نار لا تنطفيء

البارت الاول

الكاتبة الاسدية

اعرفكم بنفسي اني اسمي صابرين
مواليد ١٩٧٦

عائلتي متكونة من ٧ اشخاص

امي وابوية وعندي اخ واحد واحنا اربع بنات

اني ترتيبي الثالث اخوية احمد هو الاكبر واختي سلمى وبعدها اني صابرين واختي الاصغر مني اميرة واختي الزغيرة حتى ماذكر اسمها كان عمرها سنة

ابدأ حكايتي من كان عمري اربع سنوات وكانت ليله العيد

ام صابرين يمة سلمى عينج على اخواتج اريد اترس الصوبة نفط وارجع ليطلعون هسة سابحين والجو بارد

سلمى اهو اني شعليه اريد انام نعسانة وتغطت باللحاف ونامت

احمد كان نايم حتى يكعد من الصبح يطلع وية جماعتة لان باجر عيد ايام طلعة وونسة وفرح

ام صابرين يمة صابرين عينج على خواتج هسة ارجع

صابرين اي ماما

راحت امي تترس الصوبة نفط ورجعت شغلتها حتى تدفة الغرفة مالتنا

ابو صابرين رجع بالليل مثل كل يوم بس اليوم مزيد الشرب اكثر لان باجر عيد

اشكد جان ابوية يحبنا وعمره ما اذانة بس جان هذا السم الي يشربه مدمرنا ومدمر حياتنا وحياته

شفت ابوية رجع وهو ميكدر يوكف ولا يسند نفسة

صحيح طفله ومافتهم شنو الموقف الي يصير كدامي

بس جنت انقهر على امي من اشوفها هي حامل وكوه اتعين نفسها

فوكاها كل يوم تشيل ابوية وكوه توصله للفراش حتى ينام

ابوية الي بالليل يختلف عن ابوية الي بالنهار

بالنهار جان الاب الطيب الحنون الي يحبنا ويوفرلنا كلشي نريده

بس بالليل لا حتى منتقرب منه ابد وامي متقبل واحد بينا يوصل يمة

جان كل واحد بينا نايم بفراشة وملابس العيد الحلوه حاظنيهن

حتى من نكعد الصبح ناخذ العيديات من بابا وبيبي وعمتي

امي كوه خلت ابوية بفراشة وهي مابيها حيل نزعته حذاءة والجواريب

من كامت امي وهي تعبانه عثرت بالصوبة ونكلبت بالكاع هي والصوبة والنفط

خلال ثواني بس اشوف النار شابه بامي واني واختي اميرة من حلات روحنا نريد ننهزم منكدر الباب متنفتح

ركضت امي على ابوية والنار بيها وهي تعيط

اني ركضت على احمد واختي سلمى ركض محمد فتح الباب وطلعنا نركض
امي طلعت والنار شابه بيها والجوارين ركضو عليها غطوها بالبطانية