، قال ليها انتصار! خير؟ قالت ليهو استاذة سندس ماجابت الكرت و انا وريتها انو تعليمات العيادة مابتخليني اسمح ليها تدخل بدونو ، قال ليها هي دي سندس؟؟ اتلفت ليهو ازييك يادكتور .. عاين لي بي وش مصدوم و ده كان واضح فيهو قال ليها لا كان تدخليها من قبيل هسي مامشكله ، اتفضلي ياسندس و انتصار كلمي الخاله تعمل لي شاي احمر بنعناع .. قلت ليها و انا مبتسمه لي اخر ضرس و انا عايزة كمان لو سمحتي .. و دخلت معاهو كان مخلوع فيني بطريقة واضحه😍 قال لي اتفضلي .. قعدت في الكرسي و هو قعد في كرسيهو و اول جمله قالها لس ماشاء الله تبارك الله 💓 ابتسمت بخجل قال لي شكلك متغير الليله ! قلت ليهو ايوة استايل جديد و كده، قال لي و هو بشير بيدو على راسي حتى الحجاب! قلت ليهو لالا ان بإذن الله نويت اتحجب .. ابتسم و قال لي والله خبر سمح من الصباح ربنا يثبتك و يوفقك ان شاء الله .. قلت ليهو اميين يارب و عاين لي و ابتسم تاني💔😭 جابت لينا الخاله الشاي ، و مرقت و هو تلفونو رنا كانت غفران ، رد عليها صباح الخير قالت ليهو انت وين ؟ قال ليها في العيادة قالت ليهو خلاص انا جايه عليك قال ليها طيب و قفل .. شال كبايتو وشرب شاييهو عاينت ليهو بعد ما سمعت انها جاية ، قلت ليهو شكلك مشغول يادكتور و انا جاية في مواعيد ما حقتي ، قال لي لالا مافي شيء ولا مشغول اخدي راحتك .. انتي بما انك جيتي برااك معناها عايزة تقولي لي حاجه احكي لي انا سامعك 💓 قلت ليهو ما في شيء بس جيت سااي ، قال لي سندس طيب سبب التغيير الحصل ده شنو ؟ ممكن اعرفوا ! الحاجة الخلتك تقرري كده شنو ؟ قلت ليهو والله بالضبط السبب شنو مابقدر احدده ليك لكن ابوي 💔 مشيت زرتو في المقابر كنت محتاجه اتواصل معاهو واحكي ليهو ، كنت مشوشه شديييد و بعد كلامك عن فراس و بصراحه زعلت منك لكن لمن مشيت لي ابوي وحكيت ليهو انو انت مامصدقني ، قاطعني قال لي لا انا ماقلت اني ما مصدقك قلت ليهو دقيقه اسمعني .. قلت لي ابوي انك ما مصدق انو معمر حاجه بتحلي علي حياتي .. لكن ما عارفه انو وجودو مضر ولا نافع .. قلت لي ابوي اني محتاجه اعرف امو انا ماشه صاح في حياتي ولا لا .. بعدين قعدتا سرحانه في قبرو مسافه و جاني جواب لروحي براي " الطريق الصاح ده وااااااضح ما فيهو فروع ولا اتجاهات ، انا عارفة اني مفروض التزم بالصلاه والحجاب و القران و ده ما تدين مني دي فطرة السنه المفروض اكون ماشه بيها ، و كأنوا ابوي بقول لي انتي بعدتي روحك براااك من السكه الساح و مشيتي للوهم برجلينك انتي الدخلتي نفسك في سكة مجهولة و توهتي روحك " قال لي و بعد طلعتي من المقابر ، قلت ليهو قررت اغير نمط حياتي شوية عاين لي و ابتسم وقال لي ان شاء الله تبقي قدر كلامك، الباب دقا و قال ليهو ادخل كانت غفران💔 قطعت كلامنا 💔 قام على حيلو سلم عليها ، و سلمت علي وقعدت . عاينت ليها و لي ملابسها كنت حاسه بالفخر اني بشبهها 💓 الليله حسيت انو قدري عالي وانها ما احسن مني في حاجه 💔 .. قالت ليهو وللله جنس حر بره ياعموري اسكت بس قال ليهت اي الجو صعب الليله وصلت مصدع قبل شويه قالت ليهو لا حولااا مبالغه والله .. كنت بعاين لي حركاتها وهي بتتكلم و لي لبسها و مكياجها البسيط و انا كمان متمكيجه بسييط لانو اساسا ملامحي واضحه بقت💓 تقريبا معمر لمحني بعاين ليها و بعاين لنفسي .. لأنو ابتسم 😂 قمتا وقلت ليهو انا بستأذن قال لي اقعدي ياسندس غفران طالعه هسي اساسا قلت ليهو لالا انا ماشه الجامعه ، قال لي سندس اقعدي .. قامت غفران قالت لي اقعدي انا طالعه والله بس في ظرف وشايلاهو ومارقه وراي شغل و لف كتير الليله قلت ليها في عز الحر ده قالت لي والله تصدقي بعمل في تصديقات للمستشفى ، قلت ليها ياتو مستشفى؟ قالت لي مستشفى علاج اورام خيري، بنعمل في تصديقات للاجهزة و النفايات الكيميائيه و المبنى قرب يخلص ان شاء الله و منتظرين تتم التصديقات دي عشان نتعاقد مع الدكاترة الكويسين دعواتك بس .. قلت ليها ماشاء الله هنا في السودان ؟ قالت لي ايووة في السودان والله و معمر ده من الناس المساهمين في المستشفى .. قلت ليها والله ده عمل اكتر من رائع الله يسهله عليكم ان شاء الله يارب💓قالت لي دعواتكم معانا ؛ قامت وقالت ليهو ياعموري نتلاقى المساء و سلمت علي و مرقت .. كنت لسه بعاين فيها و هي مارقه و ما لاحظت انو هو مراقبني 😂 قال لي بت ماشاء الله عليها ، قلت ليهو اي ماشاء الله و سكت و من جواي اتغظت على تعليقو قمتا شلت شنطتي و قلت ليهو انا اتاخرت على الجامعه ، مديت ليهو يدي كان مبتسم و سلم علي شديد اول مره يعملها قال لي مع السلامه سندس ... طلعت متغااايظة شديد منو 😤
