طريقي نحو النار ....
البارت السابع ....
ليلان حكمت ....
التفكير بالانهزام والتخطيط صار شغلي الشاغل
الهروب هو الحل الوحيد اكون بوحده وعزله تامه
ارتاح من نعيق النساء وثرثرتهم والقال والقيل ...
واكثر شي ارتاح من مرت عمي وشوفتها
ونظرت الحقد الي بداخلها...
الحقدوالكره صاروا رفيقاي من اكعد بوحدي
افكار مشتته واحاسيس مبعثره
ومرات ابجي بهدوء حتى اهلي ميسمعون
ويكولون تمرضت من جديد ....
مر شهر على خروجي من المستشفى هدوء تام
لكن علاقتي باخويه رضا تخلخلت اصبحنا مثل الفاره
والبزون ...يراقبني اربعه وعشرين ساعه
ويراقب الكلمه الي تطلع من حلكي احسه كرهني
وميرتاحلي ....ومن اغلط بشي ...
بسرعه يغلط عليه وكأنه اني عدوته ....
خلص علاجي وكان لازم اروح للدكتور اجدد الوصفه
ويسويلي فحوصات ويتاكد من حالتي ...
رحنا اني وابويه للعياده كانت قريبه علينا ...
حجزنا وانتظرنا دورنا ...
مراجعين كاعدين الي مثلي مار بأزمه والي
منتهي مخبل فد مره ...
دخلت للدكتور سلمت عليه ....وابويه سلم عليه
كان سلامي للدكتور بارد هو انتبه طلب من ابويه يطلع
حتى يسولف وياي شويه ...
كام من الكرسي مالته وكعد بالكرسي الي مقابيلي وكلي ...
=شلونج ازهار ....
=زينه الحمد لله ...
=بس اني ما اشوفج زينه ...
=لا دكتور والله زينه وحتى اكل وبديت اعيش حياتي طبيعي ...
=سولفيلي شنو الي مضايقج ...
=ترددت شويه بس تلقائيا حجيت ...دكتور افكر اهرب
من البيت حتى اهلي يرتاحون من عاري ...
=اي ...
=دكتور اني تعبانه اريد ابقى بوحدي اريد ابتعد ..
=ممكن اسئل سؤال ...
=اكيد تفضل ...
=شنو هو العار الي حاسه بي عذرا لتدخلي بس بين الدكتور والمريض ماكو اسرار...
=دكتور صعب مينحجي ...
=شنو الصعب ...زنيتي مثلا ...سرقتي ...شنو العار الي خايفه
منه ...
من هو يحجي انهاريت وبجيت وسولفت سالفتي كلها
وهو ما رفع راسه مدنك يكتب ملاحظات
بس من وصلت لسالفة امي انتبه عليه وسألني انتوا وين ساكنين باي منطقه ...
جاوبته وبده يسأل عن ادق التفاصيل الي تخص حياتي
شلون تربيت شنو الي احبه شنو الي اكرهه من كملت
كلي روحي انتظري واريد ابوج يدخل وحده ...
سالته خو ماكو شي دكتور ...كلي سلامتج ماكو شي
بس مجرد اسئله كم سؤال للاطمئنان على وضعج الصحي ...
ما اعرف ليش ما صدكت بي وحسيته ضام شي عليه
او راح يكول شي لابويه ...يخصني ..
طلعت من غرفته ودخل والدي واني منتظره
بقيت حوالي ٤٥ دقيقه منتظره ابويه يطلع ..
من انفتحت باب غرفة الدكتور ابويه طلع بس لون وجهه
متغير اصفر وعيونه مخنزره سالته خير بابا ..
جان يكول سلامتج بابا ماكو شي ...يلا خلي نروح للدكتور
