ﻃﺮﻳﻘﻲ ﻧﺤﻮ ﺍﻟﻨﺎﺭ ....
ﺍﻟﺒﺎﺭﺕ ﺍﻟﺤﺎﺩﻱ ﻭﺍﻟﻌﺸﺮﻭﻥ ....
ﻟﻴﻼﻥ ﺣﻜﻤﺖ ..
ﻧﻌﺘﺬﺭ ﻋﻦ ﺍﻟﺘﺎﺧﻴﺮ .... ﺑﺴﺒﺐ ﺍﻟﻈﺮﻭﻑ ﻭﺳﻮﺀ ﺣﺎﻟﺘﻲ ﺍﻟﺼﺤﻴﻪ ...
ﺍﻟﻨﺎﺱ ﺑﺪﺕ ﺗﺴﻮﻱ ﻓﺎﺗﺤﻪ ﻻﻡ ﻋﻤﺎﺩ ﻭﺛﻮﺍﺑﺎﺕ ﻭﺍﻟﻨﺴﻮﺍﻥ ﺳﻮﻥ ﻣﺠﻠﺲ ﻭﺟﻤﻌﻮﻟﻲ ﻓﻠﻮﺱ ﻣﺼﺮﻑ ﺍﻟﻲ ﻭﺍﻟﺒﺘﻮﻝ
ﻻﻥ ﻋﺮﻓﻮﺍ ﺑﻮﺿﻌﻲ .... ﻛﻔﺖ ﺍﻟﻨﺎﺱ ﺣﺎﻟﻬﺎ ﻭﺭﺍﺣﺖ ﺻﻔﻴﺖ
ﺑﺲ ﺍﻧﻲ ﻭﺑﺘﻮﻝ ﻭﺣﺪﻩ ﺗﺒﺎﻭﻉ ﻟﻠﺜﺎﻧﻴﻪ ...
ﺳﺎﻋﻪ ﻧﺒﺠﻲ ﻭﺳﺎﻋﻪ ﻧﻮﻥ ﻭﺳﺎﻋﻪ ﻧﺴﻜﺖ ...
ﻳﻜﻮﻟﻮﻥ ﻣﻦ ﺗﺼﻔﻰ ﻋﻠﻴﻚ ﺍﻟﺪﻧﻴﺎ ﺷﻜﻮ ﺳﺎﻟﻔﻪ ﻣﻌﺜﺮﻩ ﺗﻄﻠﻌﻠﻚ
ﺍﻟﺠﺪﻳﺪﻩ ﻭﺍﻟﻘﺪﻳﻤﻪ ﺭﺟﻌﺖ ﺑﻴﻪ ﺫﺍﻛﺮﺗﻲ ﻟﻠﻤﺎﺿﻲ
ﻭﺣﻴﺎﺗﻲ ﺍﻟﻤﻌﺜﺮﻩ ﺍﻟﻲ ﺟﻨﺖ ﺍﻋﻴﺸﻬﺎ ....
ﻛﻌﺪﺕ ﺍﻟﻮﻡ ﺑﻨﻔﺴﻲ ﺷﻠﻮﻥ ﻋﺸﺖ ﻭﺷﻠﻌﺒﺖ ﺑﺮﻭﺣﻲ ﻭﺷﺴﻮﻳﺖ
ﺑﺪﻧﻴﺎﻧﻲ ﻫﺎﻱ ﺍﻡ ﻋﻤﺎﺩ ﻋﻠﻰ ﻏﻔﻠﻪ ﺭﺍﺣﺖ ﻭﻫﺎﻱ ﺍﻡ ﺣﻤﻴﺪ
ﻫﻢ ﻋﻠﻰ ﻏﻔﻠﻪ ﺭﺍﺣﺖ ﻳﺠﻮﺯ ﺍﻟﺪﻭﺭ ﺍﻟﺠﺎﻱ ﺍﻧﻲ ...
ﺩﺭﺕ ﻭﺟﻬﻲ ﺑﺎﻭﻋﺖ ﻉ ﺍﻟﻤﺴﻜﻴﻨﻪ ﺑﺘﻮﻝ ﻧﺎﻳﻤﻪ ....
ﺍﻭﻭﻭﻑ ﻳﺎﺭﺑﻲ ﻫﺴﻪ ﺍﻧﻲ ﺍﺫﺍ ﻣﺘﺖ ﻫﺎﻟﻤﻜﺮﻭﺩﻩ ﻣﻨﻮ ﺍﻟﻬﺎ
ﻭﻭﻳﻦ ﺗﺮﻭﺡ ....
