Lawyer saber بقلم الكاتبه
نازك
قبل لاتنفتح الجامعه ...طلعت ويا اشواق للسوك اشتريت ملابس جديدة ...واشتريت ادوات مكياج
واستلمتني اشواق بالحف وتنظيف البشرة حتى اخذتني وياها للصالون اللي تشتغل بيها سوتلي خصلات بلاتينيه لان اني اصلا شعري فاتح لونه
طلع قبولي بكلية طب اسنان ...بجامعة بغداد ...
واشواق طلع قبولها بكلية الزراعه
جانت فرحتنا ماتنوصف ابد .....
رجعت للبيت واني احس بتغيير بشكلي وبنفسيتي جان الوكت قريب المغرب ....وصلتني اشواق ويا السايق اللي يكمللهم مشاويرهم ويصير هم جيرانهم من سنين
وبعد ماوصلتني راحت
دخلت البيت ...جانت مرة عمي بالمطبخ داتحضر العشا
اول ماشافتني ...نترت بوجهي
_ عززززا هاي شمسويه بروحج .....تردين هيجي ترحين للكليه ...والشباب كل يوم واحد لاحكج ...اي ادري بيج رخيصه ووكحه ...تحبين هالشغلات
_ كافي عمه عيب هالحجي ...اني تربات ايدج ....واشلون ماربيتيني راح اطلع عليج ...اذا جنت رخيصه او غاليه وثكيله ...بعد هذا الحجي ماتعيدينه
اني مابقيت الطفله اللي جنتي تكفخيها وتضربيها ديري بالج تطخين بيه
فتحت حلكها وبقت تباوعلي والدهشه ماليتها سكتت وماكدرت تجاوبني
طلعت اريد اروح لغرفتي ولازم امر على الصاله يله اكدر اطلع لغرفتي ...شفت عمي وزياد وجهاد كاعدين
حسيت بيهم استغربوا شكلي الجديد ...وجنت لازمه بايدي اكياس المسواك
_ السلام عليكم
ردوا عليه السلام ...حسيت بنظرات زياد تاكلني اكل
صاحلي عمي
_ نازك تعالي يمي شوفيني شنو هالجمال ....
_ لحظه عمي اذب الاكياس بغرفتي وجايه
وبسرعه ذبيت الاكياس بغرفتي ورجعت للصالون
زياد ماجان باقي بس جهاد وعمي
كعدت بصف عمي خلا ايده على كتفي
_ اريد احجي وياج شويه انتي تعرفين اني اشكد فخور بيج فعلا رفعتي راسي ..وحسيت باني عرفت اربي
بس اريد منج وعد ....حياتج بالجامعه غير حياتج بالمدرسه
شلت عيوني ....باوعت لجهاد شفت اجمل عيون وصافنه بوجهي ...نظراته كلها حب واعجاب وحنيه
كمل عمي حجيه وهو يكول
_ اريدج بالكليه هم ترفعين راسي ....مااريد اي حجاية تجي عليج واحب تلتزمين حتى بملابسج صح انتي مو محجبه بس ديري بالج على لبسج مااريد لا لبس ضيق ولا قصير مفهوم
_ مفهوم عمي
_ وكل يوم الصبح جهاد ياخذج وترجعين الظهر وياه
باوعت لجهاد بعده صافن بوجهي ويراقب تحركاتي
كمل عمي حجيه
_ اني اروح اصلي ....واقرا شويه قرأن .....
طلع عمي بقيت اني وجهاد
جهاد اقترب من عندي ...وكعد بصفي ...ارتبكت وخجلت هوايه حسيت كلبي دكاته صارت مثل الطبل
العرك كام ينزل من على جبيني ...
طلع من جيبه فد شي ....جانت علبه حمرة
وقدمها اليه وباوعلي بعيوني
_ هاي هديتج على نجاحج ...هو شي بسيط ...بس حبيت اعبر عن فرحتي بنجاحج وبتفوقج .....ماشالله عليج طالعه غير شكل .....
زاد خجلي من راد يعلق على التغييرات اللي صايرتلي
اخذت العلبه من ايده وفتحتها جانت عبارة عن كلادة كلش ناعمه ذهب ....سلسلة ...نازكه رفيعه وكلب صغيروني بداخل كلب اكبر .....كلش حبيتها ..بس حسيت ...بان الكلادة بيها معاني ...هوايه
