طريقي نحو النار
البارت الثاني ...
ليلان حكمت....
استمرت القطيعه بينا وبيت عمي وحيد سنتين
لا همه يجون ولا احنه نروح ولا سلام ولا كلام
ومرات من اسمع صوت مقداد اتمنى اروح اسلم عليه
من فوك السطح ....ونسولف شويه لان اني مرات اشتاقله
وكلبي يرفرف عليه بس المشكله كلبي ماراضي عليه
لان ما دافعلي كدام امه ....
وميصير احجي وياه والاهل متخاصمين ...
بس مره اني فوك افرش سمعته يصيحلي
درت وجهي وردت انزل ...
سمعته يحلفني بمعزة ابويه ما انزل وابقى ...
ما انكر شكد جنت متلهفه بس مع ذلك ضبطت اعصابي وتحملت على روحي ...
رحت وباوعت عليه ...سلم عليه ...
=شلونج حبيبتي ...
=زينه
=هيج ادكوليها من وره خشمج ...
=لعد شلون اكولها ...
=ادكولين هلو حبيبي شلونك مشتاقتلك ...هيج شي تحجينه مثل الاوادم ...
=شلونك انت بالله عيدها لان اذاناتي مسدوده وما سمعتها زين ..
=هاي شبيج عصبيه هااا ...لج انتي ما مشتاقتلي ..
=جريت ايدي وخرتها عنه لا مشتاقه ولا صخام ....
=شبيج زهوره والله ميت عليج شو متغيره ....
=شنو حضرتك متدري لو تحب اذكرك امك شسوت بيه ..
=ياعيني ياعمري تدرين بيها شويه عصبيه وتحب كولشي بنظام ....
=ليش عيني لازم تخلخل نظام بيتكم بسببي ..انت حتى ما اعتذرت ...هاي بعدنا لا متزوجين ولا ابد وهيج لاتحل
ولا تربط اذا تزوجنا شلون ...
=وداعتج انتي بس صيري بحظني وكولشي يهون لعيونج..
=اكلني بالسانك وعيشني الحب والغرام ...
=وهو الحب يلوك المن اذا مو الج ...
=لو تحبني مو سنتين لاتجي ولا تسال ولا تسلم ولا حتى رساله ...واحنه الحايط ع الحايط لو بغير محافظه شسويت بيه ...
=حبيبتي زهرة عمري تدرين اني ما اريد اسوي مشاكل ويه امي لان هي عصبيه وما اعرف ليش دائما تحجي عليج
ومتريدج ...
=اسألها ليش تكرهني...ليلان حكمت ...مقداد احنه بدون زواج امك تكرهني اذا تزوجنا شلون شيصير بيه ....
=كولشي واله حل لتخافين خلي نزوج واني اسوي المستحيل علمودج...
اوووف بقيت ساعه اسولف وياه واضحك ونتشاقه
ويوم بعد يوم بقيت التقي بي ع السطح ومرات من يصعدون اهلي ينامون اسمعه يصيح على اخته سعاد
نامي زين وتغطي زين خصوصا الفجر تره بارده عليج ...
رجليج مكشفه كدامنا ....
اني ضحكت وعرفت هو يراقب من الحايط الفجر
ويباوع علينا واحنه نايمين ....
بقيت كل يوم اسولف وياه بعلم امي وابويه لان كلتلهم
هو اجه وسلم عليه واعتذر عن تصرفات امه ...
اهلي فقره وميحقدون ما اعترضوا على علاقتي اني
ومقداد ....
ابويه كل همه مايخسر اخوه لان متعلق بي وابويه الكبير
ويحب اهله يحس نفسه ابوهم ....
اجه شهر الخير والبركه شهر رمضان ابويه بلغ امي
يروح لبيت عمي حتى يكسر القطيعه ويتصالح هو واخوه
وحتى يتفقون على زواجنا اني ومقداد... ....
امي ما اعترضت ولا ناقشت وكلتله الي بي صالح سوي
كللها اول يوم العيد سوي غده ونعزمهم ونعزم رجاء وياهم
امي جاوبته صار تدلل من عيوني ...
صار العيد وعزمنا بيت عمي واني لبست نفنوف يخبل
بالعيد خيطته امي الي مفصل على جسمي ...
وسويت تسريحة الفيونكه جعدت كل شعري وخليت مكياج
وعطر ولبست كلاده خناكي على كد ركبتي وبيها خرزه زركه ..
