My Life Is Changed My Love Is Twins

Part 18

~ My Life Is Changed My Love Is Twins ~
By : Tescy Descy
Cerita Rekaan

    ~ Part 18 ~

    Masuk saja dalam bilik, macam tidak pandai puas-puas c rick mau paluk-paluk badan sia. Balik-balik lagi tu mau cium-cium pipi sia tu. Sia pigi ambil tuala mau mandi, c rick pun mau juga bah ikut mandi sama-sama, bah sia kasi eya saja, c rick pigi isi tu tab mandi, dalam bilik c rick pun ada tab mandi macam di bilik c roy, tapi jarang-jarang c rick pigi ba-randam. Sudah c rick siap isi tu tab mandi, kami ba-randam lah sama-sama.

    “love.. nanti lapas bili cincin kita balik rumah mami buli?.”

    “kanapa tidak buli sayang. Cakap saja sayang mau pigi mana, love tatap kasi tunai.”

    “thanks love.”

    “you're welcome sayang. Sayang..”

    “emmm.”

    “kanapa sayang panggil love ni love.  Kanapa bukan panggil bie kah?.”

    “biar lah sayang panggil love tu love. Bie tu kan nama panggilan roy. Sayang tidak mau guna tu panggilan sama love.”

    “love okey saja bah sayang. Asal kan sayang suka sama tu panggilan.”

    “biar lah sayang guna panggilan yang lain dari panggilan macam c roy k love.”

    “okey sweet heart.” (rick paluk perut sia sambil rick kiss-kiss balakang bahu sia)

    Siap kami mandi tu, mau juga 1 jam lama kama kami ba-randam. Lapas kami besiap, c bia lama sudah tunggu kami di bawa. Marah-marah sudah c mak lampir pasal ka-lamaan menunggu gia. Rick guna kereta c roy yang ninja king. Tidak muat gia kalau guna tu kereta sport Ferrari c rick kalau c bia naik kami. Lagi pun ada lagi mau di bili-bili nanti. Jadi kami pakai saja kereta yang basar, banyak buli muat barang.

    Kami pigi spa dulu. Di CP juga kami pigi. C bia pun mau juga kunun mandi bunga bah. C rick duduk-duduk saja menunggu sia sama c bia siap. Lapas siap mandi bunga, sudah siap buat spa semua, kami pigi makan. Happy tidak terkata sia dapat makan-makan sudah.

    Lapas kami makan, kami jalan pigi bili cincin kahwin. Rambang mata kama c bia nampak, semua dia suruh sia pilih, punya main sot kan tu anak. Ada sia nampak yang cumil tapi c rick cakap ta-lampau nipis, c rick mau yang ada tabal-tabal sama basar sikit kunun, supaya nampak di jari sia tu cincin.

    Sia ikut saja pilihan c rick. Siap c rick minta ukir nama lagi dalam tu cincin. Semantara tunggu tu cincin kana ukir nama, c rick suruh saya pilih-pilih mana rantai leher yang sia suka. Doii.. sia tidak bah minat sama barang kemas sa-gala ni, tapi c rick mau juga kasi bili sia.

    C rick yang kasi pilih sia tu rantai, pasal sia balik-balik gia tidak mau. Rick ambil yang ada buah dia bentuk hati, sia suka tingu, ada huruf V tu buah rantai. C rick ambil tu rantai, Rick terus kasi pakai sia tu rantai. Pada hal sia masi pakai lagi tu rantai yang c roy bagi sia. Akhirnya sia terpaksa buka juga rantai yang c roy bagi sia dulu. Bukan sia mau mungkir janji sia sama c roy tapi demi kebaikan bah juga kan.

    Lapas kami siap urus cincin kahwin, kami mau pigi lagi cuba balik tu baju kahwin, takut tidak muat, bah nampak sudah perut sia walaupun bulum basar sangat lah, masuk 4 bulan sudah gia. Sampai saja kami di butik tampat kami minta buat baju tu, c rick pun 1 kali pigi cuba juga baju dia, c bia pun ada minta jahit baju juga dalam tu butik, c bia pun pigi cuba juga baju dia.

    Sia pigi pakai tu baju, punya main lawa tu baju, suka sia tingu, ngam-ngam saja tu baju di badan sia, di bahagian perut sia tidak sia rasa sempit atau pun lungar, selesa butul sia pakai. Putungan tu baju yang sia minta bikin mermaid style tapi bukan lah yang sampit butul, cuma ikut bentuk badan sia saja.