طريقي نحو النار ....
البارت السابع والعشرون والاخير ....
ليلان حكمت ....
قحطان ما اعرف شنو غايته لكن احساس بالخوف
سيطر عليه خصوصا بعد ما طلع البنات
وبقه بالبيت وحده ....
قفلت باب غرفتي ورفعت ثوبي وخليت فلوس
وذهب وشديتهن على بطني وطلعت القامه
فكره سريعه كلت خلي اتغده بي قبل ما يتعشى بيه
مامعقوله سنه كامله افكر واخطط حتى اخلي
كفاح يامن بيه ويسلمني الخيط والمخيط
يجي هذا يخلص عليه ....خطتي من البدايه
كانت اكسب ود كفاح منين طلع هذا
سمعت حركه بالباب مال واحد يريد يفتحه
بسرعه ختلت وره الباب مره اثنين انفتح الباب
دخل قحطان يدور عليه اني وره الباب التفت عليه
وبدون ما يحس ضربته بالقامه على متنه
صاح يابن الكلب ضربته الضربه الثانيه بس
ما ادري وين طاحت الضربه براسه بصدره
كل الي انتبهت عليه وكع بالكاع ووكع المفتاح مال السياره اخذته ...
تحركت بسرعه وقفلت الباب عليه لان جان عايش
و يون ويلوج ما الالم خفت لايسمعوني ركضت طلعت
للسجن فتحته وطلعت النسوان كلهن المره المسيحيه
ماتكدر تمشي طلبت من النسوان يساعدني
هنه خايفات مني لا اخذهن يذبحوهن
امنتهن وكلتلهن يلا بسرعه اصعدن بهاي السياره
صعدتهن ....خبرتي بالسياقه فادتني صح ناسيه بس
شغلت السياره وانطلقت وكل سيطره امر عليها يعرفون هاي سيارة قحطان ...
يفتحون الطريق ....والله لو كان الخوف على جبل كان
انهد ...اسوق واصيح ياعلي ياحاضر الشدات
وجعلنا من بينهم سدا ومن خلفهم سدا فاغشيناهم فهم لايبصرون ...
عبرت اكثر من سيطره انطلقت بسرعه جنونيه ظلام
والطيران اسمعه من فوك خايفه يلحكوني
وخايفه الطياره تضربني ...
لا اعرف وين الطريق وامشي ومسلمتها لله ..
وجه الصبح وصلت على مفرزه عسكريه
تابعه للجيش العراقي ....
رفعوا سلاحهم علينه وقفت السياره وكلت للنسوان ابقن
لا اطلعن اني راح اسولف وياهم .....
نزلت رافعه ايديه وابجي كلتلهم حرمه والحرمه بشارب
الخير الله وكيلكم شارده من داعش اني وهاي
النسوان وجايين عليكم ...
تلكون حياج الله نزلونه واخذونه على مفرزه طبيه
سولفت سالفتي للضابط ...
كال انتي شجاعه والج يم الله ثواب لان انقذتي ارواح
راح تبقين يمنه فتره لحد ما ترتاحيين انتي والنسوان
بعد فتره اجت لجنه تحقيقيه وطلبت معلومات مني
كل الي اعرفه جاوبت بي اماكنهم اسمائهم
سياراتهم اماكن تجمعهم كولشي اعرفه ...
بقينا شهر بمخيمات اللاجئين ...اني والنسوان
بعدها قررت اروح على دموع واترك المخيم
ودعت النسوان وطلبت منهم يبروني الذمه
واعتذرت منهن لان جان لازم اتصرف هيج وياهن
حتى مايشكون بيه ...
سافرت على اربيل رحت على دموع من شافتني بجت
وحضنتني ...
نوشي كال عبالنه ميته لاخبر منج لا سالفه
سولفتلهم كل الصار بيه من ضيم وشلون شردت
من كفاح وداعش ...
بقيت يمهم شهرين بعدين ودعتهم وقررت استقر بغير
محافظه هم ادور على خلفتي وهم ما اصير ثقيله عليهم
رحت على بغداد وقررت التقي باخوتي ...
وصلت لمنطقتنا دكيت باب البيت طلعلي طفل
كلي هاا ...
كتله روح كول لابوك عمتي بالباب ..راح الطفل
يركض طلع رضا ...كال تفضلي ..
زاد فضلك سلم عليه لكن برود ....
عرفت كلشي منهم وعرفت منو ابويه الحقيقي
وعرفت ليش مقداد عافني اجو ولد عمي واجن البنات
عليه سلمن بين فرحه وبين حزن ...بقيت للعصر
عفتهم ورحت .....طلبوا مني ابقى لان هاي وصية ابويه
كلتلهم لا بين فتره وفتره اجي اشوفكم ...
بقيت افتر بين محافظه ومحافظه الا ان استقريت في محافظة السماوه بدار المسنين اتواصل ويه اخوتي
ومرات ازورهم لكن استقراري كان بدار المسنين
انتهت ....
اعرف هناك العديد من الاسئله بعضها تحفظنا ع الاجابه
بطلب من صاحبة القصه ...
1-القصه حقيقه
2-صاحبه القصه عايشه حاليا وموجوده وعلى تواصل معاها
3-اسمها الحقيقي اكرام ....والدها الحقيقي بطلب منها
ماحبت نذكر تفاصيل اكثر عنه كونهم عائله معروفه
4-مقداد لازال في العراق وعلى تواصل مع ازهار
5-الحاج عبد الرحمن توفى
6-دموع وزوجها سافروا للخارج بعد ما قدموا طلب لجوء
7-اولاد ازهار لحد هذه اللحظه لاتعرف عنهم اي شيئ
احبائي ....سواء احببنا ازهار وكرهناها فنحن لسنا قضاة
لنطلق الاحكام على الناس ...جمعينا خطاة عصاة
وجميعنا بشر ولكن يبقى من يعترف بالخطأ هم
خيرة الناس ....
اعتذر لتقصيري بكتابة القصه واعتذر لكون البارتات قصيره
ليس تقاعس منا وانما بسبب الحاله الصحيه المترديه
انتظروني بقصه جديده ....
الكاتبه ليلان حكمت ......
