الزنبقة السوداء

الحلقة 47

النشر بين يوم ويوم

داليا المسلم
الزنبقة السوداء
حلقة _47_

سيمضي كل شيء....
ولن تقف الدنيا على احد ...
هكذا علمتني الحياة .....

آماسي
- ابويه اسرح من الجيش وكام يشتغل بسيارة حمل خطية يجي تعبان كلشي محمل النا رغم اسمع أمي دكلة لاتصرف هلكد على كيفك احنا بحاجة الفلس وانتَ فاتح بيتين هو يردها

- خلهم ياكلون الف عافية وشوفي شعدهم
نقص هدوم لان راح انزل لبغداد اجيبلهم

- لا كلشي عدهم لاشيل هم

- ايامنا مشت عادية مابيها
مشاكل هواي ابتعدنا كل البعد عن بيت جدي اهل
ابوي وبيت ابوي الثاني. همات

أمي حبلت وهل المرة حبالتها كلش صعبة ومرات اصخن انه حايرة
بالجهال اغسل وابدل كله انه كمت ماعرف
شيء اسمه لعب. ابد همزين صادفت عطلة ونجحت
للثاني

اشوف ابوي. يداري امي لو صخنت مايطلع للشغل ايضل مكابلها وكاعد كامت مرات
ترجف. نكعد يمها انضل نبجي احير شسوي الها

يجي ابوي ومن يشوفها هيجي يركض. يشيلها ويغسللها مرة وكفت اباب الغرفة ضليت اتباوع
عليهم حطها بحضنة ويبجي ويمسح بوجههَ ونزلن دموعه ويحجي وياها

- امونة حبيبة بنيتي اصحي شمالج كليلي
شجاج انعل ابو الجاهل لا ابو اليريدة بعد

- لما صحت أمي ابوي شبع بجي بسكوت عليها
وهيج كضت أمي ايام حملها بتعب ومرض
مرات جدتي تجي تبقى يمها اسبوع وتروح

سنة ١٩٨٩
كملت حملها وجابت ابنية حلوة حيل تشبه جدتي
شذرة بس عيونها مو زرك جان ابوي شايلها
وفرحان بيها واحنا واكفين نتباوع الها شوكت ابوي يذبها ونشيلها لو نبوسها

- اكلج أمونة هاي حلوة جنها كردية راح اسميها اجوان يلوكلها هذا الاسم من رحت للشمال
سمعت رجال صاح بته وضل ابالي هذا الاسم

- بكيفك قيصر حلو الاسم سميها

- جدتي فرحانة لان تشبهها بقت يمنى علما
صارت أمي زينة محد اجه على أمي من بيت عمي تبارك الها ابد وانه. انضاف الي
طفل جديد شغل ومرات اطبخ اخلي تخته واصعد خاطر انوش الطباخ زين مرات امي تعيط بيه بس انه ما ارد اريد اساعدها خصوصاً بعد مرضها الاخير مانعرف شبيها على ساعة اطيح وتتخربط

كالت لا بوي ودني لبيت أم ابراهيم. السيد يقرأ
عليه جيرانة الجانو كاعدين احنا يمهم يم بيت عمي

ودانا ابوي بس مارحنا لبيت عمي دخلنا كلنا وأمي كعدت وكام يقرأ عليها السيد والعلوية همات انه خذيت اخوتي وطلعت. نلعب بالحوش مالتهم