My Life Is Changed My Love Is Twins

Part 2

~ My Life Is Changed My Love Is Twins ~
By : Tescy Descy
Cerita Rekaan

    ~ Part 2 ~

    C jerry kan sepanjang di kk, ada bah kawan 1 karaja kami ni jahat butul tu mulut dia. Suka butul dia kasi kana-kana c jerry, selalu lagi tu c jerry kana buli-buli, c jerry kana ejik-ejik, bilang tu urang, c jerry layak kunun karaja sana kampung air jual pantat.

    Sia lagi ni pantang kalau kawan sia kana buat macam tu. Sikit lagi sia kasi malakat tu segala garfu di kapala tu lelaki banjingan bah, terus baranti karaja saja tu urang sia kasi makan dia modes sama kasi cium dia tu pantat periuk-periuk yang kana jual-jual sana. Kotoh siapa suruh mau butul kasi bangun sia punya naga kan.

    Palan-palan sia suruh c jerry berubah, kami pigi masuk gym bah. Mula-mula malu-malu kusing kunun kami, lama-lama mana lagi ada tu ka-maluan. Lama-lama c jerry mau kodou-kodou (karas-karas) sudah tu tulang benulang, makin mau tinggi sudah bukit gundul c jerry, tumbuh-tumbuh sudah gia tu masol-masol c jerry, mau tagap-tagap sudah bah badan c jerry.

    Sepanjang kami di kk, hampir setiap hari c jerry pigi deting sama basi-basi yang be-kilo-kilo sana gym, 3 bulan sudah c jerry keluar masuk pigi kasi tagap-tagap tu otot-otot dia kakah. C jerry pandai sudah pakai contact lens. Nahhh.. tidak hensom kah kamu bayangkan muka c jerry, c jerry mimang kiut sodia tambah lagi tu tagap tambah hensom tarus.

    Masa kami pigi ambil kepututsan spm, ramai kawan-kawan sekolah surang jatuh sinta sama c jerry, tapi c jerry buat macam biasa-biasa saja bah. Tidak juga c jerry mikrayou (minta puji) mau kasi tayang-tayang bukit gundul dia.

    Walaupun keputusan spm sia tidak juga semua sia dapat A tapi bagi sia cukup sudah bikin mami sia senyum sama happy. Keputusan yang sia dapat ABC juga bah. Inggeris sia buduh-buduh pun buli juga sia dapat C.

    Karana sia ni tidak minat mau balajar, mimang tiada hati sudah mau pigi sambung balajar, sia kasi tidur saja tu koputusan spm sia di dalam almari. Mami sia pun tidak juga paksa-paksa sia, tidak juga mami sia bantah keputusan yang sia mau pigi karaja saja.

    Sia karaja saja terus tampat karaja sia sama c jerry. Tinggal sia 1 urang lagi karaja sana. C jerry pigi sambung balajar, jerry kan pintar, ada cita-cita yang c jerry mau pigi kajar lagi, jerry dapat bantuan dari sekolah lagi untuk pigi sambung balajar. Mana lah bah c jerry mau kasi lapas tu peluang yang dia ada, cita-cita c jerry pun basar butul tu, dia mau jadi duktur bah.

    C jerry ni anak bongsu, dia ada 3 urang kakak, bapa c jerry sudah lama meninggal pasal jatuh masa buat rumah urang. Jadi c jerry tinggal sama mama dia sama 3 urang lagi kakak dia, kanapa tidak c jerry jadi lelaki lembut gia, keliling pingang bogia perempuan dalam hidup c jerry tu.

    Kakak-kakak c jerry semua tidak habis sekolah, pasal durang mau cari duit untuk kasi sekolah c jerry sama mau jaga mama durang yang terbaring lumpu 1 badan. Semua durang harap c jerry saja yang buli ubah nasib keluarga sama hidup durang.

    C jerry balajar butul-butul supaya dia buli jadi duktur, supaya c jerry buli rawat mama dia bila dia sudah berjaya. Kesian bah c jerry ni, kakak-kakak c jerry lah yang be-tungkus lumus cari duit pigi putung gata, jual sayur, jual kuie-kuie untuk kasi sekolah c jerry sama bikin bayar rawatan mama durang.

    Tu 4 urang bestie sia jangan tanya lah, durang tu hari-hari buat taik mata di rumah saja. Patang-patang atau masa sia cuti-cuti, durang pigi lah lepak-lepak di bilik sewa sia. Durang datang pigi tampat sia, tidak perna bawa tangan kusung, durang kasi bili-bili juga sia makan-makan macam baras, sayur-sayur, migi-migi dan macam-macam lagi lah.

    Kosian bah sia ni, pigi karaja gaji rm450 saja. Sanggup sia ikat perut se-lama di kk. Sewa bilik sia tu pun, bestie-bestie sia yang tulung bayar. Segala tilam, bantal, tampat masak nasi, kuali, tampat masak air sia pun durang lah juga yang kasi bili untuk sia.