~ My Life Is Changed My Love Is Twins ~
By : Tescy Descy
Cerita Rekaan~ Part 27 ~
Terus sia end call c miss wong. Sia duduk lagi bepikir pasal tu akaun bank. Sia cari numbur hp c rick, sia call c rick. Laju pula c rick sambut call sia.
*** Panggilan Call Me → Rick ***
“hello love.. love sibuk kah?.”“hello sayang.. tidak juga. Napa sayang?.”
“tadi bah ada cimb bank call sayang. Sayang kana suruh datang pigi cimb bank XXXXX. Kana suruh bawa 1 kali sijil mati c roy.”
“ohh.. okey, kijap lagi love datang ambil sayang. Sayang tunggu love k. Love balik rumah dulu kijap pigi ambil sijil mati roy k.”
“okey love. Hati-hati driving k love.”
“okey sayang. Love u sayang. Bye.”
“love u too love. Bye.”
Sia end call c rick, sia kamas-kamas lah barang-barang sia. Sia off laptop sia, sia kasi masuk dalam beg tu laptop sia. Sia duduk-duduk saja tunggu c rick di salon sambil tingu durang c bia buat kerja. Sia kasi tau c bia yang sia mau keluar nanti.
“babe, sia mau keluar ni nanti. Ada urusan sia di cimb bank.”
“kau 1 urang saja?.”
“tidak lah. Sudah sia call rick juga. Rick kawan sia pigi.”
“ohh.. sia ingat kan kau 1 urang saja pigi. Bahh okey bah babe. Hati-hati saja lah k.”
“okey babe. Sia balik juga cni kalau sampat. Harap-harap sikijap saja lah tu urusan.”
“kalau kamu lambat siap, tidak paya lah bah balik salon pun sia okey juga bah babe.”
“tingu lah nanti macam mana. Harap-harap sikijap saja lah tu urusan.”
Sia becerita-cerita sama c bia, tidak lama sampai c rick. Sia bawa saja sedia barang-barang sia masuk kereta c rick. Kami sampai bank, kami terus pigi cari c miss wong. Lapas sia bagi ic sama sijil mati c roy, sia kana suruh duduk dulu, durang mau call di KL lagi. Mau juga 2 jam sia sama c rick menunggu bah.Siap saja tu urusan, sia kana bagi kad ATM bank, sia minta print 1 kali penyata bank dari yang start c roy buka tu acc atas nama kami dua. Te-bulat bah mata sia tingu tu penyata bank. Roy pigi buka tu akaun bank, lapas 1 minggu sia jadi girlfriend dia. Setiap bulan c roy kasi automatic masuk dalam tu akaun 5K.
Te-duduk saja sia bila nampak jumla tu duit dalam akaun. Managis lagi sia, c rick pun ta-kajut bah nampak tu penyata bank, rick pun tidak sangka c roy sanggup buat semua tu untuk sia saja. Bulat-bulat lagi tu sia nampak ada tu 10K c roy kasi bank in dalam tu akaun kami, duit yang sia bagi c roy untuk bikin bayar tu rumah yang sia bili sama kawan c roy kunun, tau-tau rumah c roy mah tu rumah yang durang mami sia tinggal sekarang.
Sia tidak pacaya butul, sa-lama sia couple sama c roy, puas bah c roy pujuk sia terima duit yang dia mau bagi sia bikin balanja, roy selalu mau bagi sia duit balanja tapi sia selalu tulak-tulak, sia ni bukan jenis mata duitan. Itu lah sia tidak perna ambil duit kalau c roy mau bagi sia, itu kali c roy dalam diam-diam pigi simpan duit untuk sia dalam akaun atas nama kami dua.
Sia tidak sudah balik salon. Rick bawa sia pigi lawat kadai c roy. Bulum perna lagi sia datang pigi kadai c roy sa-lama sia sama-sama c roy. Rick bawa sia pigi masuk dalam kadai yang ada jual barang-barang eksesori kereta. Semua staff dalam tu kadai senyum-senyum tingu sia sampai sia kana tegur lagi “welcome madem vanessa” te-bulat saja bah mata sia dingar durang cakap macam tu sama sia, rick senyum-senyum sambil pigang tangan sia.
YOU ARE READING
My Life Is Changed My Love Is Twins
RomanceMengisahkan tentang seorang sumandak yg bernama Vanessa atau V yg baru berusia 15 thn. V sumandak dari keluarga hidup sederhan yg hanya tinggal bersama ibunya ada 4 urang lagi adik-adiknya. V sumandak yang lasak dan aktif pada sukan dan tidak mi...