ﺧﻄﻴﻪ ﻣﺎﻋﺪﻫﺎ ﺍﺣﺪ ﻣﺜﻠﻲ ﻛﻄﻌﺖ ﺑﻴﻪ ﺍﻟﺪﻧﻴﺎ ﺣﺘﻰ ﺧﻠﻔﺘﻲ
ﺿﺎﻋﺖ ﻣﻨﻲ ... ﺑﺲ ﺍﻟﺤﻤﺪ ﻟﻠﻪ ﻋﻠﻰ ﻛﻞ ﺣﺎﻝ ﻳﺠﻮﺯ ﻫﺬﺍ ﻋﻘﺎﺏ ﺍﻟﻲ .... ﺍﻟﺴﻮﻳﺘﻪ ﺑﺪﻧﻴﺎﻱ ﻣﻮ ﺷﻮﻳﻪ ..
ﻭﻳﻤﻜﻦ ﺍﻟﻠﻪ ﺳﺒﺤﺎﻧﻪ ﻭﺗﻌﺎﻟﻰ ﻭﺩﺍﻟﻲ ﺑﺘﻮﻝ ﺣﺘﻰ ﺗﺮﺩ ﻋﻨﻲ
ﻭﺣﺸﺔ ﺟﻬﺎﻟﻲ ﻭﻓﺮﺍﻛﻬﻢ ﺳﺒﺤﺎﻧﻪ ﻭﺗﻌﺎﻟﻰ ﻋﻠﻰ ﻛﻮﻟﺸﻲ ﻗﺎﺩﺭ
ﻋﺪﺕ ﺍﻻﻳﺎﻡ ﻭﻻﺯﻡ ﺍﺭﺟﻊ ﺍﻟﺸﻐﻠﻲ ﺑﺲ ﺷﻠﻮﻥ
ﺍﻟﺪﻧﻴﺎ ﻫﺮﺝ ﻭﻣﺮﺝ ﻭﺟﺎﺭﻙ ﺑﻌﺪ ﻣﺎ ﺗﺎﻣﻦ ﺑﻲ
ﻭﺍﻻﻣﺮﻳﻜﺎﻥ ﺗﺎﺭﺳﻴﻦ ﺍﻟﺸﻮﺍﺭﻉ ﻭﻛﻞ ﺷﻮﻳﻪ ﻗﻄﻊ ﻟﻠﻄﺮﻳﻖ
ﻭﺣﻀﺮ ﺗﺠﻮﺍﻝ ...
ﺻﺮﺕ ﺍﺧﺎﻑ ﻋﻠﻰ ﺑﺘﻮﻝ ﺍﺫﺍ ﺍﻃﻠﻊ ﻣﺎ ﺍﻛﺪﺭ ﺍﻋﻮﻓﻬﺎ
ﻭﺍﺫﺍ ﺍﺑﻘﻰ ﻧﺤﺘﺎﺝ ﻣﺼﺎﺭﻳﻒ ﻟﻠﻄﺒﻴﺐ ﻭﺍﻻﻛﻞ ﻭﺍﻟﺸﺮﺏ
ﺑﻘﻴﺖ ﺧﺎﻳﻔﻪ ﻣﺮﻋﻮﺑﻪ ﻋﻠﻰ ﺑﺘﻮﻝ ﻣﺎ ﺍﺭﻳﺪ ﻳﺼﻴﺮ ﺑﻴﻬﺎ ﺍﻟﻲ ﺻﺎﺭ ﺑﻴﻪ ﺧﺼﻮﺻﺎ ﻫﻲ ﻣﻌﻮﻗﻪ ﻭﻣﺎﺗﺤﺠﻲ ﻭﺿﻌﻴﻔﻪ ﻣﺎﺗﻜﺪﺭ ﺍﺩﺍﻓﻊ ﻋﻦ ﻧﻔﺴﻬﺎ ....
ﺯﺍﺩﺕ ﺣﻴﺮﺗﻲ ﻭﻟﻮﻋﺘﻲ ﻟﺤﺪ ﻣﺎ ﺳﻤﻌﺖ ﻳﻌﻮﺿﻮﻥ ﺷﻬﺪﺍﺀ ﺍﻻﺭﻫﺎﺏ ﻓﻠﻮﺱ ﻭﻋﺮﺻﺎﺕ ...
