My Life Is Changed My Love Is Twins

Part 19

~ My Life Is Changed My Love Is Twins ~
By : Tescy Descy
Cerita Rekaan

    ~ Part 19 ~

    Senyum-senyum sia tingu tu bilik. Sia pigi ambil tuala dalam almari, baru sia mau masuk pigi tampat mandi, c rick masuk dalam bilik, punya ta-kajut sia tingu gaya c rick yang macam baru kana kajar hantu saja ni.

    “kanapa love ni macam kana kajar mak lampir saja?.”

    “hehehehehe... tunggu love bah sayang. Sama-sama kita mandi.”

    “eee... karang lah bah love. Sayang dulu mandi.” (baru dah sia mau tutup tu pintu tampat mandi, c rick terus-terus saja masuk dalam tu tampat mandi)

    “eeee... love ni kan.” (sia buat muka ma-rajuk macam muka itik, kana kiss nogi bibir sia)

    “love mau mandi sama sayang bah.”

    “bah eya lah. Bukan mau kacau ahh..”

    “okey sayang.” (senyum-senyum kunun c rick tingu sia)

    Sia masi malu-malu kusing lagi bah mau mandi sama-sama c rick ni yang sa-banarnya. Tapi ni urang mau juga sibuk kacau. Lapas siap saja kami dua mandi. Kami turun bawa pigi makan, mami sia sudah masak awal-awal. Mimang mami sia ni suka masak awal-awal. Masa kami turun tu, c betty sama c rico pun baru turun, durang dua pun baru siap mandi.

    “bila durang c calvin balik?.” (sia tanya c rico)

    “hari 3 kak.”

    “ohh.. jam barapa durang sampai kk?.”

    “awal tu. Dalam jam 11 pagi.”

    “ohhh.. bah bagus lah tu.”

    Terus diam-diam sudah kami makan. Macam ada malaikat limpas saja. Tu piring sama sudu saja yang bebunyi. Siap makan, sia sama c rick duduk pigi tingu tv di ruang tamu dulu. Mami sia, c rico sama c betty tingu saja sia sama c rick.

    Heran bah kali durang nampak sia pigi baring-baring di dada c rick sambil duduk juga. Tapi senyum-senyum mami sia tingu kami. Bah mula sudah gia sia mau manja-manja sama c rick. Mana sia pa-duli durang mami sia heran tingu kami.

    Jam 11 malam, baru sia sama c rick naik pigi bilik. Sampai bilik, terus sia pigi terjun atas katil, sia tukar tampat tidur sudah. Sekarang sia tidur tampat selalu c roy tidur dulu. C rick tidur di bahagian tampat sia tidur dulu.

    Baru c rick baring di katil, terus sia kasi ampai saja kapala sia di atas dada c rick. Tidak sudah sia tidur membalakang. Sia tidur berbantalkan dada c rick lah sampai pagi. C rick pun mana kisa, suka lagi c rick. Kuat lagi tu c rick paluk badan sia.

************************************

    Masuk hari kahmis tu, kami mula sudah sibuk. Kanopi pun sudah kana pasang yang di halaman rumah lah, baru 4 biji kanopi kana pasang. Di sana luar jalan raya, patang hari 4 baru kana pasang. Nasib baik lah rumah kami ni numbur 3 hujung sudah, tidak juga yang tinggal di hujung tu susah mau balik rumah kalau kana tutup tu jalan raya hari 6.

    Baju kahwin pun sudah kana hantar pigi rumah, gambar kahwin pun sudah kazen c rick hantar juga pigi rumah. Kek kahwin mami c rick yang tulung urus. Sia punya pangapit c jerry sama c crystal. Adik-adik sia malu kunun, punya sot-sot tu utak k, tidak tau apa yang durang mau malu.

    C Amber & boyfriend, San-san & boyfriend, Bia & boyfriend, adik lelaki c amber & Betty, Cavin & mimi (staff salon), rico & jen (staff salon), Gina & Bibing, erra & boyfriend (laki c erra kunun), durang semua ni jadi pengiring pengantin.