My Life Is Changed My Love Is Twins

Part 1

~ My Life Is Changed My Love Is Twins ~
By : Tescy Descy
Cerita Rekaan

    ~ Part 1 ~

    Nama sia Vanessa, kawan-kawan panggil sia V saja. Sekarang sia masi di tingkatan 3. Muka sia tidak lah secantik macam c unduk ngadau pun, sedap mata memandang nopo (saja) urang bilang. Badan sia tinggi 156cm saja. Barat badan 43kg. Sia ni berbadan kici-kici cili padi saja, kalau bab badan seksi tu sia tidak juga mau tombirang (ba-lagak) bah, sia mempunyi badan yang montok-montok semula jadi dan bentuk badan yang lawa buli tahan juga.

    Sia seorang yang sangat perama dan selalu kelihatan ceria (tapi di luaran saja lah). Sia bukan lah pelajar hot di sekolah tapi sia ramai kawan-kawan dan sia seorang yang sangat aktif dalam sukan sekolah. Kebanyakan kawan-kawan sia ni anak-anak urang yang hidup mewah dan urang sinang lenang. Kawan-kawan sia tidak perna anggap sia ni urang yang tiada nilai dalam persahabatan durang.

    Sia ni bukan lah budak yang membesar di kampung, dan sia membesar pun bukan lah di tanga-tanga pusat bandar yang sibuk, tapi sia di kirakan membesar di kawasan yang dakat sama kawasan bandar. Hidup sia tidak lah se-mewah macam kawan-kawan sia dan sia tidak lah bilang hidup ta-lampau miskin, sia hidup penuh dengan kesedarhaan saja. Urang bilang cukup-cukup makan nopo.

    Sia bukan lah sumandak pintar, mau sipiking macam urang putih tu sia tidak lah pro butul bah, cukup sa-kadar sia paham bila kana umpat-umpat itu sudah cukup bagi sia.

    Sia ni anak sulung dari 5 urang adik beradik. Sia ada 3 urang adik lelaki, CALVIN (13 tahun), RICO (11 tahun), CAVIN (10 tahun) dan adik bongsu sia c BETTY (7 tahun). Kami 5 urang adik beradik hanya membesar sama mami kami saja, sajak dady kami meninggal sebab barah otak.

    Dulu dady sia seorang buruh kasar saja, sajak dady dan mami sia berkahwin. Dady sia keluar dan tinggalkan keluarga sebab keluarga dady sia tidak dapat terima ke-hadiran mami sia. Mami sia ni hanya lah seorang sumandak kampung yang miskin dan di buang sodarah mara masa mami sia kehilangan kedua orang tua.

    Dady sia asalnya dari keluarga yang kaya raya dan ke-namaan. Dady sia anak ke-2 dari 3 urang adik beradik. Di sebabkan dady sia jatuh cinta sama mami sia, dady sia beniat mau jadikan mami sia seorang suri hidup dia, tapi keluarga dady sia sanggat-sanggat membantah keputusan dady sia dan sabab itu lah dady sia ambil keputusan untuk tingalkan rumah dan keluarga.

    Segala duit simpanan dady sia, kereta, rumah kana kasi beku sama beliau dady sia sendiri. Dady sia ambil keputusan untuk berkerja sebagai buruh kasar hanya untuk mencari duit dan sesuap nasi buat mami sia. Mami sia pun tulung-tulung jaga dady sia mau kasi ringan hidup, mami sia karaja juga di kilang kayu sementara mami sia masi buli kerja.

     Lapas mami sia sama dady sia sudah kahwin dalam setahun kemudian tu, mami sia di sahkan mangandung, dady sia terus berkerja karas, sampaikan dady sia jadi ke-sayangan bos. Dady sia kana kasi naik pangkat dari buruh kasar pigi mandur, kehidupan mami sia dan dady sia palan-palan jadi setabil.

    Dady sia suruh mami sia berenti kerja, dady sia buat lah sulap-sulap kici di dapan rumah sewa untuk mami sia bejual-jual sayur-sayur dan makanan ringan. Kehidupan mami sia sama dady sia makin lama makin sinang, duit simpanan pun ada sudah sikit-sikit, sampai lah dady sia jatuh sakit masa tu adik bongsu sia baru masuk 2 tahun.

    Masa tu sia baru di tahun 5. Sia ingat lagi, dady kami sampat lagi sambut x-mas sama-sama kami walaupun masa tu dia sudah terbaring yang sanggat-sanggat tenat di atas katil. Pada pagi 26 december dady sia telah pergi tingalkan kami. 1 urang pun keluarga dady sia tiada yang datang pigi tingu dady sia yang sudah terbaring kaku di dalam tu karanda.

    Di saat itu juga, sia menjadi seorang kanak-kanak yang pendiam dan suka berkurung dalam rumah. Sia seorang anak yang sanggat manja sama mendiang dady sia. Sia rasa butul kehilangan dady sia masa tu.