نار لا تنطفيء

البارت العشرون

الكاتبة الاسدية

المرة عبالها من تطلع وتشتغل هاي حرية واثبات للذات وان هي ماراح تحتاج احد
بس الحقيقة الدنيا بيها هواي ذئاب بشرية مترحم بحال المره

وبالاخص اذا شافو عدها نقاط ضعف من حاجتها للمال او ان هي مالها سند

بس اني الحمد لله كنت محافظة على روحي وكدرت افرض احترامي على الكل

صابرين كنت امشي وادور على اي شغل بس حتى ماحتاج احد

واكدر اوفر فلوس العلاج مالتي

بعد مانسدت كل البوب كدامي بس باب رحمة رب العالمين مازالت مفتوحة

امشي بشارع كان تجاري شفت واحد من المحلات كان كاتب المحل بحاجة الى عامله

كلت خلي اتوكل على الله ماخسرانة شي اذا دخلت وسالت

صابرين السلام عليكم

صاحب المحل وعليكم السلام رفع عينة يتفحصني اني زبونة او شنو

صابرين بخصوص القطعة الي كاتبين بيها محتاجين عامله

ابو المحل بثقل وتكبر اي محتاجين عاملة عندج وحده

صابرين اي والله اذا ممكن اني اشتغل لان كولش بحاجة للشغل

ابو المحل ضل يباوع علية بنظرة تفحص انتي مشتغلة قبل بمحل

صابرين لا هاي اول مره اشتغل لان جنت خارج العراق وهسة رجعت

ابو المحل هاي الشغله تحتاج وحده فطنة ولبقة وتتحمل الزبون وتحاول ترضي ومتطلعة منا زعلان

صابرين اي اعرف وان شاء الله اكدر اطبق هاي الشروط

ابو المحل انتي شنو اسمج وسكنج قريب منا لو بعيد

صابرين اسمي صابرين وبيتنا مو بعيد زين اكدر اوصل بسهوله

ابو المحل زين صابرين ميحتاج احجيلج عن الامانة وشلون واحد لازم يحافظ عليها وميحتاج اكلج ماريد تاخير

وماعندي يومية رايده اجازه بحجة شكل واهم شي تحافظين على سمعة المحل

صابرين اي تدلل ان شاء الله

ابو المحل تكدرين من باجر تستلمين شغلج ساعة ١٠ الصبح

صابرين شكرا الف شكر

ابو المحل ماسالتي عن الراتب شكد لان لتتوقعين رواتبنا هواي

صابرين الي انت تكول عليه ميخالف اني موافقة

ابو المحل تكدرين تكليلي ابو سمير وتوكلي هسة وباجر استلمي شغلج

صابرين شكرا ابو سمير وان شاء الله باجر قبل ساعة ١٠ يمك

رحت للبيت شكد جنت هلكانة من التعب والفرة بس شكد جنت فرحانة ان الله سهلها علية وراح اشتغل