ﻃﺮﺕ ﻣﻦ ﺍﻟﻔﺮﺡ ﻭﻛﻠﺖ ﺍﻟﻠﻪ ﻣﺎﻳﻜﻄﻊ ﺑﻬﺎﻱ ﺍﻟﻴﺘﻴﻤﻪ ﺍﻟﻤﺴﻜﻴﻨﻪ
ﺭﺣﺖ ﻓﺘﺤﺖ ﺍﻟﺼﻨﺪﻗﺠﻪ ﻭﻃﻠﻌﺖ ﺍﻟﺠﻨﺎﺳﻲ ﻭﺍﻭﺍﺭﻕ ﺍﻡ ﻋﻤﺎﺩ ﺍﻟﺜﺒﻮﺗﻴﻪ ...
ﻭﺛﺎﻧﻲ ﻳﻮﻡ ﺍﺧﺬﺗﻬﺎ ﻟﻤﺆﺳﺴﺔ ﺍﻟﺸﻬﺪﺍﺀ ﺍﺭﺍﺟﻊ ﺑﻴﻬﺎ ...
ﻛﻞ ﻣﻮﻇﻒ ﻳﺸﻤﺮﻧﻲ ﻉ ﺍﻟﺜﺎﻧﻲ ﺍﻟﻲ ﻋﻨﺪﻩ ﻭﺍﺳﻄﻪ ﻛﻤﻞ ﺷﻐﻞ
ﻭﺍﻟﻲ ﺩﻓﻊ ﻓﻠﻮﺱ ﻣﺸﺖ ﺍﻣﻮﺭﻫﺎ ﻭﺍﻧﻲ ﺷﺒﻌﺖ ﻣﺮﺍﺭ ﻭﻛﻞ ﻭﺍﺣﺪ ﻳﺪﻭﻟﺒﻨﻲ ﻉ ﺍﻟﺜﺎﻧﻲ ...
ﺗﻌﺒﺖ ﻭﺗﻴﺘﻲ ﺗﻴﺘﻲ ﻣﺜﻞ ﻣﺎ ﺭﺣﺘﻲ ﺍﺟﻴﺘﻲ ﻣﺎﻛﻮ ﻛﻞ ﻗﺒﺾ
ﻛﻌﺪﺕ ﺑﺎﺏ ﺍﻟﺪﺍﺋﺮﻩ ﺍﺑﺠﻲ ﻭﺍﺣﺠﻲ ﻭﻳﻪ ﺭﻭﺣﻲ ﻭﺍﻛﻮﻝ ﻟﻴﺶ
ﻳﺎﺭﺑﻲ ﻳﻀﻴﻊ ﺣﻖ ﻫﺎﻟﻴﺘﻴﻤﻪ ﺍﻧﻲ ﻣﺎ ﺩﺍﻳﻤﺘﻠﻬﺎ ﻭﺍﻟﺪﻧﻴﺎ ﻏﺪﺍﺭﻩ
ﺑﻘﺖ ﺩﻣﻌﺘﻲ ﺑﻌﻴﻨﻲ ﻭﺑﺘﻮﻝ ﻛﺎﻋﺪﻩ ﺑﺼﻔﻲ ﺩﻣﻌﺘﻬﺎ ﺑﻌﻴﻨﻬﺎ ﺍﺟﺎﻧﻲ
ﻭﻟﺪ ﻛﻠﻲ ﺧﺎﺗﻮﻥ ﺷﺒﻴﺞ ﺗﺒﺠﻴﻦ ﻭﻛﺎﻋﺪﻩ ﺑﺎﻟﻜﺎﻉ ..
ﻭﻛﻔﺖ ﻋﻠﻰ ﺣﻴﻠﻲ ﺳﻮﻟﻔﺘﻠﻪ ﺳﺎﻟﻔﺘﻲ ﺍﻟﻪ ...
ﺟﺎﻥ ﻳﻀﺤﻚ ﻭﻳﻜﻮﻝ ﻫﺎﻱ ﺍﻟﺴﻬﻠﻪ .... ﺍﻧﻄﻴﻨﻲ ﺍﻭﺭﺍﻗﺞ ﺍﻧﻲ ﻣﺤﺎﻣﻲ ﺍﻛﻤﻠﺞ ﺷﻐﻠﺞ ﻭﺍﺧﺬ ﻣﺒﻠﻎ ..
ﻛﺘﻠﻪ ﺍﻧﻲ ﻭﻻ ﻗﻤﺮﻱ ﻣﻔﻠﺴﻪ ... ﻛﻠﻲ ﻣﻮ ﻫﺴﻪ ﻣﻦ ﺗﻘﺒﻀﻴﻦ ﺗﻨﻄﻴﻨﻲ
ﻣﺎﻻﺗﻲ ....
