My Life Is Changed My Love Is Twins

Part 7

~ My Life Is Changed My Love Is Twins ~
By : Tescy Descy
Cerita Rekaan

    ~ Part 7 ~

    Kami bediri-bediri lah tunggu di luar pintu. Rupanya lama sudah yang lain-lain ni tungu kami di luar bilik. Mana surang tau. Keluar-keluar saja c bia dari tu bilik, senyum-senyum sudah mulut c bia tingu sia, bikin heran. Tadi bukan main mau buruk sudah tu muka. Kalau bilang angau tidak juga, kalau bilang sot pun tidak juga, tiba-tiba c bia pigi cucuk-cucuk pinggang sia.
 
    “kanapa kau ni babe?.” (bekerut dahi sia tingu c bia)

    “akhirnya kau kala juga kan babe hahahahaha...” (c bia pigi bisik telinga sia)

    “buduhhhh…. Punya sampat lagi kau pigi mencubuk kah?.” (sia pigi cubit pungung c bia. Buli-buli lagi c bia sampat-sampat lagi pigi cubuk tu tilam kami, kurang asam butul, ka-dapatan sudah kami)

    “pandai-pandai kama.. jangan sampai tebunting sudah.” (bilang c bia, masi juga c bia bisik-bisik sambil senyum-senyum tingu sia, yang lain tingu kami sambil giling-giling kapala, durang ingat kali kami mengumpat)

    Lapas kami siap urus cek-out. Sebelum kami mau pigi lawat-lawat c lembu-lembu, kami pigi makan dulu. Urang makan tanga hari sudah, kami baru mau sarapan pagi. Itu lah, lain kali koloboi (lambat bangun) lagi, lumogop (moginum) lagi. Sa-panjang makan, sebelah tangan c roy dia kasi ampai di atas paha sia sambil c roy senyum-senyum tingu sia, heran sia ni urang tau. Lapas kami siap makan, kami bili-bili dulu makan ringan, baru kami masing-masing masuk kereta.

    Dalam kereta, sia sama c roy cerita-cerita, tidak c roy kasi lapas tangan sia, tiba-tiba masuk wechat, sia buka lah group wechat surang yang untuk ladies-ladies saja. Nahh.. tidak tau apa sudah c bia kasi tau tu bestie-bestie sia yang lain pasal apa yang dia nampak dalam bilik sia sama c roy. Ribut semua mau tanya dalam tu group.

    *** Wechat Chat Ladies-Ladies ***

    “babe… sadap kannn.” (bilang amber, punya buduh butul tu ayat bah. Ta-katawa terus sia baca)

    “huiiii… sia ingatkan tidak lah akan pandai mangala… kala juga kau akhirnya kan babe hahahahahaha...” (san-san)

    “nampaknya… sia lagi ni yang tinggal masi bulum kana kasi bucur hahahaha..” (crystal)

    “bagus kamu diam-diam.. ada yang sia kasi makan taik lembu sekarang ni.” (send)

    “hahahahaha…..” (semua send tulisan katawa saja)

    “babe.. basar kah c roy punya adik beradik?.” (bilang c amber, sakit bah perut sia katawa karaja ni urang, tu soalan juga yang paling power)

    “buduh.. buat apa toiiii.. kau mau tau.. tidak cukup kah kau nampak daling kau punya sendiri.” (send)

    “alahhhhh… mau tau juga bah.” (bilang c amber. yang lain hantar muka katawa saja)

    C roy gusuk-gusuk paha sia sambil dia driving, sibuk sia katawa-katawa baca wechat tu 4 urang. Banci butul sia kana ejik-ejik sudah. Lapas pigi cuci-cuci mata, kami pigi lagi sana poring. Mau ba-malam lagi kami di poring. Sa-panjang perjalanan sia tidur saja. Kesian daling sia tiada kana kasi kawan bercerita. Sampai di poring baru sia kana kasi bangun.

    “sayang.. bangun.. kita sampai sudah.” (roy puai-puai kapala sia mau kasi bangun sia)

    “astagaa bie.. tetidur pula honey tadi tu?.” (sia tingu c roy dengan muka serbah salah)

    “tidak apa bah sayang.. bah mari lah.. menunggu sudah ninik kebayan.” (roy kiss bibir sia)

    Katawa sia c roy panggil c bia ninik kebayan. Sekali sia tingu di dapan kereta, bediri-bediri c bia tulak pinggang tingu kami dari luar kereta. Sia senyum-senyum tingu c bia.