كملنا الغده واجو بيت عمي وعمتي رحبنا بيهم اني وامي
بنات عمي من شافن نفنوفي تخبلن وتعجبن بشكلي وجمالي
وعطري (ليلان حكمت )...بس مرت عمي الله لا يوفقها سممتني بحجيها
شعندج لابسه خرزه زركه قابل نحسدج لو قحط بنات
عمتي ضحكت بصوت عالي ابويه صاح بيها رجاء ولا نفس
هي سكتت خلينا الغده وتجمعنا كلنا واني كعدت يم مقداد
جان يكول صايره حلوه كل هذا الجمال الي شوكت يصير بحضني ....
اني ضحكت ..عمتي انتبهت صاحت ضحكونه وياكم ...
مقداد كللها ماكو شي ...
كملنا غدانه ابويه اخذ عمي وراح للغرفه الثانيه كعدوا بيها
وسدوا الباب عليهم ...
واحنه الشباب كعدنا بوحدنا وامي وعمتي ومرت عمي كعدن يسولفن ...وبشربن جاي ....
فجاه طلعوا ابويه وعمي ....يضحكون وصاحوا علينا كلنا
جمعونا بغرفه وحده ...
عمي ...كال ...من رخصة ابو رضا اني راح اسولف بمكانه ..
صاح عليه وعلى مقداد ...
كعدنه كباله اجتي امي قدمت جاي للكل كللها اكعدي ام رضا ...
=انتم كلكم تدرون من الزغر مقداد وازهار مخطوبين لبعظهم
وهمه واحد يحب الثاني واني وابو رضا حددنا موعد زواجهم
بعيد الاضحى المبارك ان شاء الله ...
مرت عمي شركت بالجاي وفتحت عيونها على كبرهم
وامي هلهلت وبنات عمي واخواني خبصونه بالهلاهل والضحك اني من الخجل ركضت للغرفه ختلت
ضحكوا عليه ...بس كنت طايره من الفرحه ..
من الخجل ما طلعت من غرفتي لحد العصر من صاحني ابويه اسويله جاي ...
كنت مستحيه حيل كدام ابويه سويتله الجاي
وقدمته كدامه واني مدنكه ....
ردت اروح صاح تعاي بابا اريد اسولف وياج ...
=شوفي بابا انتي بعد تلث شهور راح ترحين لبيت عمج
تزوجين يعني لحياة تختلف وطبع يختلف اريدج تصيرين
بت حموله وتبيضين وجهي ..
=اني بخجل ووجهي احمر وصوت خجلان كوتله صار بابا
=اريدج شتسمعين شتشوفين ميطلع بره بيتهم
اي مشكله اي عركه تبقى بيتهم ..هاي اسرار وعيب تطلع
ولا من اخلاقنا وتربيتنا نطلعها ...
=لا بابا الله يكص الساني اذا اطلع كلمه...
=عفيه بنتي وان شاء الله منقصر وياج اني وامج ...
صاح على امي وكللها شتحتاج ازهار لا تقصرين وياها
اريدها احلى وحده واريد عرسها الناس كلها تسولف بي
امي كلتله من هاي العين وهاي العين تدلل ازهار وابوها ...
ثاني يوم امي كالت خلي نظف البيت ونطبخ الغده والعشى سوه من وقت لان العصر نطلع للكاظميه ...ومناك نزور
وناخذلنا فره بالسوك ..
كملنا شغلنا وطبخنا وتغدينا سبحنا وطلعنا الساعه بالاربعه
رحنا ع السوك امي اشترت اقمشه وخاوليات ومرينا ع الصايغ اشترت ذهب وبعدها اشترت جراجف ومكياج
واحذيه وملابس داخليه وعطور وملابس نوم ...
ورجعنا ع البيت ....سالت امي لمنو ذني الغراض
كلتلي الج ذني ..
كلتلها شسوي بيهن كلهن هواي ذني ....
كالت ميخالف منريد مرت عمج تضحك عليج بمكان الجنطه احملج عشره ....والاسبوع الجاي اشتريلج قاط فراش
وزوالي وتلفزيون زغير ....وغيرها من الاحتياجات
لازم اطلعين كامله مكمله من بيت ابوج ....
الى الجزء الثالث ....ليلان حكمت ...
