جنتـي ❤ | الحلقـة الـثامنـة :
ف اليوم التالي انخطبت صفاء ومشي الجو حلوو، رجعنا للحوس ومعانا مروة بخبر حملها ف بدايه الثاني وقعدنا نجكوا ومروة معبيه مواضيع من سفرتهم الاخيره
صفاء: اي وشن داار ثاني
مروة: قعد يديرلي في كمادات وجابلي عصير ليمون
صفاء: وشن هيا هديتك ؟
مروة: جابلي ايفوون x max
صفاء: طيح سعده! خيره معادش يبي يطلق الايفونات s7 ببعدين s7+ بعدين 8 ، 8+ x وتوا x max
مروة: المهم اي حاجه يجيبهالي حبيبي حللوة ❤
صفاء: دووم عليك ان شاء الله ، اني بنكلم وسام وبنرقد
اني كنت مش لاهيه معاهم وماسكه فوني ونتفرج ع صوور معتصم ، ونبتسم ودموعي ينزلوا بروحهم
مروة: جوجو ! خيرك غزالتي
اني رفعت راسي وشفتلها: أستاحشتا هلباااا
مروة قربت بحداي وحضنتني : ياروحي! ربي يرجعهولك سالم وتتزوجوا وتعبواا الحووش عرررم صغاار
اني ماسكه فيها بالقوة : امين يارب
مروة : غدوا بتطلعي معاي للمول ؟
اني: لالا ملياااش نفس
مروة: علاااش ؟
اني: معادش عندي نيه لا ف طلوع ولا خشوش
مروة: هدا كله ع خاطر معتصم؟ مش قلتي انك ما تحبيهش ومجرد صديق وخلاص
اني: طلع ساكن فيا من غير علمي ! حبي ليه كان واضح بس اني ماكنتش نحس بقلبي
مروة: ربي يحفظكم لبعض
اني: امييين يارب ويحفظك انتي ومهيب وتشوفوا صغاركم وتربوهم مع بعض وتشوفوهم كيف ماتتمنوا
وقعدت تحكيلي ف االلي فاتني ومسمعتاش ، لعند طلعت ع وجوهنا الشمس ورقدنا
بعد مرور عده شهوووور
مروة طلعت حامل ببنت ومزاللها ع الجياب 12 يوم وبداي فيها الوجع من توا ، وصفاء بدت تبتت لعرسها واني قاعده مع مروة لانها تعبانه ومتقدرش تتحرك ف حوش مروةة
واقفه اني ع اللاوندينو ونغسل في المواعين ، طقطق الباب لبست وشاحي ومشيت فتحته لاقاني مهيب وماسك في ايده اكياس
مهيب : السلام عليكم
اني : وعليكم السلام
مهيب : شن جوووكم
اني ابتسمت: الحمدلله وانت
مهيب : الحمدلله ، اهو جبت غدي من برا
اني خديت منه الاكياس : شطرا ، لكن مروة متاكلش في الحار بطنها توجع فيها
مهيب فتح عيونه ع وسعهم : خيرها ؟ رجع الوجع
اني: لالا بس قالت الدكتوره متاكلش حااار لان بطنها
مهيب: تمام ، راقده هيا
اني: كيف خليتها تنعس
مهيب: بنتعبك معاي شوي؟
اني: تعبك رااحه تفضل
مهيب: جبتلها برودو من المطعم حطيهولها وجيبيه بنوكلها
اني: حاضر توا نسخنهولها ، انت برا تريح تو اني نوكلها
مهيب فنص فيا وضحك: جيبي قلتلك اني
ضحكت: حاضر هي
ومشيت للمطبخ وهو خش للدار وقف بحدا مروة ومسح ع راسها وباس جبهتها، خدي حوايجه ودوش بسرعه وقعمز بحداها ع السرير
مهيب: ميرو حبيبي فيقي
مروة ووجها اصفر : اممم
مهيب : هيا عمري نوضي باش ناكلوا
مروة: مخاطري ف شي
مهيب يمسح ع شعرها: ع خاطري ميرو حتى شوي
مروة قعمزت ع حيلها بمساعده مهيب : جنات وين؟
مهيب: تسخنلك في البرودو، مسكينه تعبناها معانا
مروة: أي والله
أنت تقرأ
#جنتـي ❤ بقلـم "آلاء التيـر " (مكتملة)💚
Romanceتحكي عـ قصة حياه بنت طموحه ومليهااش فـ الحب بكل وكيف جاهـا الشخص المناسب وحباته فـ ظرف غير متوقع وبشكل غير متوقع " وطبعـاً الـروايه فيها نمط مـن التجديد ومش حـ تكون مشابهه لـ غيرها ،
