My Life Is Changed My Love Is Twins

Part 28

~ My Life Is Changed My Love Is Twins ~
By : Tescy Descy
Cerita Rekaan

    ~ Part 28 ~

    “pigi saja kau buka bah. Ada urang pigi tag kau gambar c chris. Chris accident babe.” (te-duduk saja sia bila dingar c bia cakap macam tu. Kalang kabut lagi sia pigi on laptop sia)

    “macam mana juga kau tau ni babe? Kau jangan main-main kama babe.”

    “sia nampak tadi bah babe. Sia bulum tidur lagi ni. Ngam-ngam daling sia bawa pigi pub, sia cek-cek lah fb kan, sia nampak kau ada kana tag gambar, sia pigi kunun cubuk-cubuk, ta-kajut sia nampak tu gambar babe.”

    “buduh juga tu urang tu sampai mau pigi tag sia babe.”

    “kau baca dulu tu komen-komen babe. Kau tingu dulu tu gambar. Macam semua kawan-kawan c chris kasi salah kau saja kama tu.”

    “buduh juga. Apa kunun salah sia sama c chrsi. Tiada kaitan langsung pun dalam hidup sia sama c chris pun.”

    “sudah kau buka kah?.”

    “eya baru saja bah sia mau masuk. Jap, jadi kau rasa sia mau buat apa lah kunun ni babe?.”

    “pandai-pandai lah kau babe. K lah bye.”

    Lapas c bia end call, sia cari lah tu gambar yang c bia cakap sia kan tag. Oh my god... butul-butul bah c chris. Siap tu tukang tag cakap sama sia “vanessa, please. Chris need u now. Chris perlukan kekuatan dari kau. Chris koma di hospital queen 2 sekarang.”. Punya ta-kajut sia baca tu caption.

    Sia baca lagi tu komen-komen, atuiiii..habis bah sia kana timbak-timbak, kana bom-bom bah, sampai ada yang cakap dalam tu komen “get lost bitchy!!.”. Macam-macam lagi ayat-ayat bikin panas telinga kalau sia baca. Terus garu kapala saja sia tingu tu komen-komen semua kasi salah sia. Sia pun tidak tau apa kaitan sia sama c chris.

    “aduiii.. mau pigi kah tidak ni ahh..” (sia cakap 1 urang sambil gigit kuku sudah)

    “pigi saja lah sayang.” (terus sia pusing tingu c rick, sia butul-butul lupa c rick ada sama-sama sia, te-bulat saja bah mata sia)

    “love.”

    “pigi saja k sayang.” (rick duduk pigi dakat sia, rick pigi puai-puai pipi sia sambil senyum tingu sia)

    “tapi love...” (bulum lagi sia kasi habis cakap sia, c rick simpan jari telunjuk di bibir sia)

    “shhhhh... love okey sayang. Love pacaya sayang cuma sayang love sama roy saja. Kita pigi tingu dia k sayang.”

    Aduiii...bukan ini pun sia mau. Sia tau hati c rick sebenarnya sakit. Tapi apa yang sia mau buat kalau c rick sendiri juga mau bawa pigi. Kami pigi lah be-siap baru kami jalan pigi tingu c chris sana queen 2. Sia diam-diam saja dalam kereta sepanjang dalam perjalanan.

    Kami sampai kaunter hospital, kami tanya mana wad c chris. Lapas kami kana kasi tau c chris di tingkat barapa sama bilik numbur barapa, sia sama c rick masuk dalam lif. Sampai dapan wad c chris, rick suruh sia saja masuk. Punya teruk ni lelaki bah. Tidak-tidak pun koma, tapi be-bungkus lah tangan c chris sama kaki dia.

    Macam sitapap (tampar) sudah sia sama gaya c chris ni. Sia pigi bediri dakat katil c chris. Sia tingu saja muka c chris, c chris sedang tidur sia nampak. Tiba-tiba masuk 1 perempuan tua-tua, terus-terus kama sia kana kasi cium sama tapak tangan di pipi sia, gila punya main sadap tu padas dia.

    Pettt...

    “aduiiii... punya sakit. Ninik lampir dari mana lagi ni. Datang-datang tidak pandai bagi salam, tiba-tiba pula pigi tompiling (tampar) muka sia ni apa masalah dia ni!!.” (sia cakap dalam hati saja kama tu)