ﺭﺩﻳﺖ ﻋﻠﻴﻪ ﻫﺎﻱ ﺍﻟﺴﻬﻠﻪ ﺑﺴﻴﻄﻪ ﺑﻴﻚ ﺧﻴﺮ ﻭﺩﻟﻞ ...
ﻛﻠﻲ ﺭﻭﺣﻲ ﺍﺳﺒﻮﻉ ﻭﺗﺠﻴﻦ ...
ﺳﻠﻤﺘﻪ ﺍﻻﻭﺭﺍﻕ ﻭﺭﺟﻌﺖ ﻟﻠﺒﻴﺖ ﺑﻌﺪ ﻣﺎ ﺍﺧﺬﺕ ﺭﻗﻢ ﺗﻠﻔﻮﻧﻪ
ﺑﺪﻳﺖ ﺍﻓﻜﺮ ﺷﺴﻮﻱ ﺑﺎﻟﻔﻠﻮﺱ ﻻﺯﻡ ﻣﺸﺮﻭﻉ
ﻳﺒﻘﻰ ﻣﺼﺪﺭ ﻋﻴﺸﻪ ﻟﻬﺎﻱ ﺍﻟﻤﺴﻜﻴﻨﻪ ﺑﺲ ﺷﻨﻮ ﺍﻟﻤﺸﺮﻭﻉ
ﺍﻟﻲ ﻳﺪﺭ ﻓﻠﻮﺱ ﻣﻦ ﻏﻴﺮ ﻣﺎ ﺍﻃﻠﻊ ﺍﻧﻲ ﻣﻦ ﺍﻟﺒﻴﺖ
ﺣﺘﻰ ﻣﺎ ﺍﻋﻮﻑ ﺑﺘﻮﻝ ﻭﺣﺪﻫﺎ
ﺧﻠﺺ ﺍﻻﺳﺒﻮﻉ ﻭﺍﺳﺘﻘﺮﻳﺖ ﺍﺳﻮﻱ ﻣﺠﻤﻊ ﺯﻏﻴﺮ ﺍﺟﻴﺐ ﺑﻲ ﻣﻮﺍﺩ ﻏﺬﺍﺋﻴﻪ ﻭﺍﺣﺘﻴﺎﺟﺎﺕ ﻣﻨﺰﻟﻴﻪ ﻭﻛﻤﺎﻟﻴﺎﺕ ﻣﺘﻨﻮﻋﻪ ...
ﺭﺣﺖ ﻋﻠﻰ ﺩﺍﺋﺮﺓ ﺍﻟﺸﻬﺪﺍﺀ ﻟﻜﻴﺖ ﺍﻟﻮﻟﺪ ﻣﻨﺘﻈﺮﻧﻲ
ﻣﻜﻤﻞ ﺍﻟﻤﻌﺎﻣﻠﻪ ﺍﻧﻄﺎﻧﻲ ﻭﺻﻞ ﺑﻲ ﻣﻮﻋﺪ ﺍﺳﺘﻼﻡ ﺍﻟﻔﻠﻮﺱ
ﻓﺮﺣﺖ ﻭﺣﻤﺪﺕ ﺍﻟﻠﻪ ﻭﺷﻜﺮﺗﻪ ﻣﺎﻛﻄﻊ ﺑﻴﻪ
ﻭﺻﻠﻨﻲ ﺍﻟﺴﺮﻩ ﺑﻤﻮﻋﺪ ﻣﺮﺍﺟﻌﺔ ﺍﻟﻤﺼﺮﻑ ﺭﺣﺖ ﻣﻦ ﺍﻟﺼﺒﺢ ﺍﻧﻲ
ﻭﺑﺘﻮﻝ ﺻﺎﺣﻮﺍ ﺑﺎﺳﻤﻬﺎ ﻭﻃﻠﺒﻮﺍ ﺟﻨﺴﻴﺘﻬﺎ ﻭﺍﻭﺭﺍﻗﻬﺎ ﻛﺎﻣﻠﻪ
ﻭﻗﻌﻮﻫﺎ ﻭﻛﺎﻟﻮﻟﻬﺎ ﺫﻧﻲ ﺟﺰﺀ ﻣﻦ ﺍﻟﻔﻠﻮﺱ ﺗﻼﺛﻴﻦ ﻣﻠﻴﻮﻥ
ﺍﻟﺠﺰﺀ ﺍﻟﺜﺎﻧﻲ ﺑﻌﺪ ﺗﻠﺚ ﺷﻬﻮﺭ ...
