قاعده في المحاضرة بعد ما وصلت الجامعه غضبانه ، هو خاطب ياخي البخليني افكر فيهو شنو ! خاطب لأنها لابسه الدبله بي يدها اليمين ! اول مره اشوفها لابسه الدبله في يدها ، كانت دهب و انا متأكده اني ما بتهيأ .. مافهمت حاجه للمحاضرة لأني كنت زعلانه و عندي رغبه في البكا بس ما قادرة ابكي ! رقدت على الدرج و غمضتا و اتعمدت اني اشوف فراس عشان ابكي من الزعله نزلت مني دموع في الحقيقه تقريباً انا خلطت الحلم مع الحقيقه ! متأكده انو في دموع نزلت مني و بللت طرحتي ، بس انا كنت بشكي لي فراس في النوم ؟ الخلاني اربط الحلم شنو ؟ انا شفت فراس ليه تاني؟ وهو ليهو كم يوم غايب من احلامي ! اتشوشت و ماقدرت اتم المحاضرة استأذنت و طلعت لمحتني دينا صحبتي طالعه و دموعي محمرة و آثار البكا ظاهرة في وشي ، كان نفسي اتصل لي معمر و اكلموا انا متضايقه من شنو ! بس ما ح أقدر أصارحوا .. اللحظه ديك حسيت بحوجه شدييدة لي احمد اخوي ، اتصلت عليهو و انا صوتي وااضح جدا انو تعبان ، اول ما رد علي سألني سندس مالك! قلت ليهو مافي حاجه بس مخنوقه ما دايرة اقعد في الجامعه ، قال لي طيب ارجعي البيت قلت ليهو عايزة اجيك في الشغل ممكن؟ ولا حتشاكلني ! سألني سندس انتي بتبكي؟ قلت ليهو احمد اي😭 عايزة اشوفك ممكن ؟ قال لي طيب تعالي .. طلعت طوالي و ركبت الحافله من جنب الجامعه و خلييت باقي محاضراتي على جنبه و مشيت لي احمد انتظرتو تحت لحدي ما جا نازل لي .. قال لي سندس مالك يابت ؟ في زول حاصله ليهو حاجه؟ قلت ليهو لالا قال لي مالك ؟ قولي طيب .. قلت ليهو انا زعلانه شديييد .. عاين لي كده مساافه وقال لي اركبي العربيه ارح ، مشينا على شارع الاذاعه و قعدنا عند ست شاي 💓 كنت هديت شوية من الزعله الأنا فيها ، جاب لي كركدي سخن 💓 لأني بحب اشربو ، و خلاني بعد خلصتو و سألني مالك ؟؟؟ طبعا حسيت يادوووب اني وعييت😂😂 هسي اقول شنو ؟ احمد بقتلني كان عرف اني بحب زول ! عاااينت ليهو كده مسااافهه و سكتا ، قال لي يابت من قبيييل بتبكي و تعزي في شنو ؟ قولي لي ؟ قلت ليهو ما عارفه في شنو ، حمر لي و قال لي سندس قولي ؟ .. قلت ليهو احمد ماعارفه بس و قبلت وشي منو ، فجأة قال لي ادوكي شاكوش ولا شنو ؟ و كأنوا فهمني انا زعلانه من شنو ، قبلت عليهو وسكتتا قال لي ايواا الموضوع كده انا عرفت من دموعك الصاابهه مطره دي ، قولي ماتخافي ده منو؟ قلت ليهو ماعندي زول والله قال لي سندس اتكلمي انا م ح اعمل ليك حاجه ، قلت ليهو والله ما عندي زول ، قال لي طيب الزعلك منو؟ قلت ليهو واحد اسمو معمر .. قال لي معمرر!!! قلت ليهو اي واحد بعرفو اسمو معمر اتناقشتا معاهو بس و زعلني ، قال لي اتناقشتي معاهو في شنو ؟ قلت ليهو هو مفروض انا و هو و حبيبتو اسمها غفران مفروض هو يعمل البرزينتيشن و يجهزو وعشان معانا حبيبتو اي زول بجهز الجزء و يقدمو . لقيتو مرسل ليها الجزء الجاهز و ما وراني و انا معاهم في التقديم بعدين بس ده الحصل .. طبعا عاين لي بعين كده ما فهمتها وقتها لاني ما كنت عارفه انو احمد بعرف معمر حق المعرفه و انو عااارفني بكذب وبسوق فيهو بس سكت وقال لي تمام خلاص ده ما سبب يخليك تضايقي بس البنات عموما كده حساسات زيادة عن اللزوم ، ارح قومي اوصلك البيت قمت معاهو وركبنا و طول الكريق تاني ما سألني سندس مالك ، لأنو ختى فهم في راسو و هو انو معمر عمل حاجه ضايقتني و انا ماقلتها ، كان واضح في ملامحو الضيق و بس وصلني البيت و هو رجع للشغل ، في السكه شال تلفونو وضرب لي معمر سلم عليهو سألوا سندس الليله جات العيادة؟ قال ليهو اي جاتني قال ليهو وحصل شنو في الجلسه؟ قال ليهو ماكان في جلسه الليله هي جاتني الصباح براها و طلعت للجامعه طوالي ، وقف احمد العربيه على يمينو جنب بتاع دكان و سألوا معمر اولا بعتذر يادكتور على تدخلي بس ، قبل شويه مشيت رجعتها من الجامعه للبيت كانت في حاله صعبه و زعلانه و بتبكي و دموعها ماليه طرحتها ، قدر ما حاولت افهم سبب ضيقها ما قالت لي السبب شنو بس جابت سيرتك و سيرة بت اسمها غفران ، تقريبا قالت انها حبيبتك و ألفت لي قصه وهميه عشان اصدقها .. عرفت انك انت زعلتها لكن القصه الحصلت شنو ما قدرت اعرفها عشان كده اتصلت عليك يادكتور .. معمر قال ليهو قالت ليك شنو سندس؟ قال ليهو قالت لي انو معمر وحبيبتو عملوا البرزينتيشن و ما وروها و اتغاتت عليها عشان ديك حبيبتو قام قال ليهو والله يا احمد ما حصلت حاجه في العيادة بتستدعي انو اقولها ليك ولا حاجه بتستدعي الزعل اساسا فأنا ماعارف صراحة انو نحنا سبب ضيقها ولا في زول تاني غيرنا لكن هي قالت الأسماء دي ساي بس ، احمد سألوا طيب غفران دي حقيقيه؟ معمر قال ليهو احمد سؤالك ده بعني انك بتشك في كلام سندس هل هو حقيقه ولا كذب ؟ و دي حاجه مافي صالحها ولا في صالحك ، اي غفران زميلتي و سندس بتعرفها .. احتمال سندس خافت تحكي ليك الحاجه المضايقاها عشان انت اخوها و بتعمل ليك حذر في النهاية ، قال ليهو تخاف من شنو ؟ قال ليهو ماعارف بالضبط القصه شنو بس ممكن ده تلميح بيوحي بالغيرة؟ قال ليهو كيف مافهمتك ؟ معمر قال ليهو لاحظت للحاجه دي الصباح سندس كانت بتعاين ليها بطريقه غريبه و بتتبع تصرفاتها ، غير كده اأكد ليك يا احمد غفران محجبه و بتلبس بناطلين بتونكات طويله و لبسها محتشم بالطريقه العملتها سندس استايل جديد ليها ، احمد قال ليهو ايوااا و انا اقول مالها فجأة اتغيرت كده؟ قال ليهو انا الصباح فهمت الحاصل بعد جية غفران ، احمد قال ليهو وطيب هي تغير منها ليه ؟ قال ليهو دي الحاجه الكانت مفروض تحكيها ليك بس خافت منك .. خافت من ردت فعلك ، فإخترعت قصه وهميه لكن غيظها من الشخصيتين ديل خلاها ما تتجاوز تألف القصه بي اساميهم ، احمد ده جزء من مرض سندس المفروض تتجاوزوا .. قال ليهو طيب لنفرض انو غيرة بنات في بعض و هي قلدتها و حاولت تتشبه بيهل هي جابت سيرتك ليه؟ و متغاظه منك ليه؟ معمر قال ليهو ده المفروض سندس تحكيهو ليك .. احمد انا دايرك تحسسها بالإطمئنان لي انها تقول ليك اي شيء في قلبها ، انا متأكد انو الليله هي شافت فراس في الحلم و حكت ليهو لأنو هي عارفه انو القصه الحقيقيه ما بتقدر تحكيها ليك و متأكد انها قالت ليهو سبب زعلها مني شنو و من غفران ، احمد الفراغ ده لازم تسدوا انت بطريقه تخليها تطمن تحكي ليك عن الحاصل معاها ، قال ليهو اعمل شنو مثلا؟ قال ليهو كدي حاول احكي ليها بقصص الشباب و العلاقات و كده ، عشان لو في قلبها حاجه تطمن و تقولها ليك .. الحاجه دي ما بس لهسي لقدام لازم تصاحبها ، قال ليهو طيب فهمتك عايز توصل لي شنو .. قال ليهو احمد قبل ماتقفل الخط اعرف حاجه و إتأكد منها " سندس ما اخت عادية و لا شخصيه مككن نتجاهل تفاصيلها الصغيرة، حاليا مفروض ما يكون في قلبها او عقلها حاجه داساها منك ، مفروض تكون انت فراس البحكوا ليهو اي حاجه عشان ما تحتاج ترطع لعالمها الوهمي كل ما اتعثرت عليها حاجه فهمتني؟ " قال ليهو فهمتك يادكتور والله طيب ... الحاجات البتتشاف صغيرة و مهمشه معمر كان بفهمها و بعرفها ، و مركز معاها شديد كيف عرف اني فعلا حلمت بفراس في الجامعه و اتعمدت اشوفو في الحلم ! ..
