My Life Is Changed My Love Is Twins

Part 6

~ My Life Is Changed My Love Is Twins ~
By : Tescy Descy
Cerita Rekaan

    ~ Part 6 ~ (AWAS 🔞🔞🔞🔞🔞!!!!)

    Siap urus diri, terus sia terjun saja pigi katil. C roy sana balkoni pigi ba-kanyang-kanyang dulu sama asap dia sambil main game, sibuk juga bah c roy mau tidur tampat sia, last-last mana sia ta-layan juga c roy bila sampai rumah.

    Pagi ni pun c roy tidak suruh sia bawa kereta. Sampai salon sibuk lagi kami, lagi sibuk dari kamarin. Tapi hari ni c roy kasi tunjuk bakat dia sama kami. Sia tidak sangka-sangka bah c roy ni pandai gunting rambut, rambut lelaki saja lah yang c roy mau urus, rambut perempuan dia tidak mau kunun.

    Asal ada costumer lelaki, c roy tidak mau sia yang pigi urus. Biar lah tidak cukup tangan, sanggup lagi dia pigi ganti c erra gunting rambut, baru c roy suruh c erra yang layan tu lelaki-lelaki, pada hal mau cuci rambut saja tu urang pun. Cemburu sudah c gaman kama.

    ****************************************** 
              *** 5 Bulan Kemudian ***

    5 bulan sudah sia sama-sama c roy, mimang sa-lama sia sama-sama c roy, sia makin happy, sia rasa salamat saja sama c roy, roy jaga butul sia, roy pigi mana-mana, roy bawa saja sia, c roy mau juga kasi tingu sia apa dia buat di luar kunun baru kunun sia tidak pikir yang lain-lain.

    Roy tinggal sama sia sudah. Dari yang mula-mula c roy datang pigi rumah sia tu lagi, tidak buli kunun c roy mau bepisah sama sia biar 1 malam pun kunun kah boh. Tapi kami tiada lah buat yang gitu-gitu bilang c erra.

    Hari ni sia cuti, baru sia ada masa mau bawa c roy pigi kasi jumpa mami sia sama adik-adik sia, mau butul c roy kana bawa pigi kasi jumpa keluarga ka-sayangan sia kan, jadi sia bawa lah. Sebenarnya sia malu bah mau bawa c roy pigi rumah buruk keluarga sia. Tapi c roy balik-balik kasi yakin hati sia yang dia tidak kisa semua tu yang penting kunun keluarga sia tau yang dia tu tanak wagu sia.

    Kami sampai-sampai saja di rumah, be-keluaran lagi adik-adik sia nampak ada kereta sport Ferrari tiba-tiba datang pigi rumah. C roy genggam tangan sia sambil roy senyum tingu sia. Keluar-keluar saja kami dari kereta, macam yang ba-tahun-tahun sudah durang adik-adik sia tidak jumpa sia bah, semua lumpat-lumpat lagi pigi paluk sia, senyum saja c roy tingu gelagat adik-adik sia sambil c roy ba-sandar di luar kereta dia.

    Sia kasi kanal lah mami sia sama adik-adik sia siapa c roy, senyum saja mami sia, happy mami sia sama adik-adik sia yang sia sudah buka hati mau bosinta kan. Mami sia cakap yang penting sia bahagia sia gembira dia pun akan ikut rasa bahagia.

    Kami tidak tidur di tampat mami sia, lapas kami makan tanga hari tu sia sama c roy jalan, bulum puas lagi dah adik-adik sia mau kasi lapas rindu sama sia, tapi c roy cakap dia mau bawa sia pigi kundasang, dia sudah simpan niat mau bawa sia pigi jalan-jalan sana kundasang kunun. Jadi sia sama c roy jalan lah pigi kundasang, kami singga-singga lagi sana pakan tamparuli pigi bili-bili makan sikit baru sambung lagi perjalanan.

    Kami sampai di kundasang jam 2 lebih patang sudah. Yang sia tidak tau-tau kan, ada bah pula bestie-bestie sia join sama-sama pigi be-cuti-cuti kunun. Lama sudah durang c bia tunggu kami, tanak-tanak wagu durang pun ada sekali, kali ni c jerry pun ada. Nahh... ba-pasangan lah kami semua.

    Durang c amber sudah urus hotel untuk sia sama roy awal-awal, kami sampai-sampai saja, kami pigi makan dulu, sampai jam 4 lebih patang bah kami buat bising di kadai makan, suara kami saja yang paling bising, baru tu lalat malakat sana lampu-lampu yang bikin parangkap tu lalat pun mau gila sudah durang c bia katawa, sot butul gaya durang.

    Sebelum mau pigi bilik masing-masing, kami pigi bili-bili dulu makanan untuk bikin puas kunun sikarang. Malam ni kami mau moginum ramai-ramai. Lapas bestie-bestie sia sama tanak-tanak wagu durang pigi urus diri, durang pigi bilik sia sama c roy, ngam-ngam sia pun baru siap mandi, c roy masi lagi mandi.