ﺍﺧﺬﺕ ﺍﻟﻔﻠﻮﺱ ﻭﺭﺣﺖ ﻟﻠﺒﻴﺖ ﻭﺍﻧﻲ ﻓﺮﺣﺎﻧﻪ
ﺩﺧﻠﺖ ﻟﻠﺒﻴﺖ ﺳﻮﻳﺖ ﻏﺪﻩ ﺗﻐﺪﻳﻨﺎ
ﻛﻌﺪﺕ ﺍﺳﻮﻟﻒ ﻭﻳﻪ ﺑﺘﻮﻝ ﺍﻛﻠﻠﻬﺎ ﺭﺍﺡ ﺍﺳﻮﻳﻠﺞ ﻣﺠﻤﻊ ﺟﺒﻴﺮ
ﻭﺍﻋﻠﻤﺞ ﺷﻠﻮﻥ ﺗﺒﻴﻌﻴﻦ ﻭﺗﺸﺘﺮﻳﻦ ﻭﺷﻠﻮﻥ ﺗﺤﺴﺒﻴﻦ ﺍﻟﻔﻠﻮﺱ
ﻃﺒﻌﺎ ﻭﺗﺘﻌﺎﻣﻠﻴﻦ ﻻﻥ ﺍﻧﺘﻲ ﺗﻌﺮﻓﻴﻦ ﺗﻘﺮﻳﻦ ﻭﺗﻜﺘﺒﻴﻦ ... ﺍﺧﻠﻴﺞ ﺗﺤﺠﻴﻦ ﻭﻳﺎﻫﻢ ﺑﺎﻟﻜﺘﺎﺑﻪ ....
ﺑﺎﻟﻠﻴﻞ ﺿﻤﻴﺖ ﺍﻟﻔﻠﻮﺱ ﺟﻮﻩ ﺍﻟﻐﺮﺍﺽ ﺍﻟﻤﻜﺴﺮﻩ ﻓﻮﻙ ﺍﻟﺴﻄﺢ
ﺧﻔﺖ ﻣﻦ ﺍﻟﺤﺮﺍﻣﻴﻪ ﻻﻥ ﺍﺩﺭﻱ ﻣﺤﺪ ﻳﺪﻭﺭ ﺑﻬﺎﻱ ﺍﻟﺰﺑﺎﻳﻞ ...
ﻗﻔﻠﺖ ﺍﻻﺑﻮﺍﺏ ﻭﻧﻤﺖ ﻻﻥ ﻧﻌﺴﺎﻧﻪ ﻭﺗﻌﺒﺎﻧﻪ ...
ﻭﺟﻪ ﺍﻟﻔﺠﺮ ﺳﻤﻌﺖ ﺣﺮﻛﻪ ﺑﺎﻟﺒﻴﺖ ﻓﺰﻳﺖ ﻟﻜﻴﺖ ﺑﺘﻮﻝ ﺗﺎﺷﺮﻟﻲ
ﺑﺎﻳﺪﻳﻬﺎ ﻛﺘﻠﻬﺎ ﺷﺒﻴﺞ ﻳﻤﻪ ... ﺍﺷﺮﺗﻠﻲ ﺍﻛﻮ ﺯﻟﻢ ﺑﺎﻟﺒﻴﺖ
ﺑﻠﻌﺖ ﺭﻳﻜﻲ ﻭﺧﻔﺖ ... ﻳﻤﻪ ﺭﺑﻲ ﺩﺧﻴﻠﻚ ﺑﺲ ﻻ ﻳﻘﺘﻠﻮﻧﻪ
ﻣﻮﺧﻮﺵ ﺳﺎﻟﻔﻪ ﻫﺎﻱ .... ﺷﻮﻳﻪ ﺍﻧﺪﻓﻌﺖ ﺑﺎﺏ ﺍﻟﻐﺮﻓﻪ
ﻭﺩﺧﻠﻮﺍ ﻋﻠﻴﻨﻪ ﺩﺧﻠﻮ ﻋﻠﻴﻨﻪ ﺧﻤﺴﻪ ﻣﻠﺜﻤﻴﻦ ﺍﺛﻨﻴﻦ ﻟﺰﻣﻮﺍ ﺑﺘﻮﻝ
ﻭﺗﻼﺛﻪ ﺍﺟﻮﻩ ﻋﻠﻴﻪ ﺻﺎﺡ ﻭﺍﺣﺪ ﻣﻨﻬﻢ ﻭﻳﻦ ﺍﻟﻔﻠﻮﺱ
ﻛﺘﻠﻪ ﺍﻟﻠﻪ ﻭﻛﻴﻠﻚ ﻣﺎﻋﻨﺪﻱ ﻓﻠﻮﺱ
ﺟﺎﻥ ﻳﻀﺮﺑﻨﻲ ﻭﻳﻜﻠﻲ ﻻﺗﺠﺬﺑﻴﻦ ﺍﺭﻳﺪ ﻓﻠﻮﺱ ﺍﻟﺘﻌﻮﻳﺾ ﺍﺳﺘﻠﻤﺘﻲ ..
