#جنتـي❤ | الـحـلـقـه الـثـانـيه :
أني بتردد : انت معتصم عم ملك ولا
معتصم شافلي بملامحه الحاده وهو عاقد حواجبه : أيه ! تعرفيني ؟
أني : اني جنات اللي عقمتلها الجرح
معتصم : تفكرت ! ما توقعتش اني نشوفك مرة ثانيه وبالذات هني
عمي : اهم طلعوا يعرفوا بعضهم
معتصم : بالجوده
اني : بيك اكثر
وخشيت وخليتهم يهدرزوا ، وشكل معتصم عالق فـ دماغي ! يعجبني الراجل الرزين اللي ما يهزه شي وكان معتصم مثال ممتاز عليه
دوشت واتكيت ف مكاني وقعمزت بحداي صفاء تهدرز
صفاء : طرف يهبل ولد صاحب بابا ولا ؟
اني بأستفزاز : أيح عاد ، وانتي كلهم عاجبينك
صفاء ضربتني بالمخده : خزي والله ما تتحشمي ، ماهو قلبي ما يتحملش
اني : كان ماتسكتيش والله الا نقولها لوسام راه ! خليه يعرف حقيقه حبيبته
صفاء بخوف : لالا خلاص سكتت
مروة : قالت ماما بيجونا بعد يومين ، بابا عزمهم ع الغدي والعشي
صفاء : الزوز ؟
مروة : ايه الزوز يا تنباله ، نوضي دوشي وقيلي احسنلك نوضي
صفاء : بنكلم وسام ليا هلبا ما كلمتاش
مروة : مش مشيتي لحوش سمر ؟ ولا مش قاعد ينسرف
صفاء حضنت مخده ودارت روحها زعلانه : ما تقوليش ع حبيبي وخو صاحبتي نسراف
مروة : نسراف ونص
صفاء : خير من مهيب يلي اربعه وعشرين ساعه يدور من مكان لثاني
مروة : مهيب يشغل ياماما ، مش زي وسام
اني قعمزت : خلاص خلااااص أوووف صدعتولي راسي
مروة تضحك : باهي ارقدي يا سنقل
ورقدت ورقدوا الحوش كلهه
______________________________
بـعـد مــرور يـومـيـن
ماما : بخرتي الحوش ؟
اني : ايه
ماما وقفت قدامي ورقتني : بسم الله عليك من كل عين شافاتك ومذكراتكش يارب
اني ابتسمت ومسكت ف ايدها : ربي يخليك ليا يـ ماما
ماما ابتسمت وحضنتني : وليا يا بنيتي ❤
وخشوا صفاء ومروة وقعدنا نشوفوا حاجه تبي التنظيم او حاجه ناقصه لعند ما طقطق الباب وفتحت مروة واني وصفاء كنا فـ المطبخ
طلعت صفاء سلمت وقعدت اني ساويت شعري وخليته نازل لأخر ظهري وكنت ماسكاته ذيل حصان وأول ما خشيت ماما اشرت عليا
ماما : وهادي بنتي الصغيره جنات
سلمت ع المرا وكانت تشوفلي بنظرات غريبه ومعاها كنتها " صابرين " وحد متوقعتش نلقاه واللي هيا ملك وقعدت ماسكه فـ مروة وتلعب عليها
خشينا للمطبخ وقعدنا نحطوا ف الصواني عـ الطاوله وخشت علينا صابرين
صابرين : نعاونكم فـ حاجه ؟
مروة : لالا حبيبتي صحيتي
وطلعنا قعمزنا كلنا ع الطاوله وكنت اني وبحداي صفاء و بعدها مروة وماما بحداها عـ خديجه
" أم معتصم " وصابرين وملك ومروة وصفاء يتهامسوا واني لاهيه فـ صونيتي
أنت تقرأ
#جنتـي ❤ بقلـم "آلاء التيـر " (مكتملة)💚
Romanceتحكي عـ قصة حياه بنت طموحه ومليهااش فـ الحب بكل وكيف جاهـا الشخص المناسب وحباته فـ ظرف غير متوقع وبشكل غير متوقع " وطبعـاً الـروايه فيها نمط مـن التجديد ومش حـ تكون مشابهه لـ غيرها ،
