My Life Is Changed My Love Is Twins

Part 10

~ My Life Is Changed My Love Is Twins ~
By : Tescy Descy
Cerita Rekaan

    ~ Part 10 ~

    Sudah kami masuk parking, c bibing (lelaki tulin tukang gunting di salon) punya kereta dia parking di luar saja, tidak muat sudah parking kan. Masuk-masuk saja dalam rumah punya main ribut semua ni manusia. Kalau ada hantu dalam tu rumah, terus lari bah dingar suara sakai (jakun) c erra.

    “babe.. kami tidur semua ni cni malam buli bah kan?.” (san-san)

    “bah eya lah, jangan kasi tinggal bihis (air liur) sudah lah hehehe...”

    “jangan susuh babe, kami tidur tutup mulut juga ni.” (bilang c erra. Bepikir sia dia tutup pakai apa ni)

    “punya basar rumah kau babe. Kala rumah sewa I.” (sambung c erra)

    “basar-basar juga. Bukan mau buat bising butul, marah urang sa-balah.”

    “eya bah.. mana kunun jamban ni babe?.” (erra)

    “aikkk... sia ingat sudah kau jumpa jamban. Turun naik turun naik lagi kau tadi, tidak juga kau nampak mana jamban babe?.”

    “teruja bah I sama rumah baru kau ni babe.” (erra)

    “bah.. terima kasi ahhhh.. tu sana..” (sambil sia tunjuk tu tandas di bawa tangga)

    “ooohh ya babe.. kalau kamu lapar pigi saja masak sendiri k. Kami dua sudah makan ni. Kami naik dulu k” (sia cakap sama c bia)

    “okey bah.. bukan tiada biasa sama rumah baru kami ni.” (bilang c bia)

    Senyum-senyum saja sia sama c roy naik atas. Lapas kami mandi, cerita-cerita duluk kami sikijap, baru c roy naik ulat bulu dia, siap saja terus kami tidur. Bisuk mau urus lagi persediaan birthday c mami kan. Tidak sudah kami peduli sama urang-urang di bawa, pandai-pandai lah durang bawa diri. Yang penting sia mau tidur.

    Sia bangun-bangun saja pagi-pagi tu, sia mau pigi kancing, jam 10 sudah kama tu, sia tehidu wangi kana masak, sia tingu c roy masi tidur lagi, sia pigi kancing baru terus sia cuci muka, sia pakai balik baju yang ba-tarabangan lagi karaja c roy sa-malam.

    Turun-turun saja sia pigi bawa. Punya wangi, Sia pigi cubuk-cubuk lah siapa yang masak, aikk.. pandai pula c bibing masak kama, c bibing perkerja salon yang masi kental lagi ke-lakian dia tu bah.

    “huiii… sia ingat kamu kerja semua hari ni.”

    “hai.. good morning babe.. cuti kami semua ni.” (bilang c bibing)

    “wahhhh.. siuk kan dapat bos yang buli bawa staff cuti sama-sama.”

    “hahaha.. bilang babe bia, banyak kerja mau buat cni rumah kau untuk bisuk, itu lah kami kana bawa pigi cni ni, mana ada cuti, karaja juga cni kan.”

    “ooohh.. aikk.. mana semua urang?? Kau tidur mana sa-malam??? C erra mana?.” (atuiii.. ramai lah soalan sia)

    “tidur lagi durang tu di atas, c erra di sofa tu sambung tidur. Di atas juga sia tidur sa-malam.”

    “bahhh.. sia naik dulu lah..”

    “okey babe.. nanti turun makan, untuk kita semua ni, c erra datang sudah kunun dugal dia, tu lah sia pigi masak.”

    “astagaaaa.. eya kah.. sudah dia mana ubat kah?.”

    “bulum tu. Managis-managis lagi tadi sakit perut dia, mula-mula sia tanya kanapa, buli-buli babe dia cakap dia segungut datang bulan hahahaha...”