ﺑﺪﻳﺖ ﺍﺗﻤﺎﻃﻞ ﻭﻳﺎﻫﻢ ﻭﻫﻤﻪ ﻳﻀﺮﺑﻮﻥ ﺑﻴﻪ ﻣﺎﺣﺼﻠﻮﺍ ﻛﻼﻡ ﻣﻨﻲ
ﻭﺍﺣﺪ ﻣﻨﻬﻢ ﺟﺎﺏ ﻋﺼﻪ ﺷﺎﻓﻬﺎ ﻣﺸﻤﻮﺭﻩ
ﻭﻃﺎﺣﻠﻲ ﺩﻙ ﺑﻴﻬﺎ ﻭﺍﻧﻲ ﺍﺻﻴﺢ ﺩﺧﻴﻠﻜﻢ ﻋﻮﻓﻮﻧﻲ ﺍﻧﻲ ﻣﺎﻋﻨﺪﻱ ﻓﻠﻮﺱ ﻛﺴﺮﻭﻧﻲ ﺗﻜﺴﻴﺮ ﻣﻦ ﻣﺎﺣﺼﻠﻮﺍ ﻧﺘﻴﺠﻪ ﻣﻨﻲ ... ﻟﻴﻼﻥ ﺣﻜﻤﺖ ....
ﺭﺍﺣﻮﺍ ﻋﻠﻰ ﺑﺘﻮﻝ ﺿﺮﺑﻮﻫﺎ ﻭﺷﻜﻜﻮﺍ ﻣﻼﺑﺴﻬﺎ ﺭﺍﺩﻭﺍ ﻳﻌﺘﺪﻭﻥ ﻋﻠﻴﻬﺎ ...
ﺻﻴﺤﺖ ﺩﺧﻴﻠﻜﻢ ﻋﻮﻓﻮﻫﺎ ﺍﻧﻲ ﺍﻧﻄﻴﻜﻢ ﺍﻟﻔﻠﻮﺱ ...
ﺩﻟﻴﺘﻬﻢ ﺑﻤﻜﺎﻥ ﺍﻟﻔﻠﻮﺱ ﺻﻌﺪﻭﺍ ﺍﺛﻨﻴﻦ ﺟﺎﺑﻮﻫﻦ ﻣﻦ ﺷﺎﻓﻮﺍ ﺍﻟﺠﻨﻄﻪ ﺑﻴﻬﺎ ﺍﻟﻔﻠﻮﺱ ﻋﺎﻓﻮﺍ ﺑﺘﻮﻝ ﺭﻛﻀﺖ ﻛﻌﺪﺕ ﺑﺤﻈﻨﻲ
ﻭﻫﻤﻪ ﻃﻠﻌﻮﺍ ﻣﻦ ﺍﻟﺒﻴﺖ ....
ﻣﻦ ﻃﻠﻌﻮﺍ ﺑﺠﻴﺖ ﺑﺤﺮﻛﻪ ﺷﻠﻮﻥ ﻣﺼﻴﺒﻪ ﻫﺎﻱ ﻳﺎﺭﺑﻲ
ﺍﻧﺒﺎﻛﺖ ﻓﻠﻮﺱ ﺍﻟﻴﺘﻴﻤﻪ ...
ﻭﻳﻦ ﻧﺮﻭﺡ ﻭﻳﻦ ﻧﻤﺸﻲ ﺍﻟﻤﻦ ﺍﻧﻄﻲ ﻭﺟﻬﻲ ..
ﺍﻟﺼﺒﺢ ﺗﺠﻴﺖ ﺭﻭﺣﻲ ﻛﻮﻩ ﻟﺒﺴﺖ ﻋﺒﺎﺗﻲ
ﻭﺭﺣﺖ ﺍﺷﺘﻜﻲ ....
