~~ نور ~~ بقلم >> أميرة أميرة أبي (2015)

الفصل الثامن

نور / بقلم أميرة أبي

عايشة بعدما كملات شغالها وسمعاتها الباتول كلام فحال السم رجعات لدارها غير دخلات وقفات عليها سارة
سارة: شفتي شفتي ياك قلتها ليك هادي باينة طلعات حاملة وبغا يسترها لا لا تكون زعما سحراليه ناااري العافية تحت التبن هاد بنت خوك
عائشة: واش مغاتسكتيش منين سقتي الخبار وانتي دودودو  بالعة كاسيط دعي بتيسير راه بنت خالك زعما
سارة: بنت خوك قاضية الغراض ممحتجاش لي يدعي معاها طيحاتلك عدنان بقدو وقامتو نموت ونعرف كيف دارت ليها
عايشة: بعدي مني مانقساكش باركة داك العقروشة لي فطالعة ونازلة تسممني بكلامها
سارة: واخا ماكنحملهاش ولكن عذراها جات لي تاخد بلاصتها وفحال والو تجري عليها وشكون عرف تجري علينا حتى حنا بعدما كنا سبب فاش جات لهنا وضبرات راجل كامل مكمول عايشة بعصبية نوضي الله يلعن طواسلك درتيلي شقيقة سيري غبري زلافتك تفووو على تريكة..
ناضت وقفات من بعد مافشات قلبها فالبكا  كتشوف وجها فالمراية والمسكرة لي ساحت هزات يديها تمسحها وغير قربت يديها من وجهها شمات ريحة فشكل زادت قربات يديها كتشم كانت ريحت برفان عدنان فتحات الماء ودارت الصابون وبدات تفرك فيديها وغسلات وجهها نشفاتو فتحات الباب وخرجات كتنكر بصوت مسموع بلا ماترد البال لعدنان لي كان متكي على الفوتوي
نور : مدوش بالبرفان يخ على ريحة
عدنان: خاصكي تولفي حيت غادي تبقاي تشميها كل نهار
نور: ممكن تخرج بغيت نبدل حوايجي
عدنان بمكر  تقدي تبدلي خودي راحتك انا غير راجلك
كلامه استفزها وبلا ما ترد عليه زادت جهة الباب وهو يجبدها من مرفقها حتى دارت مقابلة معاه
عدنان: دوينا لا !! هذا من اليوم بيتك وانتي قدام الكل مرتي ونبغيك تتعاملي على هاد الأساس
نور شافت فيه ونزلت عينيها ليديه لي مازال شداها اها مزيان وكنظن اتفقنا ماتمسنيش ولا نسيتي
عدنان شاف فيديه وجمعها حك جبهتو بارتباك وعاود شاف فيها كاين دريسينغ تقدي تبدلي حوايجك فيه وراه باليزا ديالك تما وباش تاخدي راحتك انا نازل لتحت.. (وزاد خارج)

نور: فين هاد الراحة من نهار شفت وجهك ماعرفتها صاطت ودورات عينيها مع البيت كان كبير عبارة عن جناح فيه صالون صغير مع ميني بار حمام وفراش كبير فالوسط ودريسنغ البيت كانت الوانو مريح للعين وفخم ولكن هي مالفتش انتباهها هدشي قد ما لفت انتباهها البار لي عليه انواع كتيره ديال الشراب بقات مدة كتشوف جهته بسخط وزادت كتجر فكسوتها دخلات لدريسينغ فين كانت محطوطة باليزة لي ماعرفات امتى ولت شكون جمعها فتحاتها لقات حويجاتها ومعهم دي شوميز دينوي ابتسمات بسخرية هزات الحوايج لغادي تحتاج ووقفات كدور كانت كل حاجة مرتبة فمكانها بدقة الملابس كانو خليط بين الكجول والسبور وليكوستيم وجهة خاصة بالأحذية وكل حاجة مرتبة بدقة سدات الباليزا وزادت للحمام تاخد دوش تحيد به التعب..
ايلاف وصلات لدارهم نزلات من سيارتها وتمشات عيانة فتحات الباب حيدات الكعب العالي لي عدبها وزادت لبيتها حتى وقفها صوت تصفاق دارت تشوف لقات باباها
التازي: تبارك الله عليك شفتي ماكيهضر معك حد بديتي تديري مابغيتي لقيتيني مشغول مع خوك لقيتيها فرصة تخرجي وتدخلي وماكاين لي يشوفك ياكي !!؟ اااش هاد الساعة فين كنتي و اش هاد الحالة جاية بيها دوي ؟؟
ايلاف: كنت فعرس
التازي: زايدها بالكدوب مع من كنتي دويي حسن ماندير فيك يدي
ايلاف زفرات واقلت ليك كنت فعرس
التازي: اها وديالمن هاد العرس
ايلاف: ديال نور
التازي: كيفاش ديال نور اش كتخربقي عليا
ايلاف: كيفما سمعتي نور تزوجات
التازي: اها تزوجات بهاد الزربة (حك جبهتو وشاف فيها) وانتي غادا لعندهم ماحشمتيش داكشي لي دارو فخوك كله ومشيتي تحضري عرسها وخوك لي مرمي فسبيطار مقديتيش حتى تجي تشوفيه
ايلاف: خويا هههه من امتى وزايدون داكشي لي وقع ليه يستاهل كتر منه خاصك تحمد الله لي باقي عايش
التازي: داك لسان طوال بلا قياس شي نهار غادي ندوز عليه بموس حافي
ايلاف شافت فيه ودارت مكملة طريقها بلا ماتجاوبو
التازي بغضب اجي لهنا مازال ما كملت كلامي ايلاف ايلاف..
دخل لقاها كتصلي بقى كيتأملها كيفاش كتصلي بخشوع داك الوجه البريئ والعوينات لكترمش بيهم كيفاش كتحرك شفافها وهي كتقرى بصوت غير مسموع تنهد تنهيدة خرجات من اعماقو وزاد للحمام فتح الماء ورجع كينصل حوايجو دخل تحت الدوش داير يديه على الحيط والماء كيتخلل شعرو وجسمو مدة وهو تحت الماء وكلما غمض عينيه كتجي صورتها فبالو نفض افكارو وكمل دوش مد يديه خدا فوطة دورها على خصرو واخرى دارها على راسو وخرج كينشف فشعرو متوجه للدريسينغ وفنفس اللحظة كانت هي خارجة منه بعدما حطات الاسدال حانية راسها كتشوف فتلفونها كانو بزوجهم منزلين راسهم شي لي خلاهم مايردوش البال وتساطحو حتى رجعات للخلف كانت غادي تطيح مد يديه جبدها بسرعة لعندو وكردة فعل حطات يديها على صدرو بمجرد ما يديها قاسوه سرات فجسمه رعشة كأنها صعقة كهربائية بقى واقف مصدوم وكيشوف فيها. ..بمجرد مانتبهت للوضع لي هما فيه جمعات يديها بسرعة وتنترات منه
نور: واش عمى ماكتشوفش
عدنان: نتي لدخلتي فيا
نور رمقاتو بغضب ممزوج بتوتر وزايدون اااش هاد د هاد ال الحالة ر راك ماشي بوحدك هنا احترم راسك شوية باركة داك العجب ديال الحرام لي حاط لهيه..
زادت وخلاتو واقف غير كيشوف وداك الصعقة مازال مأثرة على سائر جسمه مسح على لحيتو وزاد للدريسينغ..... يتبع