My Life Is Changed My Love Is Twins

Part 4

~ My Life Is Changed My Love Is Twins ~
By : Tescy Descy
Cerita Rekaan

    ~ Part 4 ~

    “eya lah.. sia mau kau jadi sumandak sia, buli bah kan.. biar lah sia yang jadi first love kau.” (bepikir sia sikijap)

    “tidak mau.”

    “kuyak lah sia ni free-free kana tulak.” (terus sodih bah muka c roy)

    “hahahaha.. buli kah sia minta masa roy?.”

    “kanapa pula V?? tidak kah hensom sia di mata kau.” (soalan maut butul c roy tanya sia)

    “bukan bah roy.. sia bulum lagi bah kasi bahagia mami sia. Itu lah sia bulum sedia lagi mau becinta. Sorry roy.”

    “sia tau V..  tapi walaupun kau jadi sumandak sia, kau masi bah buli tulung-tulung mami kau. Kan kau kerja sama adik sia, mana sia suruh juga kau berenti kerja pun.”

    “sekurang-sekurangnya kau bagi lah bah sia masa bah untuk balajar macam mana mau becinta.”

    “hahahaha… lucu bah kau ni V, macam mana juga kau mau balajar kalau tiada boyfriend kau hahahaha..”

    Buli-buli bah pula sia kana kasi katawa. Sia bagi alasan pun lucu bagi dia, sia tidak bagi dia jawapan, nanti kici hati pula, kalau sia tulak pula nanti dia cakap kuyak pula.

    “roy.. sia takut tidak dapat jadi perempuan yang buli mencintai kau bah.”

    “parcaya sama sia V.. sia tau, sebenarnya kau takut di lukai bah tu kan? Dari jawapan yang kau bagi pun buli bikin paning kapala sia sudah hehehe..” (c roy bangun dia pigi pigang dua-dua pipi sia ni)

    Macam mau butak sudah kapala sia ni, balik-balik sudah sia garu-garu, pada hal tidak pun gatal. Sia tidak tau mau bagi jawapan apa lagi bah, sia butul-butul bulum sedia mau becinta.

    “ahhhh…. Buli bagi sia masa untuk cuba kanal kau dulu kah roy?.”

    “V… sia butul-butul jatuh cinta sama kau dari yang kau baru masuk ni rumah tau. Sia tidak mau ada urang putung line sia lagi.”

    Aduiiiii…. Sakit kapala sia sama ni urang, semua jawapan sia, ada saja jawapan dia juga mau balas apa yang sia cakap. Baru juga barapa jam pun sia kanal sama jumpa dia, takan lah sia mau terima sudah dia. Macam susah mau pacaya bah muka c roy tiada sumandak. Muka yang playboy habis lagi tu sia nampak.

    “bah eya lah.” (jawapan ta-paksa sudah tu sia bagi c roy)

    “butul bah V… thanks V.” (bilang c roy sambil pigi kiss dahi sama bibir sia. Sia macam patung saja ba-karas, mau balas pun bukan sia pandai. Sia anguk-anguk kapala sambil senyum saja tingu c roy)

    Kami cerita-cerita lah lapas tu, c roy pigi baring balik di atas paha sia. Sia tidak sadar bila sia tertidur, bila sia ta-bangun saja, sia sudah ada dalam palukkan c roy, kami tetidur di sofa, c roy di balakang sia, dia paluk sia dari balakang, sia baring sudah di sofa, tidak tau macam mana sia buli tidur be-baring, sedangkan sia duduk saja pun tu sa-malam.

    Sia mau bangun tapi makin kuat pula c roy paluk sia. Mau picah sudah pundi kancing sia ta-lampau tahan tu kancing bah, sana juga sia kana paluk barabis sama c roy.

    “roy… sia mau ta-kacing sudah ni.. buli kah sia pigi kancing dulu baru kau paluk sia barabis”

    Barabis lagi c roy kasi katawa sia bah. Ini lelaki kan. Sia bediri lah mau pigi kancing sana dapur, c roy pun ikut juga sia bediri, sia ingat kanapa, c roy tarik tangan sia mau bawa masuk di bilik tidur dia bah pula, c roy suruh sia pigi kancing sana dalam bilik dia. Memandangkan mimang sia tidak buli tahan sudah, sia masuk saja dalam bilik c roy.