طريقي نحو النار ...
الفصل الثاني ...البارت التاسع عشر ..
ليلان حكمت ....
بعد ما ضربوني وطلعوا بقيت اون من الوجع بس حلفت
الا انتقم منهم ...
بس مو هسه لان لحد ما اعرف تاليتي وياهم
واعرف شلون غاسلين عقل جنه ...
تريثت فتره ما اتابعهم خاف يطلعون مراقبيني
ويجون يقتلوني واضيع المشيتين ...
بديت ادور على شغل رحت على فرن الصمون
وسألته عن شغله تفيدني ...
كلي هنا ماكو روحي دوري على شغل بالشورجه
ادفعي عربانه او حملي غراض هناك هواي نسوان
يشتغلن مثلج ...
شفت الفكره عجبتني طلبت منه يكفلني يم تاجر
او صاحب محل حتى يشغلوني ..
ماتردد ووافق ثاني يوم اخذني ورحنه ع الشورجه
وداني لمحل مال تاجر حبوب بجميع انواعها
حجه وياه ووصاه عليه ...
التاجر جان اسمه حجي مصدق ...طيب وحباب
بس مبين عليه ابو فليس
يعصر الفلس عصر حتى ينطي...مو مهم قابل اريد اشتري
قصور اريد بس سد الحاجه ...
ثاني يوم استلمت عربانه ودفعتها واحمل اكياس حبوب من المخزن للمحل امشي مسافه طويله ...
لحد ما اوصل ...
ومن ارجع للبيت امر بطريقي بالتكسي
على بيت نجم حتى اتاكد موجودين لو لا ....
بعد تلث شهور رجعت اراقب بس من بعيد لبعيد
جنت اشوف نجم يطلع اختل حتى ميلمحني
وجنت اشوف مره جبيره تروح وترجع عليهم يمكن خدامه تنظف ...
قررت اراقبها من تروح تطلع وامشي وراها واعرف عنوانها
وبيوم ترخصت من حجي مصدق كتله عندي حاله طارئه
كلي روحي مرخوصه ...
رحت وبقيت واكفه بركن الشارع وره حاوية الزباله
شفت المره طلعت من بيتهم انتظرتها لحد ما عبرت الركن
وابتعدت مشيت وراها حوالي ساعه تمشي
دخلت بفرع وبيت بنص البيوت
رحت وراها ودكيت الباب ...طلع طفل زغير ..فتح الباب
وكلي ها خاله شتردين ...
كتله اريد اريد امك كللها خطار ....
اجتي الحجيه طلعت من شفتها كبالي ركضت على رجلها حبيتها كتلها حجيه داخله على الله وعليج وحبيت رجلها
صاحت استغفر الله يمه كومي وصلتي ...
اكعدي استريحي واشربي كلاص مي واحجيلي شبيج ..
سولفتلها كل السالفه ...فهمتها زوجي شهيد وما عاقدين محكمه ....وامنت بجبار وغدر بيه ...
المره هزت راسها وكالت خاله عوفي هذوله الناس وجهالج انسيهم ...
صحت ياااا شلوني انسي دمي لحمي الاضفر ميتخلى عن اللحم ...
كالت مثل ما اكلج نجم اذا عرف انتي جايتني واني وياج
مسولفين يقتلني ويقتلج هذا مسنود من ناس كبار
وميخاف ...وبتج مغسول ادماغها ومطمعيها لبس والعاب
وهي طفله شتفتهم ....
حجيه مو بس بتي وياها ولد اثنين
..كالت ماكو ولد هي بس جنه بس ما طول انتي كلبج ملهوف اني راح اساعدج واحاول اسئل الطفله عن اخوتها ...