ﺩﺧﻠﺖ ﺍﻟﻤﺮﻛﺰ ﺍﻟﺸﺮﻃﻪ ﻗﺪﻣﺖ ﺷﻜﻮﻯ ﺑﺲ ﺷﻨﻮ ﺍﻟﻔﺎﻳﺪﻩ ﻻﺷﻔﺖ
ﻭﻭﺟﻮﻫﻢ ﻭﻻ ﻋﺮﻓﺖ ﺍﺳﺎﻣﻴﻬﻢ ﺷﻜﻮﻯ ﺗﺎﻳﻬﻪ ...
ﺭﺟﻌﺖ ﺑﺎﻟﻄﺮﻳﻖ ﺍﻣﺸﻲ ﻭﺍﻧﻲ ﺍﺗﻮﺟﻊ ﻭﺍﺗﺎﻟﻢ ﻭﺣﺼﺮﺗﻲ ﺑﻜﻠﺒﻲ
ﻣﺎﺣﺴﻴﺖ ﻋﻠﻰ ﺭﻭﺣﻲ ﺍﻻ ﺷﻮﻳﻪ ﻣﺪﻋﻮﻣﻪ ... ﻭﻛﻌﺖ ﺑﺎﻟﻜﺎﻉ
ﺑﺮﻛﺖ ﻋﻠﻰ ﺣﻴﻠﻲ ﻣﻦ ﺍﻟﺘﻌﺐ ﻭﺍﻟﻬﺒﻄﻪ ﻣﺎﻝ ﺍﻟﺤﺮﺍﻣﻴﻪ ﻭﺍﻟﺴﻴﺎﺭﻩ
ﺑﻌﺪ ﻣﺎﺑﻴﻪ ﺍﻛﻮﻡ ......
ﻧﺰﻝ ﺷﺎﺏ ﻣﺘﻮﺳﻂ ﺑﺎﻟﻌﻤﺮ ... ﻛﻠﻲ ﻫﺎ ﺧﻮﻳﻪ ﺑﺲ ﻻ ﺍﺗﻌﻮﺭﺗﻲ
ﺍﺳﻒ ﺑﺲ ﻳﺎﺧﻮﻳﻪ ﺍﻧﺘﻲ ﺻﺮﺗﻲ ﻛﺪﺍﻣﻲ ...
ﺍﻧﺘﺒﻬﺖ ﺍﻟﺼﻮﺕ ﺳﺎﻣﻌﺘﻪ ﺑﺎﻭﻋﺖ ﺑﻮﺟﻬﻪ ... ﺻﺪﺕ ﻋﻴﻨﻲ ﺑﻌﻴﻨﻪ
ﻳﺎﺭﺑﻲ ﺻﺪﻙ ﺟﺬﺏ ﻣﻌﻘﻮﻟﻪ ﻏﻤﻀﺖ ﻋﻴﻨﻲ ﻓﺘﺤﺘﻬﺎ ﻣﻌﻘﻮﻟﻪ ﻫﺬﺍ
ﻣﻘﺪﺍﺩ ... ﻻ ﻻ ﻣﺎ ﺍﺻﺪﻙ ....
ﻛﻤﺖ ﻋﻠﻰ ﺣﻴﻠﻲ ﻭﻫﻮ ﻳﺤﺠﻲ ﺑﺲ ﻣﺎﻣﺮﻛﺰﻩ ﺑﻜﻼﻣﻪ ﻋﻘﻠﻲ
ﻛﻠﻪ ﻳﻢ ﺗﻔﺎﺻﻴﻞ ﻭﺟﻬﻪ ﻓﺠﺎﻩ ﺧﺎﺑﺮ ﻣﻦ ﺿﺤﻚ
ﻓﺘﺤﺖ ﻋﻴﻮﻧﻲ .... ﻳﻤﻪ ﻫﺬﺍ ﻣﻘﺪﺍﺩ ... ﺭﺑﻲ ﺍﻧﻲ ﺑﺤﻠﻢ ﺑﻌﻠﻢ
ﺭﺩﺕ ﺍﺭﻭﺡ ﺍﺣﻀﻨﻪ ﺑﺲ ﺛﺒﺘﺖ ﻋﻠﻰ ﺭﻭﺣﻲ ﺷﻜﻮﻝ ﺷﺤﺠﻲ
ﺷﺠﺎﻭﺑﻪ ﺍﺫﺍ ﺳﺄﻟﻨﻲ ﻭﻳﻦ ﺭﺣﺘﻲ ﻫﺎﻟﺴﻨﻴﻦ ﻛﻠﻬﺎ .. ﻟﺰﻣﺖ ﺑﺘﻮﻝ
ﻭﺑﺪﻳﺖ ﺍﻣﺸﻲ ﺑﺴﺮﻋﻪ ﻭﺍﻟﻬﺚ
ﻭﺍﻛﻠﻠﻬﺎ ﺍﻣﺸﻲ ﺑﺴﺮﻋﻪ ﻻ ﻳﻠﺤﻜﻨﺎ ﺑﻴﻦ ﺍﻟﻨﺎﺱ ﺳﻤﻌﺘﻪ ﻳﺼﻴﺢ ﻳﺎﺑﻨﻴﻪ ﻭﻳﻦ ﺭﺣﺘﻲ ﺧﺎﻑ ﺗﺎﺫﻳﺘﻲ .... ﻣﺎﺟﺎﻭﺑﺘﻪ ﺭﺣﺖ ﺷﺎﺭﺩﻩ ﻟﻠﺒﻴﺖ ...
