احببتكِ ❤

بارت 13

_ياد : (رجعنه لبغداد ووصلت نرجس لبيت اهلهه وكلت الهه اي وكت ردتي ترجعين بس خابريني ، حبيت تاخذ راحتهه ومااقيدهه ..
مرت يومين ونرجس ابيت اهله واني ميت شوك الهه وهي متخابر ف قررت اخابرهه ...

_نرجس : (الدنيا ليل واجيت لغرفتي حتى انام وشفت موبايلي يدك) : الو
_ياد : الو، شلونج نرجس ؟
_نرجس : الحمد لله زينه وانت
_ياد :مشتاقلج
_نرجس : ممم
_ياد :اي مناويه ترجعين ؟
_نرجس : لا فدوه خل ابقه بعد يوووم
_ياد : (صافن ع الفدوه الي طلعت من حلكهه )
_نرجس (تخاف مايقبل ) : هاا شكلت تخليني ابقه؟😕
_ياد : يلا عادي ، شتسوين هسه
_نرجس : والله اجيت انام
_ياد : هاا يلا تصبحين ع خير
_نرجس : وانت بخير
....

نرجس : كعدت الصبح تريكنه ،،اني وماما كعدنه نلف دولمه للضهر
_بابا : نرجس خابري زوجج خل يجي يتغده ويانه
_نرجس : ها لا بابا ميحتاج
_بابا : شبيج ليش خفتي ؟؟
_نرجس : مو اذا يجي لازم ارجع وياه ومااريد ارجع اليوم 😥
_بابا : اي اذا هيج عالعشه خابريه يجي نتعشه وترجعون
_نرجس : ان شاء الله
اتغدينه والضهر كاعده ويه اخواني ونسولف ونتضارب ونتحاضن عاد اخواني فاهمين الشقه غلط لازم يضربوني ويكسروني هاي عود شقه🤦‍♀️
.
صار الليل وبابا واخواني يسوون تكه وكباب عالفحم بالحديقه واني اجيت اساعدهم
_بابا : بنتي شو زوجج مااجه ؟
_نرجس : هسه اخابره ..
.
_ياد : الو
_نرجس : هلاو ياد ابويه يكول خلي ياد يجي يتعشه ويانه ننتظره
_ياد : الحمد لله زين وانتي شلونج🙄
_نرجس : هههه مو البارحه كلناهه ميحتاج نعيدهه😅
_ياد : هاا ولشجم سنه تبقه الصلاحيه مالتهه؟
_نرجس :  حسب 😁
_ياد : هههه يلا هسه اجي مااتأخر
...
ياد : رحت لبيت اهل نرجس وسلمت عليهم واهم فقره يمي ابوس نرجس كدامهم 😅 نرجس راضيه عالوضع حتى اهلهه ميحسون اكو شي واني مكيف وعايش اللحظه ابوسهه من خدودهه ومن راسهه 😅

نرجس : اجه ياد وحاولت ابين طبيعيه بس متضايكه من جوه كارهه كلشي اني بيهه وياد ماقصر كل شويه لو يبوسني لو يحضني واني اضحك اله علمود اهلي
واخيرا كملنه العشه والسوالف وياد كال : يلا نرجع للبيت؟
_نرجس : اي 😣
_ماما : نرجس لتنقهرين انتي قريبه من عدنه نبقة نجيج وانتي تجينه
_نرجس : ان شاء الله ماما.. يلا ياد نروح
ودعت اهلي واجيت لبيت ياد وسلمت ع امه وابوه واخته وصعدنه فوك

