البارت العشرون .....الفصل الثاني ....
ليلان حكمت ....
تقريبا هيأت كل الامور البيت والعمل
اتفقت ويه ام عماد باليوم الي هي متطلع للشغل
تراقب البيت بمكاني واني ابقى يم بنت ابنها جان اسمها
بتول ...
واذا هي بالشغل اني اراقب البيت بس من بعيد لبعيد
حتى ما ينكشف امري ويقتلوني ...
استمريت على هالوضع اشهر
جنت اشوف جنه من تطلع مرتبه وحلوه بس
تاخذني الغصه على جمال وجلال ما اعرف جبار شسوه بيهم
قتلهم لو باعهم ...ايييييييه يادنيا دنيه وغداره
اتمنى احفر قبر جبار واطلعه واكله احجي سولفلي
وين وديت جهالي ....
بس ياحسافه مابيدي حيله وارجع الروح لجبار النذل ..
مرات اكعد المغرب ابجي لحد ما تنسحن روحي
ومرات ادعي ربي لايبتليني بفراقهم صعب
اني صح غلطت بحق نفسي واهلي وربي
وعصيت الله بس من جهلي وغبائي ربي امتحانك صعب
واني عبده لاحول ولا قوه لا تعاقبني هيج عقاب
انت ادكول ابواب التوبه مفتوحه واني اريد اتوب
اغفرلي ورجعلي جهالي والله تعبت والنار تاكل بيه اكل
يوميه على هالحاله استمريت اسولف ويه ربي
وابجي اريد حل اريد شي يصبرني لان الجزع فاض وتبده ..
ام عماد مره فقيره مرات تصبرني بالحجي ومرات تبجي
وياي وتواسيني بس كلمن علته بكلبه ويبجي عليها
مليت اراقب وقررت اروح للمره الي عدها جنه اسولف وياها
بلكي يحن كلبها عليه واكسر خاطرها وتساعدني ...
رحت على البيت ودكيت الجرس ..
طلعتلي الخدامه خزرتني كالت بصوت ناصي شجابج روحي
تره والله يقتلوج ذوله ماكو بكلوبهم رحمه ..
كلتلها الظنه غالي وبعد ماعندي طاقة تحمل ...
جفتت ع البيت لكيت المره كاعده ركضت دنكت على رجلها
حبيتها وعلى نعالها جان تدفعني وادكلي يلا ولي شجايج
امشي اطلعي لا اخليهم يشوفون شغلهم وياج ويربوج
بديت اتوسل بيها وابجي اجت جنه ركضت عليها شبكتها هي هم شبكتني ..
جان تصيح بالخدامه اخذي الابنيه وصيحيلي ميعاد بسرعه
اجه ولد يركض يكول ها عمه ...
كالتله اخذها طلعها بره وشوفوا شغلكم وياها
جروني بره البيت ودفعوني بالكاع وكلولي اذا وصلتي
نذبحج ونكطعج ....
بقيت بالكاع كاعده وابجي على حظي الاغبر
طلعت مره من الجوارين كالت كومي عيني ليش
كاعده بالتراب كومي غسلي ...
تشكرت منها وعفتها ورحت ...رجعت للبيت الطم وابجي
ضيعت كولشي بغبائي واستهتاري ياربي ارحمني
لو تاخذ عمري ...
بقيت اسبوع ما اروح للشغل اجت عليه ام عماد
كالت خيرج شو ماتجين للشغل ...
كلتلها هيج وهيج صار بيه ..كالت اريد احجي وياج
بس مستحيه منج ....
