My Life Is Changed My Love Is Twins

Part 3

~ My Life Is Changed My Love Is Twins ~
By : Tescy Descy
Cerita Rekaan

    ~ Part 3 ~

    “butul kah apa yang abang rico cakap tu?? Jangan macam-macam adik.. kakak sudah cakap awal-awalkan.. jangan becinta! jangan pandai-pandai mau gatal tu hati pigi layan-layan lelaki kalau masi sekolah!! Kasi habis dulu tu sekolah. Kajar dulu tu cita-cita. Bukan mau ingat becinta! lelaki mana pandai habis juga tu kalau adik kajar dulu cita-cita baru mau becinta.”

    Nahhh kakak naga kalau sudah ma-radang panjang lebar tu carama, buli sampai bulan juga, tu telinga pun kompom bekilat bersih kama.

    “mana ada adik becinta kak, adik kawan-kawan saja sama c boy bah kak.” (menjawab c betty)

    “sayang.. ba-kawan tidak salah. Tapi kalau buli jangan lah dulu, ramai lagi kan kawan perempuan adik kalau adik mau cari kawan. Ingat pesan kakak adik, kakak tidak marah kalau adik-adik kakak mau becinta, tapi kalau buli biarlah adik-adik kakak sudah ada cita-cita, sudah buli kasi bangga dulu kakak sama mami. Jangan jadi macam kakak dik, kakak ni tiada cita-cita untuk kasi bangga mami, sekurang-kurangnya kakak masi buli jaga diri kakak, masi buli tulung-tulung mami, masi buli kasi sekolah kamu. Sampai sekarang pun kakak bulum kanal apa itu erti cinta, bulum perna lagi kakak becinta, kanapa adik kakak yang 1 urang ni mau kasi lemah tu hati. Abang-abang pun sibuk kajar cita-cita untuk kasi bangga kakak sama mami.” (sia tahan-tahan lagi mau nagis)

    “sorry kak. Adik janji adik tidak sudah jumpa c boy, adik janji adik tidak mau buat kakak marah sama kasi sedih kakak.” (bilang ni adik bungsu sia)

    “sayang… ingat.. biar pun kakak di kk, kakak rindu sama kamu di sana, kakak kerja pun, kakak cuba sudah kumpul-kumpul duit untuk bili rumah baru kita. Kakak buat semua untuk adik-adik kakak untuk mami juga, kakak mau kamu bejaya supaya 1 hari nanti mami akan hidup sinang sama mami bangga pasal mami buli kasi basar kita 5 urang adik beradik tanpa dady tanpa keluarga dady tanpa keluarga mami. Kakak tidak kasi salah dady, itu sudah jalan dady yang tuhan bagi. Tapi sekurang-kurangnya kita ada kunci untuk buktikan sama keluarga dady, keluarga mami yang buat hidup kita macam ni. Ingat sayang.. kakak sayang adik-adik kakak macam mana kakak sayang jantung kakak.” (panjang lebar kama kalau kakak naga sudah mula mau cuci telinga)

    “eya kak. Adik minta maaf kak.”

    “eya sayang.. kakak kasi maaf.. tapi janji sama kakak, kasi kuat tu hati, kasi masuk dalam utak apa yang kakak cakap. Kajar dulu cita-cita baru barabis kajar tu niat mau becinta. Kan adik kakak ni mau jadi doctor, kana lah bah kajar dulu tu cita-cita, bukan sa-kadar cakap kusung saja. Sekarang ni kakak masi berhak mau atur hidup adik-adik kakak, so kakak tidak mau adik-adik kakak pijak kapala kakak. Paham kah.”

    “Eya kak.” (itu saja yang c betty buli jawab. Tapi sia dingar juga di hujung talian yang dia sedang tahan nagis dia)

    “sudah lah.. pigi rehat.. jam barapa sudah ni, bisuk mau pigi tulung-tulung mami lagi kan. Balajar rajin-rajin sayang. Kalau ada apa-apa call saja kakak k, minta saja sama kakak kalau ada mau apa-apa, selagi kakak mampu, kakak kasi tunai juga permintaan adik-adik kakak ni.”

    “eya kak.”

    “bye sayang.”

    “bye kak.. love u.”

    “love u too sayang.”

    Lapas sia end call tu, sia masi lagi bediri-bediri di luar rumah c bia. Sia kasi keluar habis dulu air mata yang sia tahan-tahan tadi lagi. Walaupun urang nampak sia ni sumandak yang kuat, air mata sia tidak buli buang dalam hidup sia. Sia managis lapas siap becall sama adik sia bukan pasal apa. Cuma sia rindu dady sia. Dulu dady sia selalu kasi nasihat sia macam tu gia, tidak buli becinta kalau bulum kerja cita-cita bilang dady sia.