انا: جت عيني في عينا و من صدمه يطيح صندوق طواسي ويتكسر مني نزلت حطيت صناديق 3 رخرات وقعدت انلم في طواسي المكسوره ومنصدمه
شاب: بحت فيا وكان علي وجه علامات استغراب وخش للمربوعا
وانا كنت انلم و كنت منصدمه ومش عارفه ليش فرحت وخلطن عليا مشاعر فرح ع خوف من واحد من لعيال ايجي ويشوفني
موسي: انتي يافرخا فيش اديري هنا
انا: نرعش من خوف اها كنت انطلع في طواسي وطاحن مني وقاعدا انلم فيهن
موسي: شافك صاحبي
انا: من خوف كذبت لالا ماشفت حد وماحد شافني
موسي: لمي لخروات وانتلفي بسرعه وين باقي الفرخات
انا: في العزاء قاعدات
موسي: باهي هيا بسرعه
وخش موسي لصاحبا وانا كملت اللم وخذيت باقي الطواسي وطلعت
وعطيتهن لبنات وكنت طول الوقت سارحا ونفكر
هدي: هيا ياحنه وين رايحا
انا: اها
هدي: لا سرحان هذا مش طبيعي كنك شن في من لما جيتي وانتي في عالم بروحك
انا: فطنت لروحي وكنت لازم نحكي ونعبر بس سكتت لان قعدين في عزاء ومش وقت دوا
انا: شي تو نحكيلكن بعدين
هدي: لا الفضول قتلني هو موضوع سمح ولا نكد
انا: مش عارف حلو وشين
هدي: شن هذا لغز
انا: هههههه خلاص اسكتي وخلينا انساعدو بنات
~~~~~~~~~~~~~~~~
فاطمه: ايوا فتوح
مفتاح: خير شن جو
فاطمه: تمام انت كيف حالك
مفتاح: تمام . انتي في عزاء مازالتي
فاطمه: اها ياروحي
مفتاح: اها باهي غير رنيت نطمن عليك
فاطمه: نجك ليا . انت وين
مفتاح: انا قاعد في مكتب
فاطمه: مكسد شكلك
مفتاح: اها اليوم فيش زباين واجد وقلق بكل
فاطمه: عليش كنك
مفتاح: ملل بكل وتمزطت
فاطمه: معليش تحمل ياعمري بشويه بشويه وتو ايجوك زباين وتبدأ تشتغل طبيعي هذا لانك كيف فاتح
مفتاح: ان شاء الله وانا عليش متحمل الا علشانك انتي ياغلايا
فاطمه: انحبك
مفتاح: انا انموت فيك
فاطمه: به خلاص ياروحي خليني انساعد البنات وانت عدي وبعدين بعد انروح انكلمك
مفتاح: باهي تعبيش روحك واجد عارفك انا ماتريحيش في روحك
فاطمه: هههههه حاظر
مفتاح: خلاص ردي بالك ع روحك
فاطمه: حتي انت
مفتاح: تم هيا باي
فاطمه: باي
سكرت فاطمه وخشت للبنات ايوتو للعشاء
طبعا مفتاح وفاطمه مخطوبين لهما سنه وسبب خطبتهم رواد راجل هاجر اختها يقعد مفتاح صاحبا واجد ولما مفتاح جا يبي يخطب رواد دلا علي فاطمه وفعلا جا وتقدملها وخوتها وافقو عليه
وخطبها رسمي وقرأ فتحتها وبدت قصة فاطمه ومفتاح مع بعضهم
مفتاح يقري في معهد انجليزي وفاتح مكتب عقارات له ثلاث شهور وعندا شقه فوق هلا وقاعد يشطب فيها ولما يكمل الشقه يطلع العرس وهذا سبب تأخير زواجهم
مفتاح مواليد 87 وطويل اسمر وجذاب وشخصيتا مرح وجوا حلو ومتفاهم ويحب فاطمه وهيا نفس الشي
أنت تقرأ
{الحب الاعمى} الجزء الاول منقولة
Mystery / Thrillerقصة ليبية تتكلم عن الحب الوفاء الصداقة الاخوة الخيانة الكذب قصة طويلة جميلة مأخودة من أحدات حقيقة لم تكتب عبثا او لتسلية فقط بل كتبتها الكاتبة بكل احساس ومن واقعنا فالنقراها ونتمعن في أحداثها ونأخد ماه رائع وجميل منها وأنا أنقلها كما كتبتها الكاتب...
