My Life Is Changed My Love Is Twins

Part 15

~ My Life Is Changed My Love Is Twins ~
By : Tescy Descy
Cerita Rekaan

    ~ Part 15 ~

    Sia managis dingar tu cerita, semua sebab c nadia pula. Tapi sia puas hati yang c nadia akan tanggung penderitaan dia seumur hidup daripada dia ikut mati sama-sama c roy. C rick gusuk-gusuk saja balakang sia. Punya main sakit jantung sia dingar cerita c bob.

    “kereta siapa c roy pakai pigi jumpa kamu bob?.” (sia tanya lagi c bob)

    “kereta mami sayang” (c rick yang jawab soalan sia)

    “patut lah sia tidak sadap hati saja yang tinggal 3 hari lagi kami mau tunang tu, subuh tu pun sia mimpi buruk lagi pasal c roy. Rupanya mimang butul yang roy akan jalan jauh.” (sia kasi tau c rick sama kawan-kawan c roy. Tunduk saja semua kawan-kawan c roy, sedih bah durang sebab kehilangan kawan yang paling jajal)

    Sia suruh c bia call mami sia, sia punya hp di bilik gia, malas sudah sia mau naik pigi ambil. Masa durang mami sia sampai-sampai saja tu, te-pigsan bah mami sia nampak c roy, adik-adik sia pun managis-managis lagi di dapan karanda c roy. Adik-adik sia rapat bah sama c roy itu lah durang sendiri pun tidak tau berita pasal c roy.

    Sia tingu saja adik-adik sia dari sofa, tidak kuat kaki sia mau pigi dakat tu karanda lagi. C rick sama c calvin yang pigi angkat mami sia mau bawa pigi tidur sana atas di bilik te-tamu. Adik-adik sia nagis-nagis lagi datang pigi dakat sia. Sia punya air mata, sia tahan-tahan saja mau jatuh, tapi susah butul lah mau kasi tapuk. Durang adik-adik sia pigi paluk-paluk lagi sia, c betty sia suruh naik atas pigi kasi kawan mami sia.

    “kak.. kanapa abang roy kak?.” (cavin)

    “abang roy ka-malangan vin.”

    “patut lah bukan abang rick yang datang masa tu tunang kamu kak.” (rico)

    “eya bah kak.. kami baru tau ni kak.” (cavin)

    “kasi doa saja abang roy sayang.. dia pun tidak mau juga semua ni terjadi, tapi sudah tertulis sampai cni saja dia di muka bumi.” (sia kasi kuat saja hati mau cakap macam tu. Sia cuba suruh adik-adik sia kasi kuat tu hati, tapi hati sia sendiri pun down juga)

    Rick datang pigi dakat sia, dia bawa susu untuk sia, adik-adik sia tingu saja sia minum susu. Durang tau yang sia ni tidak suka minum susu bah, susu kacang pun sia tidak suka, asal perisa susu sia tidak suka, bau sia tehidu, masa mangandung tiada sia rasa semua tu.

    Tidak lama sia tetidur di dada c rick sambil duduk saja, mami sia pun sudah bangun, patang-patang sudah bah tu, urang pun makin ramai yang datang, sia rasa macam sia panat butul, sia tidur saja di dada c rick. Sia mimpi c roy.

    Dalam mimpi sia, c roy senyum saja tingu sia, dia pigang pipi sia, dia cakap sama sia “sayang terima kasi sebab izinkan bie jalan” terus dia pigi pigang perut sia, dia pigi cium perut sia. Sia managis tingu c roy buat sia macam tu, lapas tu c roy jalan, palan-palan dia hilang.

    Sekali sia ta-bangun 1 kali lagi sia rasa pipi sia kana pigang tangan yang sajuk, ta-kajut sia, sekali sia bangun sia dalam bilik c rick sudah, c rick tidur sudah di sebelah sia, sia tingu tu jam di mija, jam 3 subuh sudah. Sia rasa macam ada air mata di pipi sia, sia managis pula butul-butul tu.

    Sia angkat tangan c rick di perut sia, sia palan-palan bangun, sia keluar dari bilik c rick, sia tingu di bawa masi ramai lagi urang bangun, sia jalan pigi masuk bilik c roy, sia buka-buka saja tu pintu bilik, punya wangi. Wangi minyak wangi c roy bah. Sia pigi pasang lampu, tiada juga siapa-siapa dalam tu bilik.

    Sia ambil tuala mau pigi mandi. Masa sia mandi, sia rasa macam ada yang tingu-tingu sia, sia cari-cari tiada juga siapa-siapa dalam tu tampat mandi. Siap sia mandi, sia pigi cari baju, ta-jatuh baju kemaja lengan panjang c roy, saya pungut tu baju, saya hidu tu baju, macam sudah kana pakai saja tu baju, tapi heran sia kanapa tu baju kana sangkut juga dalam tu almari.