~~ نور ~~ بقلم >> أميرة أميرة أبي (2015)

الفصل التاسع

نور / بقلم أميرة أبي

سد الباب وتكا عليه مشوكي مصدوم ماعرف باش التبلى مدة وهو ساهي ونور غير كتشوف فيه ماعارفاا ماتدير شاف لعندها وبدا كيضحك بهستيرية
عدنان: س سمعتي شنو قال هههههه واش سمعتي قالك نصليو جماعة ههههههههه واش سمعتي ولا غير انا لي سمعت انا(كيشير لراسو) انا نصلي هههه لا لا واش ليا قال نصليو جماعة ههههه سمعتي بغاني نصلي! بعد هاد الدنوب والمعاصي والصلاة لي قطعتها هادي سنيييين نمشي ونصلي عاااادي فحال مادرت واااالو ههههه قال ليك اجي تصلي ههههه على واحد فحالي ظهرو متقل بالمعاصي والدنوب غادي تقبل منه شي صلاه واش لي قاطع الصلة بالله غادي يقبل منه شي صلاه (بدا كيمشي ويجي فالبيت) عادي انا نمشي نقول ليه ماكنصليش حيت الأولى اني نخاف ونحشم من الله ماشي من بشر اااه اه عدنان الإدريسي خايف ههههه شفتي ولكن انا مخايفش منه لا لا خايف نحط رجلي فبيت الله وخايف نوقف فالقبلة حشمان من الله وخايف منه اكيد صلاة واحد فحالي مامقبولاش واحد سكر وزنا وتعدا دار اي حاجة خايبة تجي نبالك واش ربي غادي يقبل منه الصلاة هههه كنحلم (وقف) انا باين مكاني فجهنم واجد غير بلا منافق راسي انا عمرو ربي يغفر لي ولا يسمح ليا..
نور قربات منه اش هاد الكلام استغفر الله.. ربي غفور رحيم والجنة والنار ماشي حنى لنقدو نعرفو ولا نحكمو فيهم هادي امور الله وحده لي عالم بها
عدنان كيحرك راسو لا ا نور لا انا طول عمري انسان واقعي ماعندي لاش ننافق راسي ولا نافق ربي
نور : {{إن الله لا يغفر ان يشرك به ويغفر ما دون ذلك لمن يشاء}}صدق الله العظيم .. واش انت شركتي به ؟! لا ابدا اذا علاش ماتوبش وترجع لطريق الله واش عمرك حاولتي جرب تيق بيا ماغاديش تندم لأن التَائب من الذَنب كَمَن لا ذَنب له وهدا كلام الرسول صلى الله عليه وسلم... الله سبحانه ماخلقناش ملائكة حيت الملائكة هما لي ماكيغلطوش حنا بشر كنخطؤو ونصيبو ونعصيو ونتوبو والله كيغفر ويتوب انه الغفار العفو الرحيم رحمته وسعة كل شيء..
(زادت قربت منه وبعد تردد مدات يديها وخدات يديه شي لي خلاه يهز عينيه المدمعين فيها) واش عارف انه من احب الاشياء لله توبة عبد مم عباده يمكن هادي البداية ضروري واحد النهار كنبداو من شي بلاصة الحمد لله ربي جابليك فرصة حتى لعندك عفاك اغتنمها وماتضيعهاش..
قاطعهم صوت الأذان غير سمعو زير على يديها وكأنه اول مرة يسمعو تبسمات وربتات على يديه مشجعاه
نور: يلاه سير باقي تابعك الوضوء.. (بغا يهضر وقطعاتو) ممنوع الاعتراض سير دغيا
ابتاسم ببهوت وزاد حاس برجليه تقال وقلبه كيدق بطريق سريعة كأنه ف سباق فتح الباب وخرج لقى امينة موجدة ليه مقراج ديال الماء سخون ونعتات ليه باب الحمام خداه من عندها شكرها وزاد للحمام بدا يتوضى ومع كل قطرة ديال الماء كتنزل عليه كيحس وكأنه كيغسل دنوبو لكتار كمل الوضوء وخرج هز يديه كيشهد كل حرف كيخرج من فمه كان خارج من اعماق قلبو قبل لسانو زاد جهة الباب ديال الجامع فتحو ودخل زادت دقات قلبه ورجفت جسمه..
كان مسجد صغير وقديم بزاف والارض مفرشا غير بزربيات باليين وكل وحدة ولونها والضو فيه قليل ناقصو بزاف ديال الإصلاحات والتجهيزات كان عبد الله ومعاه جوج رجال ساجدين بقى مدة مراقبهم ومتبع حركاتهم ساهي حتى كملو صلاتهم
عبد الله: ولدي ستنيناك وفاش تعطلتي بدينا صلاتنا رجال لي معايا زربانين سمح لينا حنى كملنا دوز انت صلي ناضو داك رجال خرجو بعد ما ودعوهم عبد الله هز المصحف ومشا جلس فواحد القنت بعيد شوية... زاد بخطوات مترددة حتى وقف أمام القبلة بقى ساهي شحال وبعد تردد وخوف  هز يديه كبر وبدا صلاته مع اول اية بداو دموعو ينزلو ومع كل ركعة كان كيحس بداك الضيق والخوف كيتلاشى ومع كل سجدة كيزيد بكاه لدرجة لحيته عمارت بالدموع وبدات كتقطر تحول بكاه لشهقات ملئات المكان صلى لأول مرة في حياته وهو كيبكي مدة طويلة وهو كيصلي بخشوع ويدعي الله يغفر ليه ذنوبو وكيردد بكل صدق اللهم إني أستغفرك وأتوب إليك من كل ذنب أذنبته ومن كل معصية ارتكبتها فأغفر لي يا أرحم الراحمين... بعد ساعات وهو واقف بين يدي الرحمن كمل صلاتو وجلس كيستغفر ويدعي مدة طويلة دوز العشية كلها فداك الجامع وكل شوية ينوض يصلي ركعات لله ويدعي ويرجع يجلس يستغفر ... صلى العاصر والمغرب والعشاء جماعة مع سي عبد الله لي كان مخليه على خاطرو وعاطيه راحتو كملو صلاتهم وطفى عبد الله ضو ودخلو لدار لقى نور جالسة مع امينة استقبلاتو بابتسامة بادلها الابتسامة ورجع دخل للبيت لوجدو  ليهم من قبل....