ﻭﺻﻠﺖ ﻟﻠﺒﻴﺖ ﻋﻴﻮﻧﻲ ﺑﻜﺼﺘﻲ ﻭﺍﺑﺠﻲ ﻭﻳﻦ ﺟﺎﻥ ﻭﻭﻳﻦ ﺭﺍﺡ
ﻭﺷﻠﻮﻥ ﺧﻠﺺ ﻫﺎﻟﻔﺘﺮﻩ ﻣﻌﻘﻮﻟﻪ ﻫﺮﺏ ﺯﻳﻦ ﺷﻠﻮﻥ ﻭﻭﻳﻦ ﺧﻠﺼﻬﺎ ﻫﺎﻟﻤﺪﻩ ...
ﻣﺎﻛﻮ ﻏﻴﺮ ﺍﺭﻭﺡ ﻟﻤﻨﻄﻘﺘﻨﺎ ﻭﻫﻨﺎﻙ ﺍﻓﺘﻬﻢ ﻛﻠﺸﻲ ...
ﺍﻟﻌﺼﺮ ﺭﺣﺖ ﻟﻠﺴﻮﻙ ﺍﺷﺘﺮﻳﺖ ﺑﻮﺷﻴﻪ ﻟﺒﺴﺘﻬﺎ ﻭﺍﺧﺬﺕ ﺑﺘﻮﻝ ﻭﻃﻠﻌﺖ ﺍﺧﺬﺕ ﺗﻜﺴﻲ ﻟﻤﻨﻄﻘﺘﻨﺎ ﺳﺎﻟﺖ ﻫﻨﺎﻙ ...
ﻋﺮﻓﺖ ﻫﻮ ﻫﺎﺭﺏ ﻣﻦ ﺍﻟﺠﻴﺶ ﻭﻣﺴﺎﻋﺪﻩ ﻭﺍﺣﺪ ﻛﺮﺩﻱ ﻭﻣﻄﻠﻌﻪ
ﺗﻬﺮﻳﺐ ﻟﺘﺮﻛﻴﺎ ﻭﺑﻌﺪﻫﺎ ﻟﺴﻮﺭﻳﺎ ...
ﻭﻋﺮﻓﺖ ﻫﻮ ﻳﺪﻭﺭ ﻋﻠﻰ ﺯﻭﺟﺘﻪ ﺍﺯﻫﺎﺭ ﻭﻫﻮ ﻣﺘﺰﻭﺝ ﻭﻋﻨﺪﻩ ﺍﻃﻔﺎﻝ ...
ﻋﻤﻲ ﻣﺘﻮﻓﻲ ﺑﺲ ﻣﺮﺕ ﻋﻤﻲ ﻋﺎﻳﺸﻪ ﻭﺍﻣﻲ ﻭﺍﺑﻮﻳﻪ ﺍﺧﻮﺗﻲ ﻣﺘﺰﻭﺟﻴﻦ ﻭﻋﺪﻫﻢ ﺍﻃﻔﺎﻝ ... ﺑﺲ ﺍﻟﻠﻪ ﻣﺎﻛﺘﺒﻠﻲ ﺍﺷﻮﻓﻬﻢ
ﻋﺮﻓﺖ ﻋﻨﻮﺍﻥ ﺷﻐﻠﻪ ﻭﻗﺮﺭﺕ ﺍﺧﻠﻲ ﺍﻟﻨﻘﺎﻁ ﻉ ﺍﻟﺤﺮﻭﻑ ﻭﺍﻭﺍﺟﻬﻪ .......
ﺍﻟﻰ ﺍﻟﺒﺎﺭﺕ ﺍﻟﺜﺎﻧﻲ ﻭﺍﻟﻌﺸﺮﻭﻥ .... ﻟﻴﻼﻥ ﺣﻜﻤﺖ .