_ياد : شلونج ويه الحمل

_نرجس : زينه

_ياد : ماتتوحمين ع شي ؟

_نرجس : بلي

_ياد (بحماس) : اي شنو مشتهيه؟

_نرجس : مشتهيه دمك 😒

_ياد (حضنهه وقربهه من نفسه ) :كُلي فداج ياعمري

_نرجس : عوفني ياد

_ياد : شبيج شعوفج مو اني زوجج والي ابطنج ابني

_نرجس : كلت عوفني انت ليش ماتفهمني يااخي جوز مني اني مارايدتك

_ياد (بعصبيه) : انتي ليش هيج تسوين ويايه ..لج اني احبج وكل الي سويته لان احبج اريد تحسين بيه اريد تنطيني فرصه اتقرب منج وتصيرين اليه برضاتج اني اول مااجيت اخطبج تعاهدت ويه نفسي اتغير علمودج بس انتي شسويتي رفضيتيني وماخليتي كدامي خيار غير اتزوجج بغصب ومن تزوجتج هم كلشي بغصب جاي اسويهه وياج تره اني مو هيجي وميعجبني تصرفاتي وياج بس انتي تجبريني انتي ماخليتي عقل براسي والله العظيم هاي لو غير وحده واروح اخطبهه وترفضني اصلا ولااباوع بخلقتهه بعد بس انه احبج فهميني احببببج (حجيت بعصبيه وطلعت من الغرفه)

_نرجس : (تمددت عالسرير وابجي من صياح ياد والحجي الي كاله ومن حظي وحياتي وكل الي صار ويايه لحد ماغفيت..... صار الوقت متأخر وسمعت صوت الباب باوعت ياد دخل وكفت ع حيلي وخفت منه )

_ياد : (طلعت حركة كلبي من نرجس بالصياح وحجيت كل الي اريد اكوله من زمان وطلعت من البيت وضليت افتر بس ماشربت لان اني واعدهه اتغير وماريد اخالف الوعد ..  صارت ساعه ٣ بالليل رجعت شفتهه نايمه ومن شافتني خافت ووكفت )

_ياد :لتخافين مو سكران😒

_نرجس :(ماحجيت شي ورجعت للسرير ونمت وهو نام وماحجه شي...
......

_نرجس : (صار الصبح كعدت ملكيت ياد بالغرفه نزلت جوه ) صباح الخير
_ام ياد : صباح النور تعاي تريكي ويانه
_ياد : شبعت اني ..يلا يمه طالع ماتردين شي ؟
_ام ياد : لاابني الله وياك
_نرجس : ( اني كعدت عالسفره و ياد كبل كام وطلع وبدون مايباوع عليه ، يمكن زعلان مني !🤔 اي اكيد يزعل بارحه هوايه تعصب مني )
_ام ياد :نرجس ليش صافنه ؟
_نرجس : هاا لا ماكو شي ...
(تريكنه وكمنه اني واخت ياد غسلنه المواعين ورتبنه البيت وام ياد تسوي غده وعينهه عليه حتى مااشيل شي ثكيل ، حسيت نفسي رجعت طفله ومدللة والكل يخاف عليه جان شعور حلو الصراحه 😊
صار الضهر وابو ياد وياد رجعو وصبينه الغده واتغدينه وياد منزل راسه وياكل وماحجه شي
_ام ياد (حست بالوضع وكالت) :نرجس كومي صبي جاي لزوجج
_نرجس : زين (صبيت الجاي وجبته اله)
_ياد : مااشرب (وصعدت للغرفه🚶‍♂️)
_نرجس (صافنه والجاي بيدي ) : (وشبيه هذا ينتظر اصالحه مثلاً!!) اي عادي اني اشربه 😊
(هو اني ماحب الجاي وكوه اجرعه بس حتى مااتفشل و عود ممهتمه )
......
نرجس : (ضلينه جم يوم ع هالحاله كاعدين بنفس الغرفه ومنتحاجه خو جوه اصلا مايعبرني ،مليت من الوضعيه هاي ف حاولت افتح موضوع وياه...
_نرجس : ياد
_ياد (متمدد ومخلي ايده ع عينه) : نعم
_نرجس : مشتهيه رمان
_ياد : العصر اجيب

_نرجس (من جوابه البارد حسيته بعده شايل بكلبه عليه.. يااخي صح مااحبه بس جان من يجي يلطف الجو وسوالف وشقه هسه احس وحدي كاعده بهالبيت )
صار المغرب ورجع ياد وتعشينه وصعد فوك وماشفت بيده علاكه معقوله نسه الرمان !!
_نرجس : ياد شو ماجبتلي رمان؟
_ياد (ببرود) :جبت وخليته بالثلاجه جوه
_نرجس (بتعجب) :وليش ماجبته للغرفه!
_ياد :مو بعيده المطبخ😒

ياد جان دائماً اذا يجيبلي شي  ينطيهه بيدي او يخليهه بثلاجة غرفتنه لان يعرفني استحي وماافتح ثلاجة المطبخ بس هسه حتى بهاي تغير عليه 😐